- بارلىق توتەنشە جاعدايلار سۋداعى قاۋىپسىزدىك تالاپتارىن ساقتاماۋ سالدارىنان بولىپ وتىر. سۋدا 10 ادامنىڭ قازا بولۋىنىڭ نەگىزگى سەبەپتەرى - جابدىقتالماعان سۋ ايدىندارىندا شومىلۋ, سۋدا قاۋىپسىزدىك ەرەجەسىن بۇزۋ, سۋعا ءتۇسۋ كەزىندە ءوزىنىڭ ءجۇزۋ قارىمىنا قاراماۋ, ىشىمدىك ىشكەن كۇيدە سۋعا ءتۇسۋ, بالالاردىڭ سۋ ماڭىندا ەرەسەك ادامداردىڭ قاراۋىنسىز بولۋى, بالىق اۋلاۋ كەزىندە ەرەجەنى بۇزۋ بولىپ تابىلادى. وتكەن جىلى تىركەلگەن 10 وقيعانىڭ 6-ى اقتاۋ قالاسىندا ورىن السا, «كەندىرلى» دەمالىس بازاسىندا ەكەۋ, فورت-شەۆچەنكو كالاسىندا 2 جاعداي تىركەلدى, دەيدى ر.دەمەۋبەرگەن.
جالپى وڭىردە جاعالاۋ 1000 شاقىرىمدى قۇرايدى. كاسپي تەڭىزى جاعالاۋىندا جاز كەزىندە سۋعا تۇسۋگە ارنالعان 30 ۋچاسكە بار. ونىڭ 20-سى اقتاۋ قالاسىندا, 10-ى «كەندىرلى» دەمالىس بازاسىندا ورنالاسقان. سونداي-اق, 3 جاعاجاي ايماعى, 5 بالالار لاگەرلەرى, 22 دەمالىس بازاسى بار.
الداعى جاز مەزگىلدەرىندە اقتاۋ قالاسىنداعى 14 دەمالىس بازاسىنىڭ 8-ءى جۇمىس جاسايدى دەپ جوسپارلانۋدا. 5 دەمالىس بازاسى جۇمىس جاسامايدى, 1-ەۋىندە جوندەۋ جۇمىستارى جۇرگىزىلۋدە.
تەڭىزدە قاۋىپسىزدىكتى قامتاماسىز ەتۋ ءۇشىن ماڭعىستاۋ وبلىسىنىڭ توتەنشە جاعدايلار دەپارتامەنتى جەدەل قۇتقارۋ جاساعىنىڭ 4 قۇتقارۋ بولىمشەسى بار. ولار اقتاۋ قالاسى, «كەندىرلى» دەمالىس بازاسى, تۇپقاراعان اۋدانى جانە قۇرىق سەلولارىندا ورنالاسقان.
