ناعىز عالىم دەپ وسىنداي ادامدى ايتۋعا بولادى
بەيسەنبى, 4 قازان 2012 7:23
قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, فيزيكا-ماتەماتيكا عىلىمدارىنىڭ دوكتورى, مەملەكەتتىك سىيلىقتىڭ لاۋرەاتى مۇحتارباي وتەلباەۆ ماتەماتيكا عىلىمىنا وزىندىك جاڭالىقتار اكەلىپ, ەسىمى الەمگە ءماشھۇر بولعان ەرەك تۇلعا. ونىڭ داڭقى ءوزى تۋىپ-وسكەن كيەلى قوردايداعى الاقانداي قاراكەمەر اۋىلىنان اسىپ, بارشا قازاقستاندىقتاردىڭ ماقتانىشىنا اينالعالى قاشان. ءبىز مۇحتارباي اعامەن ماقتانامىز, ونىڭ ومىردەگى, عىلىمداعى وزگەشە ءوسۋ جولىن ۇلگى, ونەگە تۇتامىز.
بەيسەنبى, 4 قازان 2012 7:23
قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, فيزيكا-ماتەماتيكا عىلىمدارىنىڭ دوكتورى, مەملەكەتتىك سىيلىقتىڭ لاۋرەاتى مۇحتارباي وتەلباەۆ ماتەماتيكا عىلىمىنا وزىندىك جاڭالىقتار اكەلىپ, ەسىمى الەمگە ءماشھۇر بولعان ەرەك تۇلعا. ونىڭ داڭقى ءوزى تۋىپ-وسكەن كيەلى قوردايداعى الاقانداي قاراكەمەر اۋىلىنان اسىپ, بارشا قازاقستاندىقتاردىڭ ماقتانىشىنا اينالعالى قاشان. ءبىز مۇحتارباي اعامەن ماقتانامىز, ونىڭ ومىردەگى, عىلىمداعى وزگەشە ءوسۋ جولىن ۇلگى, ونەگە تۇتامىز.
اۋليەشوقىدان باستالعان جول
ماتەماتيكا ءىلىمىنىڭ جەتى قات قىرتىسىن توڭىمەن اۋدارىپ, 36 جاسىندا عىلىم دوكتورى اتانعان ونىڭ سونشالىقتى قاراپايىمدىلىعى عاجاپ. قارسى الدىڭدا «ءمۇيىزى قاراعايداي» اكادەميك وتىر دەپ ءتىپتى دە قىسىلدىرماي, كىم-كىمدى دە كۇندە كورىپ جۇرگەن سىرالعى جولداسىنداي ەركىن اڭگىمەگە تارتىپ الاتىن ءبىر باۋىرمالدىق قاسيەتى بار. سودان دا تۋعان جەرگە جولى تۇسكەن سايىن ونىمەن جولىعىپ, تىلدەسىپ قالۋعا اركىم-اق قۇشتار. ال مۇحاڭ ءتورتكۇل دۇنيەنىڭ قاي تۇكپىرىندە جۇرسە دە بالالىق, جاستىق شاعىنىڭ ىزدەرى قالعان تۋعان توپىراقتىڭ جىلۋىن اڭسايتىنى انىق.
