العاشقى ايقاستار, ادەپكى اسەرلەر
سەيسەنبى, 12 ماۋسىم 2012 7:05
وتكەن جۇما كۇنى پولشا مەن ۋكراينادا سورەدەن شىققان قۇرلىق چەمپيوناتى قىزا تۇسۋدە
كەز كەلگەن تەاتردىڭ كيىم ىلگىشتەن باستالاتىنى سياقتى, قانداي ءبىر ءىرى فۋتبول فورۋمىنىڭ دا قاي دەڭگەيدە وتكەلى تۇرعانىن ونىڭ تۇساۋكەسەر ويىنى بايقاتىپ بەرەدى. بۇل تۇرعىدان قاراعاندا, كارپات تاۋىنىڭ ەكى قاپتالىن الىپ جاتقان ەكى ەلدە باستالعان دوپ دوداسىنىڭ تارتىسقا تولى وتەتىن ءتۇرى بار. ايتاتىنى جوق, بۇعان تەك ماۋسىماشار ماتچ قانا ەمەس, سونىمەن بىرگە ونىڭ سوڭىن الا وينالعان قالعان بەس كەزدەسۋدىڭ بارىسى دا تولىق كۋا بولا الادى.
سەيسەنبى, 12 ماۋسىم 2012 7:05
وتكەن جۇما كۇنى پولشا مەن ۋكراينادا سورەدەن شىققان قۇرلىق چەمپيوناتى قىزا تۇسۋدە
كەز كەلگەن تەاتردىڭ كيىم ىلگىشتەن باستالاتىنى سياقتى, قانداي ءبىر ءىرى فۋتبول فورۋمىنىڭ دا قاي دەڭگەيدە وتكەلى تۇرعانىن ونىڭ تۇساۋكەسەر ويىنى بايقاتىپ بەرەدى. بۇل تۇرعىدان قاراعاندا, كارپات تاۋىنىڭ ەكى قاپتالىن الىپ جاتقان ەكى ەلدە باستالعان دوپ دوداسىنىڭ تارتىسقا تولى وتەتىن ءتۇرى بار. ايتاتىنى جوق, بۇعان تەك ماۋسىماشار ماتچ قانا ەمەس, سونىمەن بىرگە ونىڭ سوڭىن الا وينالعان قالعان بەس كەزدەسۋدىڭ بارىسى دا تولىق كۋا بولا الادى.
پولشا-گرەكيا 1:1. كوپشىلىك كۇتكەندەگىدەي, ەكى جاقتىڭ دا جاتتىقتىرۋشىسى كەزدەسۋدى بارىنشا ساق تاكتيكامەن ءوربىتتى. ايتالىق, فرانتيشەك سمۋدا پولياكتار جاساعىن الاڭعا ءبىر عانا تازا شابۋىلشىمەن شىعارسا, فەرناندۋ سانتۋش ءوز كەزەگىندە گرەكتەردى بىردەن بەس شارتتى قورعاۋشى ەتىپ ورنالاستىردى. الايدا, بۇلاردىڭ اراسىندا ستارتتىق قۇرامنىڭ تالاسسىز ويىنشىسى سانالىپ كەلگەن كيرياكوس پاپادوپۋلوسقا ورىن تابىلماي قالدى. ال ويىننىڭ جۇيكەنى شاباقتايتىن شايقاس بولماعى شۋ دەگەننەن-اق اڭعارىلدى. ساۋىسقاننان ساباق العان كوماندالار بولسا, جاپپاي العا ۇمتىلۋعا دا اسا اسىعا قويمادى.
دەگەنمەن, قاقپا الدىنداعى العاشقى قاۋىپتى جاعدايدى الاڭ يەلەرى ماتچتىڭ 4-مينۋتىندا تۋعىزىپ ۇلگەردى. مۇنىڭ سوڭى ءناتيجەسىز ۇرىلعان بۇرىشتاما دوبىنا ۇلاستى. وسىدان سوڭ پولياكتار قارقىندى كۇشەيتۋگە ارەكەت جاساپ باقتى. گرەكتەر ادەپكى ءجۇيەلى شابۋىلىن تەك 12-مينۋتتا عانا جاساي الدى. كوماندا كاپيتانى گيورگوس كاراگۋنيس بەرگەن پاستى نىساناعا باعىتتاعان تەوفانيس گەكاس دوپتى قاقپانىڭ جانىنان جونەلتتى. مۇنىڭ ارتىنشا قارسى شابۋىلعا كوتەرىلگەن پولياكتاردىڭ سوققىسى دا ايتارلىقتاي قاۋىپ اكەلدى. وسى تەكەتىرەستىڭ اقىرى 17-مينۋتتا چەمپيوناتتاعى ەڭ العاشقى گولدىڭ سوعىلۋىمەن اياقتالدى. الدىمەن الاڭ ورتاسىنان وتە ياكۋب بلاشيكوۆسكي الداعى لۋكاش پيششەككە دوپ اسىردى. ءوز كەزەگىندە ول ەشكىمنىڭ باقىلاۋىنسىز تۇرعان روبەرت لەۆاندوۆسكيگە پاس جەتكىزدى. ال گولكيپەرمەن بەتپە-بەت كەلىپ قالعان روبەرتكە دوپتى باسىمەن جەرگە ءبىر ۇرىپ بارىپ ەسەپ اشقاننان وزگە ەشتەڭە قالمادى.
