نۇرسۇلتان نازارباەۆ: سەنىممەن اتتانىپ, جەڭىسپەن ورالىڭدار!
بەيسەنبى, 5 شىلدە 2012 8:36
سپورت – دەنساۋلىق, سپورت – سۇلۋلىق, سپورت – جەتىستىك, سپورت – ادام مۇمكىندىگىنىڭ قىرلارى. ءبىز وسىنى ءاردايىم جادىمىزدان شىعارماۋىمىز كەرەك.
(ەلباسىمىز ن.ءا.نازارباەۆتىڭ قازاقستاندىق وليمپياشىلارمەن كەزدەسۋدە سويلەگەن سوزىنەن).
كەشە اقوردادا مەملەكەت باسشىسى نۇرسۇلتان نازارباەۆ XXX لوندون جازعى وليمپيا ويىندارىنا قاتىساتىن قازاقستان ۇلتتىق قۇراماسىنىڭ مۇشەلەرىن قابىلدادى.
بەيسەنبى, 5 شىلدە 2012 8:36
سپورت – دەنساۋلىق, سپورت – سۇلۋلىق, سپورت – جەتىستىك, سپورت – ادام مۇمكىندىگىنىڭ قىرلارى. ءبىز وسىنى ءاردايىم جادىمىزدان شىعارماۋىمىز كەرەك.
(ەلباسىمىز ن.ءا.نازارباەۆتىڭ قازاقستاندىق وليمپياشىلارمەن كەزدەسۋدە سويلەگەن سوزىنەن).
كەشە اقوردادا مەملەكەت باسشىسى نۇرسۇلتان نازارباەۆ XXX لوندون جازعى وليمپيا ويىندارىنا قاتىساتىن قازاقستان ۇلتتىق قۇراماسىنىڭ مۇشەلەرىن قابىلدادى.
ەلباسى ءوزى بۇرىننان قالىپتاستىرعان داستۇرگە ساي ءتورت جىلدا ءبىر وتەتىن باستى الەمدىك باسەكەنىڭ قارساڭىندا ەگەمەن ەلىمىزدىڭ نامىسىن قورعايتىن وليمپيادالىق كوماندانىڭ دايىندىعىنا قانىعىپ, وزدەرىنە اكەلىك اق جول تىلەۋ ءۇشىن تاعى دا سپورتشىلار مەن جاتتىقتىرۋشىلاردى جانىنا جينادى.
– ءبىزدىڭ ەلىمىز قاشاننان زور سپورتتىق جەتىستىكتەرىمەن ەرەكشەلەنەدى. تەك وتكەن جىلدىڭ قورىتىندىسى بويىنشا عانا ءبىزدىڭ سپورتشىلارىمىز الەمدىك بىرىنشىلىكتەردە 15 ءتۇرلى جوعارى ناگرادانى جەڭىپ الدى, – دەدى نۇرسۇلتان نازارباەۆ ءسوزىنىڭ كىرىسپەسىندە. – ءبىز كەشەگى كەڭەستىك كەزەڭدە دە سپورتتا الدا بولدىق. كەڭەس وداعى تۇسىندا دا قازاقستاننان چەمپيوندار شىقتى. ال تاۋەلسىزدىك العاننان كەيىن ءبىزدىڭ كوپتەگەن ساڭلاقتارىمىز وليمپيادا مەن الەم بىرىنشىلىكتەرىندە ەركىن ونەر كورسەتۋگە ۇلكەن مۇمكىندىكتەر الدى. ەلىمىزدىڭ سپورتى وسى جىلداردا ايتارلىقتاي جوعارى قارقىنمەن دامىپ كەلەدى. وسى رەتتە وتكەن جىلعى قىسقى ازيا ويىندارىندا سپورتشىلارىمىزدىڭ 32 التىن مەدالدىڭ يەگەرى اتانعانىن ايتىپ وتۋىمىزگە بولادى. مۇنىڭ ءوزى رەسپۋبليكانىڭ قىسقى سپورت ساڭلاقتارىنىڭ قۇرلىقتا الدىڭعى قاتاردا تۇرعانىن كورسەتىپ بەردى.