…ول كەزدە قاراكەمەردىڭ باس جاعىندا شاعىن عانا ۇستا دۇكەنى بولۋشى ەدى. ەس بىلگەلى مامىت, قۇسايىن شالدار وندا كۇنۇزاق تۇتىندەتىپ, شىڭىلداتىپ تەمىردەن ءتۇيىن ءتۇيىپ جاتاتىن. مۇحتارباي دا جاسىنان سول ۇستاحانانى جاعالادى. سوعىستان كەيىنگى اۋىرتپالىق سالدارىنان مۇحاڭ 10 جاسقا تولعانىندا عانا مەكتەپ ەسىگىن اشادى. 7-سىنىپقا دەيىن وقىپ, وتباسى جاعدايىنا بايلانىستى مەكتەپتەن قول ۇزۋىنە تۋرا كەلەدى. جەتىجىلدىقتان سوڭ توقپاقتاعى مەحانيكا تەحنيكۋمىنا تۇسكەنىمەن, كەيىننەن ونى دا تاستاپ كەتىپ, ورتا ءبىلىمدى كەشكى مەكتەپتە جالعاستىرىپ جۇرگەن كەزى. كۇندىز كۇيەلەش-كۇيەلەش بولىپ, ماڭدايدان سورعالاعان تەرىن سىلىپ تاستاپ ۇستاحانادا بالعا سوعاتىن, نارتتاي بولىپ قىزعان تەمىردىڭ بالعا مەن ءتوس اراسىندا قامىرشا يلەنىپ, مۇقالماستاي بولىپ شىڭدالۋىن قىزىقتاۋدان ءبىر جالىقپايتىن. ءوزىنىڭ دە العان بەتىنەن قايتپاس شاربولاتتاي شىڭدالىپ وسۋىنە وسىنىڭ اسەرى دە بولعان شىعار. قىستاي تەمىر ۇستادا, الا جازداي ماۋسىمدىق جۇمىستارعا الىپ كەتەتىن. كومبايندا سابان تاستاۋشى, تراكتوردا تىركەمەشى دە بولدى. ءوزى دە بىرتىندەپ تراكتوردى ۇرشىقشا ۇيىرە مەڭگەرىپ كەلە جاتتى.
كولحوز دالاسىنداعى ەكى-ءۇش جىلعى قارا جۇمىس ءومىردىڭ ءمانىن باعالاۋدا, ەڭبەكتىڭ ءدامىن سەزىنۋدە كوپ نارسەنى ۇيرەتتى. كەشكى مەكتەپتى بىتىرۋىمەن ونىڭ اۋليەشوقىنىڭ باۋرايىنان عىلىمنىڭ تورىنە قول سوزعان ۇلى ساپارى باستالادى. مۇحتارباي بىشكەكتەگى (ول كەزدە فرۋنزە) قىرعىز مەملەكەتتىك ۋنيۆەرسيتەتىنىڭ فيزيكا-ماتەماتيكا فاكۋلتەتىنە وقۋعا تۇسەدى. ماتەماتيكاعا دەگەن ءبىر جويقىن قۇشتارلىق و باستان-اق بويىن بيلەپ العانى انىق. ونىسى جۇرتقا اۋىلدا جۇمىس ىستەپ جۇرگەن كەزىنەن بەلگىلى ەدى. وزگە مەحانيزاتورلار ماي سىڭگەن كيىمدەرىن باسىنا جاستانىپ, تۇسكى استان سوڭ ءسال مىزعىپ الۋعا جانتايعان ساتتە, بۇل قالتاسىنان قاعاز, قالامىن الىپ, قات-قابات سىرلى الگەبرالىق تەڭدەۋلەر مەن فورمۋلالار الەمىنە ءسۇڭگىپ كەتەتىن. مەكتەپ وقۋلىعىنان تىس قايداعى ءبىر جۋرنالداردان قيىپ العان شىم-شىتىرىق ەسەپتەردى بورشالاپ, جىكتەپ, تالداپ وتىراتىن. «كور دە تۇر, سەنەن ءالى-اق «مىناۋ» دەگەن ەسەپشى, ءتىپتى, بۇعالتىر شىعادى, بالا», دەپ ارقاسىنان قاعاتىن بريگادير. بويعا بىتكەن شىن تالانت, كەمەل دارىن قانداي جاعدايدا دا سۋىماق ەمەس. ونى تراكتور كابيناسىنان ۋنيۆەرسيتەت اۋديتورياسىنا الىپ كەلگەن دە وسىناۋ لاپىلداعان قۇشتارلىق وتى ەدى عوي.
الايدا, ءبىرىنشى كۋرستان-اق اسكەر قاتارىنا الىندى. زەرەك بولماسا ماتەماتيكاعا دەگەن قۇمارلىعى اسكەردەگى ءۇش جىلدا سۋىناتىن جاعدايدا ەدى. اسكەرلىك بورىشىن وتەپ ءجۇرىپ تە ول وقۋىن ءوز بەتىنشە جالعاستىرا بەرەدى. اسكەردەن سوڭ وقىماي-اق ءۇش كۋرستىڭ ەمتيحاندارىن تاپسىرىپ بىردەن 4-كۋرسقا قابىلدانادى. 1966 جىلى م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتى ءجۇرگىزگەن تاڭداۋ ناتيجەسىندە ماسكەۋگە اۋىستىرىلادى. ونى 1969 جىلى ءبىتىرىپ شىعادى.
