ءبىر جۇمباقتى شەشۋدىڭ ءۇش جولى
جۇما, 15 ماۋسىم 2012 6:49
Cارسەنبى كۇنى ۆ توبىندا وتكەن ەكىنشى تۋردىڭ ويىندارى گەرمانيانىڭ شيرەك فينالعا شىققانىن ايعاقتاپ بەردى. الايدا, وسى كۇنى دانيانى تىزە بۇكتىرگەن پورتۋگاليا توپتاعى جاعدايدى ودان بەتەر كۇردەلەندىرىپ جىبەردى. ەندى كەلەسى جولدامانىڭ يەسى سوڭعى تۋردا ءبىر جۇمباقتى شەشۋدىڭ ءۇش جولى ارقىلى انىقتالعالى تۇر. بۇل ماقساتتى مانداتتان ءۇش قۇرامانىڭ دا ءۇمىتى بار.
جۇما, 15 ماۋسىم 2012 6:49
Cارسەنبى كۇنى ۆ توبىندا وتكەن ەكىنشى تۋردىڭ ويىندارى گەرمانيانىڭ شيرەك فينالعا شىققانىن ايعاقتاپ بەردى. الايدا, وسى كۇنى دانيانى تىزە بۇكتىرگەن پورتۋگاليا توپتاعى جاعدايدى ودان بەتەر كۇردەلەندىرىپ جىبەردى. ەندى كەلەسى جولدامانىڭ يەسى سوڭعى تۋردا ءبىر جۇمباقتى شەشۋدىڭ ءۇش جولى ارقىلى انىقتالعالى تۇر. بۇل ماقساتتى مانداتتان ءۇش قۇرامانىڭ دا ءۇمىتى بار.
دانيا-پورتۋگاليا – 2:3. شايقاستىڭ باسى ەموتسيانىڭ كوتەرىڭكى قالپىمەن ەستە قالدى. پورتۋگاليا قۇراماسى بىردەن قارسىلاستار قاقپاسىنا قاۋىرت جورىقتى باستادى. كوپ ۇزاماي دانيا فۋتبولشىلارى ولاردى ءوز الاڭدارى جاعىنان ىعىستىرىپ شىعارىپ قانا قويا سالماي, باعىن قارسى باعىتتان ىزدەۋگە دە كىرىسىپ كەتتى.
پورتۋگالدار قوس قاپتالعا كوبىرەك سالماق سالدى. مۇندا سۋىرىلعان سەمسەردەي ۇدايى العا ۇمتىلعان كريشتيانۋ رونالدۋعا لۋيش ناني جانە قاپتالداعى ەكى قورعاۋشى كومەككە كەلۋمەن بولدى. بۇل جورىقتار كوبىنە ايىپ الاڭىنا قاراي اۋەلەتىپ دوپ جىبەرۋمەن اياقتالىپ جاتتى. ولاردى قاقپا ماڭىندا سيمون كياەر مەن دانيەل اگگەر وڭاي قاعىپ الىپ تۇردى. وسى جيىرما مينۋت داتتاردىڭ ازداعان باسىمدىعىمەن, تۇتاستاي العاندا, تەپە-تەڭدىككە جاقىن تەكەتىرەستە ءوتتى. بۇدان ءارى دانيالىقتار ءۇشىن جاعىمسىزداۋ وقيعالار ويىستى. الدىمەن نيكي زيملينگ جاراقات الىپ, الاڭنان كەتتى. ونى الماستىرعان ءتاجىريبەلى ياكوب پوۋلسەن بىردەن ويىنعا كىرىگىپ كەتپەدى. وسىنى پايدالانعان «ەۋروپالىق برازيلدەر» تەز ارادا تىزگىندى وزدەرى ۇستادى. بۇرىشتامادان بەرىلگەن دوپتى پەپە باسىمەن قاقپانىڭ سول جاق بۇرىشىنا تۋرا جونەلتتى.