ودان ءارى پرەزيدەنت قازاقستاندىق سپورتشىلاردى جاقسى ءبىلەتىنىن اتاپ كورسەتتى. بۇقارالىق اقپارات قۇرالدارى كۇنى ءبۇگىنگە دەيىن سىزدەردىڭ ءاربىرىڭىزدىڭ ۇلكەن دودا الدىنداعى دايىندىقتارىڭىزدىڭ بارىستارىن ۇدايى جان-جاقتى كورسەتىپ وتىردى. ءبىز وسى كەزدەردە لوندوننىڭ ليتسەنزياسىن ۇتىپ العان ءاربىر سپورتشىمىزدى قازاقستانعا كەڭىنەن تانىستىرىپ وتىرۋعا كۇش سالدىق. ەندى, مىنە, شەشۋشى ءسات تە كەلىپ جەتتى – وسى ايدىڭ سوڭىنا قاراي ءبىزدىڭ ءبارىمىز كوپتەن كۇتكەن وليمپيادا دا باستالادى. قازاقستان سىزدەردىڭ وسى ويىنداردا بارىنشا تابىستى ونەر كورسەتۋلەرىڭىز ءۇشىن بارلىق جاعدايدى جاسادى. تاۋەلسىزدىك جىلدارىندا سپورت سالاسىن وركەندەتۋگە وراسان زور قارجى بولىنە باستادى. ەلىمىزدىڭ بارلىق ءوڭىرىندە سپورتتىق نىساندار كوپتەپ سالىنۋدا, قايتا جوندەۋدەن ءوتكىزىلگەندەرى دە بارشىلىق, دەدى ەلباسى. سوندىقتان الداعى وليمپيادادا ءۇمىتتىڭ ۇكىسىن تاعىپ وتىرعان ساڭلاقتارىمىز ناعىز قازاقستاندىق سپورتشىنىڭ مىنەزىن كورسەتىپ, تىلەۋلەستەرى كۇتكەن بيىكتەردەن كورىنۋلەرى ءتيىس. سپورتشىلارىمىز وزدەرىنە ميلليونداعان قازاقستاندىقتاردىڭ كوز قاداپ وتىرعانىن سەزىنۋلەرى كەرەك.
ەلىمىز ۇلتتىق قۇراما كومانداسىنىڭ مۇشەلەرى الدىنا وسىنداي مىندەت قويعان مەملەكەت باسشىسى ويىنداردا سپورتتىڭ 27 ءتۇرى بويىنشا ەلىمىزدىڭ 107 سپورتشىسى سىناققا تۇسكەلى تۇرعانىن تىلگە تيەك ەتتى. جالپى, بۇل دوداعا جەر-جاھاننىڭ 10,5 مىڭ سپورتشىسى قاتىسىپ, سپورتتىڭ 39 تۇرىنەن 302 مەدال جيىنتىعىن ساراپقا سالادى.
– ءتورت جىلدا ءبىر اينالىپ كەلەتىن وليمپياداعا قاتىسۋ جانە وندا جەڭىسكە جەتۋ ءوزىن ءوزى لايىقتى باعالاي الاتىن ءاربىر سپورتشى جەتىستىگىنىڭ شىڭى بولىپ تابىلادى, – دەدى نۇرسۇلتان ءابىش ۇلى كەلەسى كەزەكتە. – بۇگىندە سپورت – ءجاي عانا جارىس ەمەس. ول – كەز كەلگەن ەلدىڭ حالىقارالىق دارەجەدەگى ءيميدجىن قالىپتاستىراتىن سالا. بىلايشا ايتقاندا, سپورت ءبىر جاعىنان سپورتشىنىڭ جەتىستىگىن كۇللى الەمگە كورسەتىپ جاتسا, ەكىنشى جاعىنان وسى ارقىلى ءوزىن شىعارعان ەلدى سول جالپاق جاھانعا تانىستىرىپ جاتادى. وليمپياداشىلاردىڭ جەڭىسىنەن كەيىن بالالار سپورت سەكتسيالارىنا بارادى. بۇگىندە سپورتتىڭ بۇقارالىق سيپات الۋىنا ايرىقشا كوڭىل ءبولىپ وتىرعان مەملەكەتىمىز قازاقستاندىقتاردىڭ كەمىندە 30 پايىزى سپورتپەن اينالىسۋىن, سالاماتتى ءومىر سالتىن ۇستانۋىن مىندەت ەتىپ قويىپ وتىر. حالىق ءاردايىم سپورتتىق جەتىستىكتەردىڭ اينالاسىنا توپتاسادى, قازاقستاندىق پاتريوتيزم نەگىزىندە بۇكىل ەلىمىز بىرىگەدى. سپورت – دەنساۋلىق, سپورت – سۇلۋلىق, سپورت – جەتىستىك, سپورت – ادام مۇمكىندىگىنىڭ قىرلارى. ءبىز وسىنى ءاردايىم جادىمىزدان شىعارماۋىمىز كەرەك.