عىلىمنىڭ شىرقاپ كوگىنە
بۇدان ءارى م.وتەلباەۆتىڭ عىلىمعا شىنداپ دەن قويعان كەزەڭى باستالادى. 1972 جىلى ماسكەۋدە ناق وتىز جاسىندا كانديداتتىق ديسسەرتاتسيا قورعادى. التى جىلدان سوڭ تاعى دا سول ماسكەۋدە «ازۋلارى التى قارىس» ماتەماتيكا الىپتارىنىڭ الدىندا «ديففەرەنتسيالدىق وپەراتورلاردىڭ سپەكترىن باعالاۋ جانە ونىمەن بايلانىستى ەنۋ تەورەمالارى» تاقىرىبىندا دوكتورلىعىن تابىستى قورعايدى. مۇحتاربايدىڭ وزدەرى ويلاعانداي «دىڭداي بۇعالتىر» ەمەس, ودان الدەقايدا بيىككە شىرقاپ شىققانىنا كۇللى اۋىلداستارى قۋانعان سوندا.
م.وتەلباەۆتىڭ ماتەماتيكاداعى قىزمەت جولى 1972 جىلدان باستالادى. 1972-1991 جىلدارى قر عىلىم اكادەمياسىنىڭ كىشى عىلىمي قىزمەتكەرى, زەرتحانا مەڭگەرۋشىسى, جامبىل پەداگوگيكالىق ينستيتۋتىنىڭ رەكتورى, 1991 جىلدان قاراعاندى قولدانبالى ماتەماتيكا ينستيتۋتىنىڭ ديرەكتورى قىزمەتتەرىندە بولدى. 2000 جىلدان باستاپ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى ماتەماتيكالىق مودەلدەۋ ادىستەرى كافەدراسىنىڭ پروفەسسورى جانە كەزىندە ءوزى ءبىلىم العان م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قازاقستاندىق فيليالى ديرەكتورىنىڭ ورىنباسارى قىزمەتىن قوسا اتقارادى. 2004 جىلدان قر ۇلتتىق عىلىم اكادەمياسىنىڭ اكادەميگى.
زامانىمىزدىڭ زاڭعار ماتەماتيگى اتانىپ, الەمدىك دەڭگەيدەگى اۋزى دۋالى نەبىر ماتەماتيكا الپاۋىتتارىنىڭ ءوزىن مويىنداتقان قازاق عالىمىنىڭ عىلىمعا قوسقان ۇلەسى وراسان. فۋنكتسيونالدىق تالداۋلار سالاسىنىڭ ءىرى مامانى بولىپ تابىلاتىن م.وتەلباەۆ تەورياداعى ەڭ كۇردەلى ەكى پروبلەمانى: ديففەرەنتسيالدىق سپەكترگە ەكىجاقتى شەكتەۋ فورمۋلالارىن جانە مەنشىك مانگە ۋنيۆەرسالدىق فورمۋلا بولمايتىنىن دالەلدەگەن. لوكالداۋ پرينتسيپىن اشىپ, كوررەكتى شەكارالىق ەسەپتەۋدىڭ جالپى ءتۇرىن جۇيەلەدى. ەينشتەيننىڭ سالىستىرمالىق تەورياسىنا تىڭ كوزقاراسپەن تۇجىرىمداما دا جاسادى.
سپەكترلىك تەورياسى مەن فۋنكتسيالىق تاپتار تەورياسىنداعى ازىرلەگەن ادىستەرى, اسىرەسە, ونىڭ ۇسىنعان ارناۋلى وقشاۋلاندىرۋ ءتاسىلى ماتەماتيكانى دامىتۋعا قوسىلعان اسا زور ۇلەس بولىپ تابىلادى. وسى ەڭبەگى جوعارى باعالانىپ, وعان 1990 جىلى كسرو عا فيزيكا-ماتەماتيكا ءبولىمىنىڭ ارناۋلى سىيلىعى بەرىلدى. ال كسرو ماتەماتيكا عىلىمىنىڭ كەزىندە دۇنيە جۇزىندە الدىڭعى ورىندا بولعانىن ەسكەرسەك, مۇحتاربايدىڭ تابىسى قازاقستان ماتەماتيكا مەكتەبىنىڭ ۇلكەن جەڭىسى ەدى.
