كۇتپەگەن كەزدەسۋ
سارسەنبى, 28 ناۋرىز 2012 7:15
جازمىشتان وزمىش جوق. وزىنە جۇماقتاي كورىنەتىن باسپاناسى ءبىر مەزەتتە تاسقىننىڭ قۇربانىنا اينالىپ, قابىرعاسى قاۋساپ قۇلادى. جولدىحاننىڭ جۇرەگى شاڭىراعى ب ۇلىنگەندە قان جىلادى. مۇندايدا كوزدەن تامشى دا تامباي قالادى ەكەن. بۇعان قوسا كوشە بويىنداعى كۇنكورىسىن ايىرعان شاعىن دۇكەنىن دە تاسقىن شايدى. تۇكسىز, تىپ-تيپىل دالادا قالدى.
سارسەنبى, 28 ناۋرىز 2012 7:15
جازمىشتان وزمىش جوق. وزىنە جۇماقتاي كورىنەتىن باسپاناسى ءبىر مەزەتتە تاسقىننىڭ قۇربانىنا اينالىپ, قابىرعاسى قاۋساپ قۇلادى. جولدىحاننىڭ جۇرەگى شاڭىراعى ب ۇلىنگەندە قان جىلادى. مۇندايدا كوزدەن تامشى دا تامباي قالادى ەكەن. بۇعان قوسا كوشە بويىنداعى كۇنكورىسىن ايىرعان شاعىن دۇكەنىن دە تاسقىن شايدى. تۇكسىز, تىپ-تيپىل دالادا قالدى.
كەشە عانا قالىپتى ومىردەگى قىزىلاعاش اۋىلى دا استان-كەستەڭ. تابيعاتتىڭ بۇل «شەشىمىنە» نە ءۋاج ايتارسىڭ. جولداسى سەرىك ءومىردەن ەرتە ءوتىپ, بەرىك پەن مەرەكەنى ەل قاتارىنا قالاي قوسسام دەگەن كەيۋانا ارمانى دارمەنسىزدىككە تىرەلگەندە قارماناتىن دا جەرى جوق بولاتىن.
جولدىحان تالدىقورعانداعى جاقىندارىنىڭ ءۇيىن ۋاقىتشا پانالاۋعا بەل بۋدى. تۇيىنشەگى مەن نەمەرەسى ازاتتى كوتەرىپ, جولعا شىقتى. ءارى-بەرى اعىلعان اۆتوكولىك. كوپشىلىگى اپاتتان كەيىنگى قۇتقارۋ جۇمىستارىمەن اينالىسسا, ەندى ءبىرى ءوزى ءتارىزدى تۋىستارىنا جەتۋگە اسىققاندار. ايتەۋىر اۋرە-سارساڭ, دالباسالاعان جۇرت سەڭدەي سوعىلىسادى.
ناۋرىزدىڭ ىزعارى دا وڭمەنىڭنەن وتەدى. وعان كوڭىلدەگى جايسىزدىق قوسىلىپ, انا كوڭىلىن ودان ءارى جۇدەتتى. ياپىر-اۋ, باس ساۋعالاپ جۇرگەندە ازىن-اۋلاق تيىن-تەبەنىنە دە يە بولماپتى. تالدىقورعانعا جەتسەم, ءبىر ىڭعايى بولار دەگەن ۇمىتپەن كەلە جاتقان اۆتوكولىككە قول كوتەردى. جىلدامدىعىن ازايتىپ, ءبىراز جەرگە بارىپ كىلت توقتاعان كولىكتەن تۇسكەن ازامات قولىنداعى ءسابيىن الىپ, «وتىرىڭىز» دەپ ەسىكتى اشتى. جولدىحان ءيمانجۇزدى جولاۋشىعا راحمەتىن جاۋدىرعىسى كەلدى. بىراق, ايتا المادى. ازاتىن باۋىرىنا قىسىپ, ۇستىندەگى تۇندە يىعىنا ىلە سالعان كونەتوز ءۇي كيىمىنە كوز سالدى. بىردەن ءوزىن جايسىز سەزىندى. دەسە دە ساناسى اۋىر ويدان ارىلمادى. ەندى قايتسىن, ءبىر شاڭىراقتىڭ تاۋقىمەتى ەكى يىعىن باسىپ تۇرسا…
– قايدا باراسىز؟..
قارا تورى جىگىت اعاسى العاشقى اڭگىمەنى وسىلاي باستادى.
– نەسىن ايتاسىز. كورگەن بولارسىز, تۇندە اۋىلىمىزدى تاسقىن الىپ, بۇگىن مىنە, دالادا قالدىق, – دەگەن انا جىلى ءسوز, بولماشى قامقورلىقتى سەزىنگەننەن كوڭىلى بوساپ, كوز جاسىن توگىپ جىبەردى.