وسىدان كەيىن ەلباسى 1996 جىلى قازاقستاننىڭ ۇلتتىق وليمپيالىق قۇراماسىنىڭ تاريحتا تۇڭعىش رەت دەربەس كوماندا بولىپ وليمپياداعا قاتىسقانىن ەسكە الدى. سوعان دەيىن 1972 جىلى ميۋنحەندە باسكەتبولشى ءالجان جارمۇحامەدوۆتىڭ وليمپيادا چەمپيونى اتانىپ, رۋحىمىزدى قانداي كوتەرىپ كەتكەنىن, گيمناسشى نەللي كيمنىڭ ەكى وليمپيادادا بەس دۇركىن چەمپيون بولىپ, ابىرويىمىزدى قالاي اسىرا تۇسكەنىن اڭگىمەگە ارقاۋ ەتتى. ەگەمەندىك جىلدارىندا بوكسشىلارىمىز بىرىنەن سوڭ ءبىرى قازاقستاندى ايداي الەمگە تانىتا باستادى. سولاردىڭ ساپىنداعى ەرماحان ىبىرايىموۆ, بەكزات ساتتارحانوۆ, باقتيار ارتاەۆ, باقىت سارسەكباەۆ سىندى ساڭلاقتارىمىز ەلىمىزدىڭ اتىن وليمپيادا تاريحىنا التىن ارىپتەرمەن قالدىردى. بۇلاردىڭ ءبارى, البەتتە, تاۋەلسىزدىكتىڭ ارقاسىندا مۇمكىن بولدى. قايسىبىر جىلى قازاقستاننىڭ ۆەلوسيپەدشىلەر كومانداسى ۇلكەن جەتىستىككە جەتىپ, كۇللى جەر بەتىنە ەلىمىزدىڭ ەسىمىن جالاۋلاتا جازىپ بەردى. بۇلاردىڭ ءبارى ەشقاشان ۇمىتىلمايدى. ولار حالىقتىڭ جۇرەگىندە, ساناسىندا, جادىندا ماڭگىلىككە جارقىراپ قالىپ قويدى, دەدى پرەزيدەنت.
– مەن سىزدەردى بۇگىن لوندونعا جول جۇرەر الدىندا ءساتتى ساپار تىلەپ, اق باتامدى بەرۋ ءۇشىن شاقىرىپ وتىرمىن, – دەدى ەلباسى بۇدان سوڭ. – ەندى وزدەرىڭىزدى تىڭداپ كورەيىك. سوڭعى بەيجىڭ وليمپياداسىنىڭ التىن ءجۇلدەگەرى يليا ءيليننىڭ نە ايتپاعى بار؟
وسى قاراتپا سوزدەن كەيىن ايگىلى اۋىر اتلەتىمىز بىردەن ءاڭگىمەسىنىڭ تيەگىن اعىتىپ الا ءجونەلدى. ول ءوزىنىڭ ءسوزىن مەملەكەت باسشىسىنا وزدەرىنە كورسەتىپ وتىرعان ۇدايى اكەلىك قامقورلىعى ءۇشىن زور العىس سەزىمىن جەتكىزۋدەن باستادى.