پورتۋگاليانىڭ كەزەكتى گولىنا سەبەپ بولعان شابۋىلدى سول قاناتتاعى قورعاۋشى فابيۋ كوەنتراۋ ءوربىتتى. ونىڭ اياعىنان ۇشقان دوپ جواو پەرەيرۋ ارقىلى قاقپا ماڭىنا جەتتى. ونى ءىلىپ العان ناني جاقىن باعانعا قاراي اسىردى. سول جەردە سيمون كياەردەن بۇرىن قيمىلداعان ەلدەر پوشتيگا دوپتى ماڭدايشانىڭ استىنا سىلكىپ تاستاي سالدى. وسىلايشا باسىمدىق ەكى دوپقا ۇلاستى. بىراق داتتار جەڭىلىسكە مويىنسۇنۋعا اسىعا قويمادى. سول تاباندىلىق ولارعا ۇزىلىسكە دەيىن ءبىر دوپتىڭ قارىمتاسىن قايتارۋعا دەم بەردى. ءوز كومانداسىنىڭ سول شابۋىلىن باستاعان دەننيس روممەدال الىس باعانعا قاراي دوپ جونەلتتى. ال قاقپاشى مەن قورعاۋشىنىڭ ءبىر-بىرىنە كەلتىرگەن كەدەرگىسىن جاقسى پايدالانعان ميكاەل كرون-دەلي دوپتى قاقپاعا كولبەي اتتى. ودان ارى جالعىز تۇرعان نيكلاس بەندتنەر اشىق قاقپاعا دوپتى سۇڭگىتە سالدى.
شايقاستىڭ شەشۋشى ءساتى فينالدىق ىسقىرىق ەستىلۋگە ون مينۋت قالعان شامادا ورىن الدى. الدىمەن جواو موۋتينيۋ كەرەمەت پاسپەن كريشتيانۋ رونالدۋدى قارسىلاستار قاقپاشىسىمەن بەتپە-بەت شىعاردى. الايدا, پورتۋگالدار كومانداسىنىڭ كاپيتانى ستەفان اندەرسەنمەن بىرگە-ءبىر كەلىپ تۇرىپ, تاعى دا دارمەنسىزدىك كورسەتتى. ونىڭ ۇرعان دوبى قاقپانىڭ جانىنان زۋ ەتە ءتۇستى. سودان سوڭ «سەن سوقپاساڭ, ساعان سوعادى» دەگەن ەجەلگى فۋتبول قاعيداسى جۇزەگە اسىپ كەتتى. دانيا ويىنشىسى لارس ياكوبسەن وڭ قاناتتان كەلىپ, الىس باعان ماڭىنا دوپ جونەلتتى. ونى جوعارى سەكىرىپ قاعىپ العان نيكلاس بەندتنەر جاقىن بۇرىشقا ءدال ءتۇسىردى.
سونىڭ ارتىنشا پورتۋگالدار ىشقىنا العا تارتتى. وسى جەردە ۇرىس الاڭىنا جاڭا شىققان شابۋىلشى سيلۆەسترە ۆارەلانىڭ جولى بولا قويدى. ول ايىپ الاڭىنىڭ الدىندا العان دوبىن ءبىر ىرعاپ جونەلتە الماي, ەكىنشى قومدانعاندا سوققى جاساپ, اقىرى گولعا اينالدىرا ءبىلدى. بىراق بۇل دوپقا جاۋاپ قايتاراتىن شاما مەن ۋاقىت دانيا قۇراماسىندا قالعان جوق ەدى.