قازاقستان تاۋەلسىزدىگىنىڭ قيىندىقتارى قات-قاباتىمەن كەلگەن باستاپقى توقىراۋ كەزەڭىندە قانشاما عالىمدار جەرۇيىق ىزدەپ, شەتەلدەرگە اسىپ كەتتى. ال وتەلباەۆ تۋعان جەردەن تامىرىن ۇزگەن جوق. ول كەشەگى كەڭەستىك داۋىردەگى ءتارىزدى, بۇگىنگى جاڭارعان قازاقستاننىڭ دا ماتەماتيكا الەمىنىڭ جارىق جۇلدىزى سانالادى. مۇحاڭ الەمدىك دەڭگەيدەگى مەكتەپتىڭ نەگىزىن قالادى, جەكە ءوزى وننان استام عىلىم دوكتورىن, جەتپىس بەس عىلىم كانديداتىن ءوسىرىپ شىعاردى. 200-دەن استام عىلىمي ەڭبەكتىڭ اۆتورى. دۇنيەجۇزىنىڭ ءار قيىرىندا ءوتىپ جاتاتىن ماتەماتيكتەر سيمپوزيۋمدارىنا قاتىسىپ, باياندامالار جاساپ تۇرادى. 1994 جىلدان باستاپ ەلىمىزدىڭ «قر فۋندامەنتالدى زەرتتەۋلەر باعدارلاماسىنا» قاتىسىپ كەلەدى. قازىرگى كەزدە قر ءبىلىم جانە عىلىم مينيسترلىگىنىڭ «قر فۋندامەنتالدى زەرتتەۋلەر باعدارلامالارى», «قر يننوۆاتسيالىق ءوندىرىستەردى عىلىمي-تەحنيكالىق قامتاماسىز ەتۋ» جانە «قر قولدانبالى عىلىمي-تەحنيكالىق جوبالارى» عىلىمي باعدارلامالارىنا ەنەتىن نەگىزگى 4 جوباعا جەتەكشىلىك ەتۋدە. 2002-2003 جانە 2004-2005 جىلدارى وتەلباەۆ عىلىم مەن تەحنيكاعا ولشەۋسىز ۇلەس قوسقان عالىمدار مەن ماماندار ءۇشىن تاعايىندالاتىن مەملەكەتتىك عىلىمي ستيپەنديانىڭ يەگەرى. 2002 جىلدىڭ قورىتىندىسى بويىنشا «التىن ادام» كونكۋرسىنا تاعايىندالاتىن «جىلدىڭ عىلىمي قايراتكەرى», قازاقستانداعى «جىل ادامى» اتاعىنىڭ يەگەرى. 2004 جىلى تەھران قالاسىندا «عىلىم جانە تەحنولوگيا» اتالىمى بويىنشا ەكونوميكالىق ىنتىماقتاستىق ۇيىمى سىيلىعىنىڭ لاۋرەاتى بولدى, 2007 جىلى تۇركيانىڭ ساكاريا قالاسىندا تۇركى الەمى ماتەماتيكتەرى قوعامىنىڭ ۆيتسە-پرەزيدەنتى بولىپ تاعايىندالدى. 2006 جانە 2010 جىلدارى «جوعارى وقۋ ورىندارىنىڭ ۇزدىك وقىتۋشىسى» گرانتتارىن جەڭىپ الدى.
2007 جىلى تاۋەلسىزدىك كۇنى مەرەكەسى قارساڭىندا ماتەماتيكا سالاسىندا دۇنيەجۇزىنىڭ عالىمدارى «وتەلباەۆ فۋنكتسياسى» دەگەن اتپەن مويىنداعان «سپەكترلىك تەوريا جانە ونىڭ قولدانىلۋى» تاقىرىبىنداعى جۇمىستار تسيكلى ءۇشىن وعان عىلىم مەن تەحنيكا سالاسىنداعى قازاقستان رەسپۋبليكاسىنىڭ مەملەكەتتىك سىيلىعى بەرىلدى. بۇل قازاقستان تاۋەلسىزدىگى جىلدارىندا ەلىمىزدە عىلىم مەن تەحنيكا سالاسى بويىنشا ماتەماتيكتەرگە بەرىلگەن تۇڭعىش سىيلىق ەدى.