– ەلىمىزدىڭ ۇلتتىق قۇراماسى وتانىمىزعا ابىرويمەن ورالۋ ءۇشىن قولدان كەلگەننىڭ ءبارىن جاسايدى, – دەپ سەندىردى ول ەلباسىن. – بۇل سپورتشىلارىمىز ءۇشىن جاسالىپ وتىرعان بارلىق جاعداي مەن قامقورلىققا ءبىزدىڭ قايتاراتىن جاۋابىمىز بولىپ تابىلادى. ءبىز ءاردايىم بۇكىل جان-دۇنيەمىزبەن ءسىزدىڭ قولداۋىڭىزدى سەزىنىپ وتىرامىز. بەيجىڭ وليمپياداسىنداعى كورسەتكىشى بويىنشا قازاقستان الدىڭعى وتىز ەلدىڭ قاتارىنا ەنىپ ەدى. ەندى لوندوندا ءبىز سول جەتىستىگىمىزدىڭ كەزدەيسوق كەلمەگەنىن دالەلدەۋىمىز كەرەك. ءبىز الەمدەگى ەڭ مىقتى دەگەن سپورتشىلاردىڭ وزىمەن لايىقتى باسەكەگە تۇسۋگە دايىن ەكەنىمىزدى مالىمدەگىم كەلەدى. قازاقستاننىڭ قازىرگى زامانعى جانە مىقتى مەملەكەت ەكەنىن بۇكىل الەمگە تاعى دا تاباندىلىقپەن تانىتاتىن بولامىز. ءسىز مەنىڭ بارشا جەڭىستەرىمنىڭ ناعىز بىرلەسكەن اۆتورى بولىپ سانالاسىز.
وسى جەردە اۋىر اتلەتتەردىڭ سوڭعى كەزدەرى قول جەتكىزىپ كەلە جاتقان تابىستارىنا سۇيسىنىستىك بىلدىرگەن مەملەكەت باسشىسى قۇرامانىڭ باسشىلىعى تاراپىنا دا جىلى سوزدەر ايتتى.
– مۇندا الەكسەي گەننادەۆيچتىڭ كوپ ۇلەسى بار ەكەنىنەن حاباردارمىن, – دەدى نۇرسۇلتان نازارباەۆ. – اۋىر اتلەتتەردەن كوپ ءۇمىت كۇتۋگە بولاتىنىن دا بىلەمىن. مىناداي جۇرەكجاردى جىلى لەبىزدەن كەيىن اۋىر اتلەتيكادان ەلىمىز قۇراما كومانداسىنىڭ كوپ جىلداردان بەرگى ءۇزىلىسسىز باس جاتتىقتىرۋشىسى الەكسەي ني ءوزىن ءوزى توقتاتىپ تۇرا المادى.
– بۇگىندە اۋىر اتلەتيكا بويىنشا وليمپيادالىق قۇراما – تاجىريبە مەن جاستىقتىڭ قوسىندىسى, – دەدى ول بىردەن ەلباسىنىڭ ءسوزىن الا. – بۇل دايىندىق, ماقسات پەن تاجىريبە بىزگە الداعى وليمپيادادا لايىقتى ونەر كورسەتەتىنىمىز تۋرالى سەنىممەن ايتۋعا مۇمكىندىك بەرەدى. مەن ءومىر بويى سپورت سالاسىندا ەڭبەك ەتىپ كەلەمىن. كەڭەستىك كەزەڭدە دە جاتتىقتىرۋشى بولدىم. سوندىقتان بۇگىنگىنى وتكەنمەن سالىستىرۋىما بولادى. سپورتتى دامىتۋ ءۇشىن قازىرگى قازاقستاندا بارلىق جاعداي جاسالىپ جاتىر. مۇنداي قولداۋ بىزدە بۇرىن-سوڭدى بولىپ كورگەن ەمەس. ءبىز بىرەگەي سپورت كەشەندەرى مەن سپورتتاعى وسى زامانعى وزىق تەحنولوگياعا تىكەلەي ءسىزدىڭ قولداۋىڭىزدىڭ ارقاسىندا قول جەتكىزدىك. ءبىز مۇنى انىق سەزىنىپ, ءبىلىپ وتىرمىز. جانە ونى ماقتان دا تۇتامىز. وسىعان بايلانىستى مەن سىزگە سپورتشىلار مەن جاتتىقتىرۋشىلار اتىنان زور العىسىمدى ايتامىن.
