جەتپىس جىلدان كەيىن ءۇيىن تاپقان سۋرەت
سارسەنبى, 5 جەلتوقسان 2012 6:55
بىلتىر ليتۆا پرەزيدەنتى داليا گريباۋسكايتە حانىم ەلىمىزگە كەلگەن ساپارىندا ەلباسىمىز نۇرسۇلتان ءابىش ۇلى نازارباەۆقا ۇلى وتان سوعىسى كەزىندەگى قازاق جاۋىنگەرى قابيبوللا سالەنوۆتىڭ قۇجاتتارى كوشىرمەلەرىن ءوز قولىمەن تابىستادى.
سارسەنبى, 5 جەلتوقسان 2012 6:55
بىلتىر ليتۆا پرەزيدەنتى داليا گريباۋسكايتە حانىم ەلىمىزگە كەلگەن ساپارىندا ەلباسىمىز نۇرسۇلتان ءابىش ۇلى نازارباەۆقا ۇلى وتان سوعىسى كەزىندەگى قازاق جاۋىنگەرى قابيبوللا سالەنوۆتىڭ قۇجاتتارى كوشىرمەلەرىن ءوز قولىمەن تابىستادى.
ەلباسىنىڭ تاپسىرماسىمەن سول كەزدەگى بايلانىس جانە اقپارات مينيسترلىگىنىڭ اقپارات جانە مۇراعات كوميتەتىنىڭ ءتوراعاسى ب.بەرسەباەۆ جاۋىنگەردىڭ تۋىسقاندارىن ىزدەۋدى باتىس قازاقستان جانە قاراعاندى وبلىستارىنىڭ مۇراعاتتار جانە قۇجاتتاما باسقارمالارىنا تاپسىرادى. بقو مۇراعاتتار جانە قۇجاتتاما باسقارماسىنىڭ باستىعى ۆياچەسلاۆ ينوچكين مەن بقو مەملەكەتتىك مۇراعاتىنىڭ ديرەكتورى ايجان ساۋعاباەۆا بۇل ءىستى قولعا الىپ, ىزدەنىسكە جانىبەك, بوكەي ورداسى, تەرەكتى اۋداندىق مۇراعاتتارىن قوسقان. ءسويتىپ جاۋىنگەردىڭ جانىبەك اۋدانىندا تۇراتىن ۇرپاقتارى انىقتالدى. جانىبەك اۋداندىق مۇراعات ديرەكتورى احمەديار باتىرحانوۆ: «قابيبوللا سالەنوۆ 1915 جىلى 20 قىركۇيەكتە وردا اۋدانىنىڭ جيەكقۇم اۋىلدىق كەڭەسىنە قارايتىن جۇلدىز ەلدى مەكەنىندە تۋعان. 1939-1940 جىلدارى قاراعاندى وبلىسى, قارقارالى اۋدانىنداعى پەداگوگيكالىق ۋچيليششەدە سىرتتاي وقيدى. بۇعان ق.ءسالەنوۆكە 1939 جىلى قازاق كسر وقۋ اعارتۋ حالىق كوميسسارياتى بەرگەن ۋچيليششەنىڭ ستۋدەنتتىك سىناق كىتاپشاسى دالەل بولا الادى. سىرتتاي وقىپ جۇرگەن قابيبوللا 1940 جىلعى 22 اقپاندا قارقارالى اۋداندىق اسكەري كوميسسارياتىنان اسكەرگە شاقىرىلادى. جەرلەسىمىز 429-ارتيللەريا پولكىنىڭ 8-باتارەياسىنىڭ جاۋىنگەرى بولادى. العى شەپتە بولعان جاۋىنگەرلەر ىشىندە قابيبوللا دا 1941 جىلدىڭ 3 شىلدەسىندە تۇتقىنعا تۇسەدى. سودان 1945 جىلدىڭ 9 مامىرىندا بوساپ شىعادى. ارنايى تەكسەرۋدەن وتكەسىن 192-زاپاستاعى ارتيللەريا پولكىندە قىزمەت اتقارىپ, ەلگە سول جىلدىڭ 28 تامىزىندا ورالعان», دەگەن دەرەكتەر بەردى. احمەديار قۋان ۇلىنىڭ ايتۋىنشا, ق.ءسالەنوۆ ءار جىلدارى جانىبەك اۋداندىق اتقارۋ كوميتەتى جانىنداعى جول شارۋاشىلىعىندا جول قىزمەتكەرى, اۋداندىق №221 جول پايدالانۋ باسقارماسىندا جول جوندەۋشى, اۋداندىق وندىرىستىك كومبيناتتا كولىك قىزمەتكەرى, اۋداندىق مۇناي بازاسىندا جۇمىسشى, جانىبەك سەلولىق تۇتىنۋشىلار قوعامىندا, ۇزىنكول كەڭشارىندا, اۋداندىق تۇرمىستىق قامتۋ كومبيناتىندا, اۋداندىق ۆەتەرينارلىق ءدارىحانادا جۇمىس ىستەگەن.
قابيبوللا اعا 1957 جىلى وتاۋ قۇرادى. ايەلى كەنجەعانىم وتەشەۆا ەكەۋى بەگالى, ءاسيا, كەنجەعالي جانە عاليا اتتى ۇل-قىزدارىن تاربيەلەپ ءوسىردى. ءاسيا 1972 جىلى قايتىس بولعان, ال بەگالى تاتارستاندا تۇرادى. كەنجەعالي مەن عاليا جانىبەك اۋىلىندا ءومىر ءسۇرۋدە. الىستان امانات ارقالاي كەلگەن قۇجاتتاردى سوعىستىڭ ازابىن تارتقان جاۋىنگەردىڭ ۇرپاعىنا جانىبەك اۋدانى اكىمشىلىگى سالتاناتپەن تابىستادى. جاۋىنگەردىڭ قۇجاتتارىنىڭ اراسىندا ءجۇز شۋماقتان اسا ولەڭدەرى جازىلعان 22 بەتتىك قويىن داپتەرى, ستۋدەنتتىك سىناق كىتاپشاسى, بىرنەشە فوتوسۋرەتتەرى دە بار.
مايدانگەردىڭ ۇل-قىزى كەنجەعالي مەن عاليا گازەت ارقىلى ەلباسىمىز بەن ليتۆانىڭ پرەزيدەنتى داليا گريباۋسكايتە حانىمعا, بقو مۇراعاتتار جانە قۇجاتتاما باسقارماسىنىڭ باستىعى ۆياچەسلاۆ ينوچكين مەن بقو مەملەكەتتىك مۇراعاتىنىڭ ديرەكتورى ايجان ساۋعاباەۆاعا, ءجانىبەك اۋدانىنىڭ اكىمى بەرىك ەسەنعاليەۆ پەن ءجانىبەك اۋداندىق مۇراعات ديرەكتورى احمەديار باتىرحانوۆقا ۇلكەن ريزاشىلىعىن ايتىپ, العىستارىن جاۋدىرۋدا. «اكەمىز 1978 جىلى ءومىردەن ءوتتى. قۇجاتتارى مەن سۋرەتتەرى تابىلادى دەپ مۇلدەم ويلاپ كورمەپپىز دە. قۋانىشىمىز شەكسىز. ەندى سول كەزدەگى قولدانىستاعى لاتىن قارپىمەن جازىلعان ولەڭدەرىن ماماندارعا وقىتپاقپىز», دەيدى ولار.
نۇرلىبەك راحمانوۆ,
جۋرناليست.
باتىس قازاقستان وبلىسى.