تۋعان جەردىڭ ءتۇتىنى دە ءتاتتى
ماتەماتيكا الەمىنىڭ تورىنە شىققان ءبىزدىڭ مۇحاڭ بۇگىندە جاسى جەتپىسكە يىق ارتسا دا, جاس كەزدەگىدەي ەلگەزەك. جىلىنا بىرنەشە مارتە الەمنىڭ ءار تۇكپىرىندە ءوتىپ جاتاتىن حالىقارالىق دارەجەدەگى سيمپوزيۋمدار, كونفەرەنتسيالار, سەزدەرگە ارنايى شاقىرتۋلارمەن بارىپ, باياندامالار جاساپ تۇرادى. استانا قالاسىنداعى ەلىمىزدىڭ باس ۋنيۆەرسيتەتىندەگى جانە ءوزى باسقاراتىن ممۋ فيليالىنداعى قىزمەتى ءوز الدىنا. الايدا, عالىم قانشاما جۇمىسباستى بولىپ جۇرسە دە تۋعان جەرىن, ونداعى التىن ۇيا مەكتەبىن, سۇيىكتى ۇستازدارىن ەستەن شىعارمايدى. الماتىعا جولى تۇسە قالعاندا, اراسىندا ۋاقىت تاۋىپ, قورداي اسىپ, اۋليەشوقى باۋرايىنداعى تۋعان اۋىلىنا تارتىپ كەتۋگە تىرىساتىنى سودان.
وسىدان جارتى عاسىردان استام بۇرىن مۇحتارباي تابالدىرىعىن اتتاعان قاراكەمەر باستاۋىش مەكتەبىنىڭ ورنى سوڭعى جىلدارعا دەيىن بوس جاتتى. بىلتىر عانا وندا ءزاۋلىم مەشىت بوي كوتەردى. كەزىندە ءتالىم بەرگەن ۇستازدارىنىڭ دا كوبى ءومىردەن ءوتىپ كەتىپتى. «ەلۋ جىلدا ەل جاڭا», كەيىننەن اۋىلدىڭ باس جاعىنان ەكى قاباتتى جاڭا مەكتەپ سالىنىپ, قازىر وندا مۇعالىمدەردىڭ مۇلدە جاڭا جاس بۋىنى ەڭبەك ەتۋدە. ال مۇحاڭ ءوز مەكتەبىن, ۇستازدارىن, سىنىپتاستارىن ساعىنادى. العاشقى ۇستازى نۇرشيدا حاميتوۆا اپايىنا, اريفمەتيكانىڭ ءتورت امالىن ۇيرەتۋدەن باستاعان ەلامان نۇرپەيىسوۆ, جوعارى سىنىپتا فيزيكا-ماتەماتيكا الەمىنە قىزىقتىرا باۋراپ, تەرەڭ ءبىلىم بەرگەن يسابەك ادىكەەۆ اعايلارىنا شاكىرتتىك ىقىلاسى شەكسىز. مۇحاڭنىڭ بۇگىندە كوزى ءتىرى ۇستازدارىنىڭ ءبىرى, ماتەماتيكادان ءدارىس بەرگەن ءدۇردانا نوعايباەۆانىڭ جاسى 80-گە تاياپ قالدى, قازىر اۋدان ورتالىعىندا تۇرادى.