ويىن وسىدان كەيىن ءتىپتى قىزىپ الا جونەلدى. ءبىز بۇل جەردە يسپانيالىق تورەشى ۆەلاسكو كارباليۋدىڭ گرەك سوكراستيس پاپاستوپۋلوستى الاڭنان ءجونسىز قۋعانى مەن ءبىرىنشى تايمدا پولياكتار قاقپاسىنا بەلگىلەنۋگە ءتيىستى پەنالتيدى ەسكەرمەگەنى تۋرالى ءسوز ەتىپ تە جاتقىمىز كەلمەيدى. مۇنىڭ ەسەسىنە ويىننىڭ ەكىنشى ءبولىگىندە گرەكتەر ايتارلىقتاي باتىل ويناي باستادى. ولاردىڭ ەسەپتى تەڭەستىرىپ كەتۋلەرىنە قاقپاشى ۆويتسەح ششەسنى مەن قورعاۋشى مارتسين ۆاسيلەۆسكيدىڭ ءبىر-ءبىرىن تۇسىنىسبەۋشىلىگى سەبەپ بولدى. وسىدان كەيىن كوپشىلىك ەجەلگى ەللادا ۇرپاقتارى بۇكىل كوماندا بولىپ تاس قامال قورعانىسقا كوشەتىن شىعار دەپ شامالاپ ەدى, ولار كەرىسىنشە باتىلدانىپ الىپ, قارسى جاقتىڭ قاقپاسىن تورۋىلداۋدى كۇشەيتە ءتۇستى. بۇعان جاتتىقتىرۋشى جاساعان ويىنشىلار الماستىرۋشىلىق تا وڭ اسەر ەتكەن سياقتى. سونىڭ ارقاسىندا ولار ءتىپتى كەزدەسۋدىڭ 71-مينۋتىندا العا شىعۋعا دا مۇمكىندىك الدى. بىراق بەتپە-بەت كەلگەن ديميتريس سالپينگيديستى قاعىپ قۇلاتقانى ءۇشىن ءوزى الاڭنان قۋىلىپ قانا قويماي, 11 مەترلىك ايىپ دوبىن دا بەلگىلەتىپ كەتكەن ششەسنىدىڭ ورنىن ماتسەي رىبۋستىڭ ەسەبىنەن باسقان قاقپاشى پشەمىسلاۆ تىتون ءوز داربازاسىن انىق گولدان ساقتاپ قالدى.
ويىننىڭ سوڭىندا ەكى جاق تا ەسەپتى وزگەرتۋ مۇمكىندىكتەرىن ءجىبەرىپ قويدى. سونىمەن جان الىسىپ, جان بەرىسكەن ايقاس اقىرى تەڭ ناتيجەمەن اياقتالدى.
رەسەي – چەحيا 4:1. بۇعان دەيىنگى قۇرلىق چەمپيوناتىندا رەسەيلىكتەر ەشقاشان ءبىرىنشى ماتچىن بۇلايشا جەڭىسپەن اياقتاماعان ەكەن. وسى جولى سونىڭ كوبەسى سوگىلدى. ال وسى شايقاس باستالعان بويدا كوماندانىڭ ستارتتىق قۇرامىن كورگەن جانكۇيەرلەردىڭ كوبىنىڭ كوڭىلىن كۇدىك بيلەگەنى راس. باقساق, جاتتىقتىرۋشى ديك ادۆوكاتتىڭ دا ءبىر بىلگەنى بار ەكەن. ونىڭ قاقپاعا يگور اكينفەەۆتىڭ ورنىنا ۆياچەسلاۆ مالوفەەۆتى قويۋى دا, شابۋىلدىڭ ءوتىنە مارات يزمايلوۆتى ەمەس, الان دزاگوەۆتى شىعارۋى دا ءوزىن-ءوزى اقتادى. ولاي دەيتىنىمىز, مالوفەەۆ ءبىر مارتە ءوز قاقپاسىن ۇلكەن شەبەرلىكپەن ساقتاپ قالسا, قالعان جاعدايدىڭ بارىندە پوزيتسيانى جاقسى تاڭداي ءبىلۋى ارقىلى وتە سەنىمدى ويىن كورسەتتى. ال قارسىلاستار قاقپاسىن ەكى رەت ءدال كوزدەگەن دزاگوەۆ ءجۇدا كەزدەسۋدىڭ باستى قاھارمانىنا اينالىپ شىعا كەلدى.