كەلەسى ءسوزدىڭ كەزەگى گرەك-ريم كۇرەسىنىڭ شەبەرى المات كەبىسباەۆقا ءتيدى. ول ءوزىنىڭ ءسوزىنىڭ جەلىسىن ەلىمىزدەگى بالۋاندار شوعىرىنىڭ جاس كەزىندە كۇرەسپەن اينالىسقانى ءۇشىن ەلباسىن ەرەكشە جاقسى كورەتىنىنەن تارتتى. بوز كىلەم شەبەرلەرىنە دە ۇلت كوشباسشىسىنىڭ بۇگىنگى جۇرەكجاردى ءاربىر ءسوزى قاتتى اسەر ەتىپ وتىر. بۇل كەزدەسۋدەن ولار بويعا قايتپاس قايرات الدى. «اقوردانىڭ اياسىنان اكەلىك قامقورلىق جاساپ وتىرعان ءسىزدىڭ ىقىلاسىڭىزدان العان قۋاتتى ءبىز ەشقايدان الا المايمىز. بۇل – ءبىزدىڭ تانىمىزگە ەمەس, جانىمىزعا بەرىلگەن كۇش. قازاق سپورتشىلارى قاشان دا باسەكە اتاۋلىنىڭ بيىگى – وليمپيادادان قۇرالاقان ورالعان كەزى بولعان ەمەس. سوندىقتان دا ءبىز وسى جولدا الدىڭعى بۋىن اعالارىمىزدىڭ داڭقتى جولدارىن لايىقتى جالعاستىرۋعا بارىمىزدى سالامىز. ءسىز ارتىپ وتىرعان زور سەنىمدى اقتاۋعا بارىنشا ۇمتىلامىز», – دەدى ول.
لوندوندا تۇڭعىش رەت وتكىزىلگەلى وتىرعان بوكستان ايەلدەر اراسىنداعى ءتۋرنيردىڭ قاتىسۋشىسى مارينا ۆولنوۆا وسى ويدى ودان ءارى جالعاستىرىپ اكەتتى. ءوزىنىڭ ءسوزىن تازا قازاق تىلىندە جەتكىزگەن بىلعارى قولعاپ شەبەرى قازاقستاننىڭ سپورتى ءۇشىن الەم الدىندا ماقتانۋعا بولاتىنىن مالىمدەدى. ول وليمپيا ويىندارىنا جولداما الۋدىڭ وزدەرى ءۇشىن ءبىرىنشى جەڭىس بولسا, ەكىنشى جەڭىسكە لوندوندا قول جەتكىزەتىنىن ايتتى.
– ەندىگى نەگىزگى ماقسات – وسى ساپاردا تەك ءسىزدىڭ اق باتاڭىزبەن ەل نامىسىن قورعاۋ. اسا مارتەبەلى پرەزيدەنت, جەڭىسپەن ورالامىز دەپ سەندىرۋگە رۇقسات ەتىڭىز, – دەدى بوكسشى قىز.
بۇدان كەيىن لوندونداعى ۇكىلى ءۇمىتىمىزدىڭ ءبىرى, جەڭىل اتلەت ولگا رىپاكوۆا ءسوز الدى.
– ءسىز ءبىر جولى ءبىزدىڭ ەلىمىزدى بارىسقا تەڭەپ ەدىڭىز, – دەدى ول ەرەكشە تولعانىس ۇستىندە. – بۇل – شىنىندا وتە ءبىر ادەمى تەڭەۋ. سول قازاقستان بارىسى وسى كەزگە دەيىن قاتارىنان ءۇش رەت رەكوردتىق سەكىرىس جاسادى. ءبىرىنشى سەكىرىس – تاۋەلسىزدىكتىڭ قالىپتاسۋى مەن مەملەكەتتىلىكتىڭ نىعايتىلۋى. ەكىنشىسى – ونجىلدىقتاعى ەكىنشى سەكىرىس تابىستى دامۋ مەن سامعاۋدى بىلدىرەدى. ەندىگى جەردە, ءۇشىنشى ونجىلدىقتا, ءبىز جەتىستىكتەرىمىز بەن جەڭىستەرىمىزدى بەكىتۋىمىز كەرەك.
قورىتىندى ءسوزدى مەملەكەت باسشىسى الدى.