– مويىماڭىز. مىنا وقيعا ءبىزدىڭ دە باسىمىزعا جاي ءتۇسىردى. ەلباسى نۇرسۇلتان نازارباەۆتان باستاپ, سىزدەردى قيىندىقتان قامىقتىرماي الىپ شىعۋ ءۇشىن جۇمىلىپ جاتىرمىز. سوندىقتان ءبارى ۇمىت بولاتىن كۇن جاقىن. جاقسى ۇيگە قونىستاناسىزدار, – دەپ باسۋ ايتقاندا ول العاش رەت ونىڭ جۇزىنە سەنىمسىزدىكپەن تىكە, تاڭىرقاي قارادى. تەلەديداردان كورىپ جۇرگەن وبلىس اكىمى سەرىك ۇمبەتوۆ وسى بولار دەگەن وي ساناسىنا ساپ ەتە ءتۇستى.
– ءسىز كىمسىز؟ ءسىرا, وبلىس اكىمى بولارسىز؟
ودان ءارى جولدىحاننىڭ وتباسى, تاسقىن جايلى اڭگىمە جالعاستى.
ماشينا تەرەزەسىن دامىلسىز ۇرعىلاعان اق جاۋىن تولاستار ەمەس. بىراق, كولىك ىشىندەگى جاناشىرلىق انا كوڭىلىن ءسال بولسا دا ورنىقتىرعانداي. وقيعانىڭ اۋىرتپالىعى سونشالىقتى اڭگىمە اۋانى ءۇزىلىپ بارىپ قايتا جالعانادى, قيۋى كەلمەيدى.
تالدىقورعانعا دا كەلدى. العىسىن ايتىپ, بالاسىن كوتەرىپ, ماشينادان تۇسۋگە ىنعايلانعان جولدىحاندى اكىم قولتىعىنان دەمەپ, زاتتارىن كوتەرىستى. جانە سپورت كيىمىنىڭ قالتاسىنان ءۇش جاستاعى ازاماتتىڭ الاقانىنا الدەبىر زاتتى ۇستاتتى.
– ەندى قانداي ماسەلە بولماسىن, وزىمە حابارلاسىڭىز. مويىماڭىز, مىنا كىشكەنتاي ۇلكەن ازامات بولسىن, – دەدى قىسقا عانا.
ديدارعايىپ دۇنيەنىڭ وسى ءساتى انا ءۇشىن جاقسىلىققا جول اشقانداي بولدى. ازاماتتىڭ الاقانىنداعى الپىس مىڭ تەڭگە جاڭا عانا جولىنا «سوقىر» تيىن تاپپاعان جولدىحانعا ءتاڭىردىڭ كوكتەن تۇسىرگەن سىيىنداي كورىندى. بۇل 2010 جىلى 13 ناۋرىز بولاتىن.
ء…بىز ىسساپارمەن قىزىلاعاش اۋىلى, جىبەك جولى كوشەسىندەگى جولدىحان رىسالدينوۆانىڭ وتباسىنا ايالدادىق. ول ءبارىمىزدى ەسكى تانىسىنداي جادىراي قارسى الدى. سوسىن ءوزىنىڭ باسىنان وتكەن جوعارىداعى وقيعانى قاز-قالپىندا ادىپتەپ جەتكىزدى.
– مىنە, كاسىپكەر بولات نازارباەۆتىڭ دەمەۋشىلىگىمەن سالىنعان ءۇي. وسىنىڭ ورنىندا 1955 جىلعى ەسكى تام بار ەدى. جولداسىم سەرىك ەكەۋمىز مال باعىپ, باسقا دا كاسىپتەردە بەل شەشپەي ءجۇرىپ تۇرعىزعانبىز. ارينە, ونىمەن سالىستىرعاندا مىنا ءۇي حان سارايىنداي عوي. اۋماعى 90 شارشى مەتر. 3 جاتىن بولمە, قوناق كۇتەتىن زال جانە اس ءۇيى بار. جيھازداردى دا بىرگە بەردى. قىزىل كىرپىشتەن سالىنعان, – دەگەن جولدىحان قامقورلىققا العىس ايتۋدان جالىقپاي وسى نيەتىنە قايتا-قايتا ورالا بەردى.
قازىر اۋىل تۇرعىندارىنىڭ جۇمىسپەن قامتىلۋى ەرەكشە نازارعا الىنعان. سولاردىڭ قاتارىندا جولدىحان رىسالدينوۆا «جول كارتاسى-2020» باعدارلاماسىمەن قوماقتى قارجى الىپ, دۇكەن اشۋدى جوسپارلاعان. جەر تەلىمى ءبولىنىپ, قۇجاتى راسىمدەلگەن. ەندى جەر دەگدىسە قۇرىلىستى باستاۋعا ءتاستۇيىن دايىن.
كۇمىسجان بايجان.
الماتى وبلىسى.