بىراق كەزدەسۋدىڭ باسىندا ورىستاردىڭ اسىعىس ارەكەتتەرىنەن تۇك شىقپاي, ونىڭ باستاپقى جاعىندا چەحتاردىڭ باسىمدىلىعى بىلىنە بەردى. رەسەيلىكتەر تەك 12-مينۋتتان كەيىن قاراي عانا بۇرىشتاما دوبىن ۇرۋ ارقىلى نەگىزدى تۇردە شابۋىلعا كوشۋگە بەت بۇردى. ولار مۇندا دا وزدەرىنىڭ ادەپكى تاڭداعان تاكتيكالارىنان – ەكىنشى نومىرمەن ويناۋدان باس تارتقان جوق. وسىنىڭ ورايىندا ماماندار «جابۋ جامىلعان جۇيرىك» رەتىندە باعالاعان چەحيا قۇراماسى ورىستار ۇيىمداستىرعان بىرنەشە جويقىن قارسى شابۋىلعا شىداس بەرە الماي قالدى. ءبىرىنشى تايمدا گول سوعۋعا قولايلى تاپ سونداي ءتورت ءمۇمكىندىك ورىن السا, سولاردىڭ تەڭ جارتىسى وڭتايلى جۇزەگە استى.
ەكىنشى تايم اۋىرلاۋ ءوتتى. ءبىردەن ويىن تىزگىنىن قولعا العان چەحتار كوپ ۇزاماي ءبىر گولدىڭ قارىمتاسىن قايتارىپ ۇلگەردى. بۇدان سوڭدا قىسىمدى كۇشەيتكەن ولار قارسى قاقپا الدىندا قاربالاستى كوبەيتتى. مىنە, سول ساتتەردە ورىستاردىڭ تاجىريبەسى كومەككە كەلدى. ولار تۇيىقتان اقىرىنداپ شىعىپ, قارسىلاستارىن قايتا قىسپاققا ءتۇسىردى. ال ەكى جاقتاعى ويىنشىلاردىڭ شارشاعاندارى بىلىنە باستاعان شاقتا رەسەيلىكتەردىڭ شەبەرلىكتەرى ماسەلەنى ءتۇگەلدەي ءوز پايداسىنا قاراي شەشىپ كەتتى. وسى تۇستا بىرىنەن سوڭ ءبىرى سوعىلعان ەكى گول چەح كومانداسىن تالقانداۋعا دەيىن الىپ باردى.
ەندى قالعان ءتورت ويىن تۋرالى قىسقاشا ايتىپ وتەر بولساق, وندا ەڭ الدىمەن گوللانديا قۇراماسىنىڭ دانيا كومانداسىنان 0:1 ەسەبىمەن ۇتىلىپ قالعانى ويعا ورالار ەدى. بۇل ماتچتا ءبىرىنشىلىكتىڭ فاۆوريتتەرىنىڭ ءبىرى سانالعان جاساق بارىن سالىپ كوردى. الايدا, داتتاردىڭ بەرىك قورعانىسى مەن ءجىتى شابۋىلىنا قارسى قوياتىن امال تاپپادى. سونداي باستى ءۇمىتكەرلەردىڭ ءبىرى – گەرمانيا ءوز رەتىندە پورتۋگاليانى ارەڭ تىزە بۇكتىردى. يسپانيا مەن يتاليانىڭ تەڭ ويىنى (1:1) دا كوپ جاعدايدا زاڭدىلىق بولىپ كورىنەدى. ال حورۆاتيانىڭ يرلانديانى الىپ تا, شالىپ تا جىققانىنا (3:1), ءسىرا, ەشكىمنىڭ كۇمانى قالماعان شىعار.
كەشە د توبىنداعى فرانتسيا – انگليا, ۋكراينا – شۆەتسيا قۇرامالارى اراسىنداعى ويىندارمەن ءبىرىنشى تۋر ءتامامدالدى. بەت قاتتالىپ جاتقاندا اياقتالعان فرانتسيا-انگليا ماتچىندا ويىن 1:1 ەسەبىمەن تەڭ اياقتالدى.
سەرىك ءپىرنازار,
«ەگەمەن قازاقستان».