گوللانديا-گەرمانيا – 1:2. تالاي سىننان سۇرىنبەي ءوتىپ كەلە جاتقان «نەمىس ماشينەسى» نىساناعا العان باعىتىنان جاڭىلماي ءجۇرۋدى جالعاستىرىپ كەلەدى. ول ازىرگە ەكى تۋردا ەكى رەت جەڭىسكە جەتىپ, بىردە-ءبىر ۇپاي شىعىن شىعارماعان جالعىز قۇراما بولىپ وتىر. ءبىر كەزدەرى اعىلشىننىڭ اتاقتى فۋتبولشىسى گاري لينەكەر: «الاڭدا 22 فۋتبولشى وينايدى, ارالارىندا نەمىستەر جەڭىسكە جەتەدى», دەگەن ەدى. سول ايتقانى تاعى دا تۋرا كەلدى. شەگىنە جەتكەنشە دالدىكتى ۇستاناتىن نەمىستەر بۇل ويىندا دا وزدەرىنە كەرەك ءنارسەنى عانا ىستەدى. بۇعان كەرىسىنشە, گوللانديا قۇراماسى شاشىلىپ قالعانداي اسەر ەتتى. ايتاتىنى جوق, بەرت ۆان مارۆەيكتىڭ ساربازدارى وتكەن جولى جىبەرگەن كەمشىلىكتەرىن تاعى دا قايتالادى. ونىڭ كومانداسى تاعى دا وتە اۋىر قيمىلدادى, قورعانىس شەبى ارقىراپ اشىق جاتتى. مۇنداي بەرەكەسىزدىكتى نەمىستەر ماريو گومەستىڭ ەكى گولىمەن ادەمى جازالاپ بەردى.
سونىمەن, ۆ توبىنداعى ءبىر ءتۇيىن ءالى شەشىلگەن جوق.
كەشە تۇندە س توبىندا يتاليا-حورۆاتيا, يسپانيا-يرلانديا قۇرامالارى كەزدەستى. العاشقى ويىن 1:1 ەسەبىمەن اياقتالدى.
سەرىك ءپىرنازار,
«ەگەمەن قازاقستان».
_____________________
ويلار, پىكىرلەر, كوزقاراستار
ياكۋب پوۋلسەن, دانيا قۇراماسىنىڭ جارتىلاي قورعاۋشىسى: – پورتۋگاليا كومانداسىندا قورعانىس سيپاتىنداعى مىقتى ويىنشىلار كوپ ەكەن. كەشەگى ويىن ناتيجەسىن سولار جاسادى. پورتۋگالدار ستاندارتتى جاعدايدان ۇرۋدا دا قاۋىپتى كورىندى. سوسىن بىزگە سوققان ەكى گولى جەكەلەگەن ويىنشىلاردىڭ شەبەرلىگى ارقاسىندا جۇزەگە استى. بۇل كوماندانى كريشتيانۋ رونالدۋسىز كوزگە ەلەستەتۋ مۇمكىن ەمەس دەپ جۇرگەندەردىڭ ءسوزى جاڭساق. كوماندا ونسىز دا ويناي الاتىنىن وسى كەزدەسۋدە انىق كورسەتتى.
كلاس-يان حۋنتەلار, گوللانديا قۇراماسىنىڭ شابۋىلشىسى: – ءبىز ءبىرىنشى تايمدا ساۋداسىز ۇتىلدىق. بىراق بۇعان ەشكىم قۋانعان جوق. ويتكەنى, جۇرت بىزدەن نەمىستەرمەن تەڭ دارەجەدە ويناۋدى كۇتتى. ەكىنشى تايمدا جاعدايدى تۇزەپ الۋعا ءبىراز ارەكەت جاساپ باقتىق. الايدا, 0:2 بولىپ ۇتىلىپ تۇرىپ, ءوزىڭدى ءوزىڭ جەڭۋىڭ وتە قيىن ەكەن. ايتكەنمەن, ءالى جوعالعان ەشتەڭە جوق. پورتۋگالدارمەن ويىندا ەكى دوپ ايىرماسىمەن جەڭسەك, كەلەسى جولداما بىزدىكى بولادى.
_____________________
ماتچ مينياتيۋرالارى
* سارسەنبىدە ۆ توبىندا ەكىنشى تۋردىڭ ەكى ويىنى وينالدى. ولاردا 8 گول سوعىلدى. بۇلاردىڭ 5-ءۋى ءبىرىنشى, 3-ءۋى ەكىنشى تايمداردا سالىندى.