– مۇحتارباي سىنىپتاستارى ىشىندەگى قاراپايىمى ءارى جۋاسى بولدى, – دەپ ەسكە الادى ءبىر كەزدەگى شاكىرتىن قارت ۇستاز. – بىراق ونىڭ ويلى كوزدەرىندە نۇر تۇنىپ تۇراتىن. وتباسىنداعى تۇرمىس اۋىرتپالىعىنان ول باسقا بالالاردان سەرگەكتىگىمەن, سونىسىنا قاراي ايتىلعاندى قاعىپ الاتىن زەرەكتىگىمەن ەرەكشەلەنەتىن…
1984-1986 جىلدارى ءوزى رەكتور بولىپ ىستەگەن جامبىل پەداگوگيكالىق ۋنيۆەرسيتەتى دە وعان وزگەشە ىستىق. جىل سايىن ەل ارالاپ, ءوزى قىزمەت ەتەتىن ەۋرازيا ۇلتتىق ۋنيۆەرسيتەتىنە دارىندى شاكىرتتەر ىرىكتەۋدى داستۇرگە اينالدىرعان اتاقتى اكادەميك بىلتىر عانا تارازداعى جوعارى وقۋ ورىندارىندا وتكەن وليمپيادا جۇلدەگەرلەرىنە رەكتورلىق گرانتتاردى ءوز قولىمەن تاپسىرعان بولاتىن. تارمپي-دە ول ەكى جىلداي عانا باسشىلىقتا بولدى. ويتكەنى, ول رەكتور «قالىبىنا» سىيمايتىن دارىن ەدى, كوپ ۇزاماي ءوزىنىڭ عىلىمىنا قايتا ورالدى. ال ونىڭ وسىنداعى باستامالارىن تالانتتى شاكىرتتەرىنىڭ ءبىرى, تارمپي-دىڭ ماتەماتيكا جانە ماتەماتيكانى وقىتۋ ادىستەمەسى كافەدراسىنىڭ مەڭگەرۋشىسى, عىلىم دوكتورى, پروفەسسور مۇساحان مۇراتبەكوۆ تابىستى جالعاستىرۋدا. ارقايسىسى ۇلكەن عالىمعا اينالىپ ۇلگەرگەن مۇحاڭنىڭ مۇنداي شاكىرتتەرى ەلىمىزدىڭ ءار تۇكپىرىندە كوپتەپ سانالادى. ال كىندىك قانى تامعان توپىراقتان شىققان ءاربىر جاس دارىن ءۇشىن بالاشا قۋاناتىن اكادەميك جەرلەسىمىزدىڭ اتىندا تارازدان ماتەماتيكانى تەرەڭدەتىپ وقىتاتىن مەكتەپ-ينتەرنات اشۋ تۋرالى ويىمىزدى تاعى دا العا تارتامىز. سوندا وبلىس اۋماعىنىڭ ءار قيىرىنان, اۋىل-اۋىلداردان ماتەماتيكاعا دارىندى جاستاردى جيناپ, قازاق عىلىمىن ورگە سۇيرەيتىن وتەلباەۆ ءىزباسارلارىن كوپتەپ دايارلاۋعا جول اشىلار ەدى.
مۇحاڭ تۋرالى از جازىلعان جوق. سولاردىڭ ىشىنەن قازاقتىڭ تاعى ءبىر كورنەكتى ماتەماتيك عالىمى, فيزيكا-ماتەماتيكا عىلىمدارىنىڭ دوكتورى, پروفەسسور, ۇعا اكادەميگى تىنىسبەك كالمەنوۆتىڭ «مۋحتارباي وتەلباەۆ. ۆزلەت ساموۋچكي ك ۆەرشينام ناۋكي» اتتى كىتابىن ايتساق تا جەتكىلىكتى. ول «تراكتورشىدان عىلىم دوكتورىنا دەيىن» دەگەن تاقىرىپپەن باستالادى. بۇل كىتاپتان مۇحاڭنىڭ عىلىمعا دەگەن ادالدىعىن, وعان دەگەن سۇيىسپەنشىلىگىن, شىنايى ماحابباتىن تانۋعا بولادى. اكادەميك ءوز ارىپتەسى تۋرالى: «مۇحتارباي وتەلباەۆ – قازاقستان ماتەماتيكتەرى ءپىر تۇتاتىن ادام», دەپ انىقتاما بەرەدى.
قول ەڭبەگى – كۇندىك تىرلىك, وي ەڭبەگى – ۇرپاعىڭنىڭ ۇرپاعىنا جەتەتىن باقىتتىڭ دا, بايلىقتىڭ دا كىلتى, دەۋدەن جالىقپايتىن مۇحاڭنىڭ ارمانى – بولاشاقتا ەلىمىزدى وركەنيەتتىڭ ورىنە شىعاراتىن ءبىلىمدى ۇرپاق تاربيەلەي بەرۋ.
قۇرمانبەك ءالىمجان,
جامبىل وبلىستىق «اق جول» گازەتى رەداكتورىنىڭ ورىنباسارى.
تاراز.