– مەنى ۇلىبريتانيا باسشىلىعى وليمپيا ويىندارىنا شاقىردى, – دەدى پرەزيدەنت. – ول جەرگە بارۋعا نيەتتەنىپ وتىرمىن. بالكىم, الدەقانداي جارىستاردى كورۋدىڭ مۇمكىندىگى تۋىپ قالار. ەڭ باستىسى, مەن سىزدەردىڭ دايىن ەكەندىكتەرىڭىزدى انىق اڭعاردىم. ەلدىڭ سپورتتاعى جەتىستىكتەرى ونىڭ الەمدەگى ورنىن بەلگىلەپ بەرەدى, مەملەكەتتىلىگىن نىعايتادى, حالىقتىڭ توپتاسۋىنا ىقپالىن تيگىزەدى. مەن ۇكىمەتكە عىلىمي-زەرتتەۋ ينستيتۋتى مەن انتيدوپينگ ورتالىعىن اشۋ ماسەلەسىن زەرتتەپ ءبىلۋ تۋرالى تاپسىرما بەردىم. ءبىزدىڭ سپورتتىق الەۋەتىمىز جاقسى. وسى مۇمكىندىكتى دامىتاتىن بولامىز. بۇكىل قازاقستان سياقتى ءبىزدىڭ سپورتتىق كوماندامىز دا كوپۇلتتى. بۇل – قازاقستان حالقىنىڭ سپورتتىق اسسامبلەياسى. مۇنىڭ ماڭىزى وتە زور. ياعني, بۇكىل قازاقستان سياقتى دوستىقپەن, ءبىر كوماندامەن ونەر كورسەتۋ جانە دە جەڭىسكە جەتۋ قاجەت.
وسى ورايدا ەلباسى ەلىمىزدەگى جانكۇيەرلەر سپورتشىلارىمىزعا جان-جاقتى دەم بەرىپ, بارلىق قولداۋ شارالارىن اتقاراتىندىعىن باسا ايتتى. بەيجىڭ وليمپياداسىنا مەن دە باردىم, قالاشىقتا بولدىم. بىرەۋلەرىڭىزبەن كەزدەسكەن دە شىعارمىز جانە وسى جولى دا بۇل ءداستۇردى جالعاستىراتىن بولامىز, دەدى مەملەكەت باسشىسى.
سالتاناتتى قابىلداۋدىڭ سوڭىندا نۇرسۇلتان نازارباەۆ ەلىمىز ۇلتتىق قۇراماسىنىڭ ەلىمىزدىڭ وليمپيا ويىندارىنا اپاراتىن مەملەكەتتىك تۋىن كوماندانىڭ تۋ ۇستاۋشىسى – بالۋان نۇرماحان تىناليەۆكە ءوز قولىمەن تابىس ەتتى.
وسىدان كەيىن ءسوز العان نۇرماحان تىناليەۆ وسىناۋ كورسەتىلىپ وتىرعان زور سەنىم ءۇشىن ەلباسىنا العىس سەزىمىن جەتكىزدى. ول ەلباسىنىڭ سەنىمىن, بارشا ەلدىڭ سەنىمىن اقتاۋ ءۇشىن, كوك تۋىمىزدىڭ كوك جۇزىندە شارىقتاپ, ءانۇرانىمىز الەمگە شىرقالۋى ءۇشىن, قازاقستاننىڭ كۇشتى جانە وركەندەگەن مەملەكەت رەتىندە داڭقىن شىعارۋ ءۇشىن قولدان كەلگەننىڭ ءبارىن جاساۋعا دايىن ەكەندىكتەرىن جەتكىزدى.
كەزدەسۋدىڭ تۇيىنىندە نۇرسۇلتان نازارباەۆ سپورتشىلار مەن جاتتىقتىرۋشىلارعا لوندوندا وتەتىن وليمپيا ويىندارىنا سەنىممەن اتتانىپ, جەڭىسپەن ورالۋدى تىلەدى.
سوڭىنان مەملەكەت باسشىسى وليمپياداشىلارمەن بىرگە ەسكەرتكىش سۋرەتكە ءتۇستى.
سەرىك ءپىرنازار,
«ەگەمەن قازاقستان».