* بۇل ەكى ماتچتى ستاديونداردا 69 590 كورەرمەن كوردى. وسى جەردە وتكەن جولعى گرەكيا-چەحيا, پولشا-رەسەي قۇرامالارى ويىندارىن تاماشالاعان جانكۇيەرلەر سانىن ناقتىلاي تۇسكىمىز كەلەدى: سول كۇنى ۆروتسلاۆتا – 41 105, ۆارشاۆادا 55 920 ادام وتىردى. جالپى, چەمپيونات باستالعالى ستاديوندار 522 869 ادامنىڭ باسىن قوستى.
* چەمپيونات باسىنان بەرى وينالعان 12 ويىندا قاقپالارعا 33 دوپ ءتۇستى. بۇل ءار ويىندا ورتا ەسەپپەن 2,72 گول سوعىلىپ تۇرعانىن ايعاقتايدى.
* وتكەن ەكى ويىندا تاعى ەكى ويىنشى دۋبل جاسادى. ولار – دانيالىق نيكلاس بەندتنەر مەن گەرمانيالىق ماريو گومەس.
* چەمپيوناتتىڭ مەرگەندەر كوشىن 3 گولمەن باستاپ كەلە جاتقان رەسەي قۇراماسىنىڭ شابۋىلشىسى الان دزاگوەۆتىڭ قاتارىنا گەرمانيالىق ماريو گومەس كەلىپ قوسىلدى. سول سياقتى چەح ۆاتسلاۆ پيلارج, ۋكراين اندرەي شەۆچەنكو, حورۆات ماريو ماندجۋكوۆيچ ەكى دوپتان سوعىپ تۇر.
* وتكەن ەكى ويىندا 7 ويىنشى ەسكەرتۋ الدى. سولاردىڭ ىشىندە گەرمانيالىق جەروم بواتەنگ وسىمەن ەكىنشى رەت جازالانىپ وتىر. جالپى, بىرىنشىلىك باستالعالى ويىنشىلارعا 42 رەت «سارى قاعاز» كورسەتىلدى.
* ۇزدىك ويىنشى اتاعىنا نيكلاس بەندتنەر (دانيا) مەن ماريو گومەس (گەرمانيا) يە بولدى.
___________________
دەرەكتەر مەن دايەكتەر
* چەحيا قۇراماسى چەحسىز جانە روسيتسكيسىز جابىق رەجىمدە جاتتىعادى. بۇلاردىڭ ەكەۋى دە الدىڭعى ويىندا ازداپ جاراقاتتانىپ قالعان بولىپ شىقتى. قازىر ءسىڭىرىن سوزىپ العان توماش روسيتسكي دارىگەرلەردىڭ قاراۋىنا كوشسە, پەتر چەح جەكە باعدارلاما بويىنشا جاتتىعا باستاپتى.
* ۋەفا نيكلاس بەندتنەرگە قاتىستى ماسەلە قاراۋى مۇمكىن. فەدەراتسيا نازارى دانيا قۇراماسىنىڭ شابۋىلشىسىنا پورتۋگاليامەن ويىننان كەيىن جەيدەسىن جوعارى كوتەرىپ, شورتىن ازداپ تۇسىرگەنى ءۇشىن تۇسكەن ەكەن.
*دەننيس روممەدال گەرمانياعا قارسى ويىنعا شىعا المايدى. دانيا قۇراماسىنىڭ شابۋىلداۋشى حاۆبەگى, ءاssوسىاted Press اگەنتتىگىنىڭ حابارلاۋىنشا, كەشەگى ويىن بارىسىندا ءسىڭىرىن سوزىپ العان سياقتى. ونىڭ ماتچتىڭ 60-مينۋتىندا الاڭنان كەتۋىنە سول سەبەپ بولىپتى.
