- 2006 جىلدان باستاۋىن العان شارا بيىل حالىق جازۋشىسى ءا.كەكىلباي ۇلى مەن اقىن ف.وڭعارسىنوۆانىڭ 80 جىلدىق مەرەيتويلارى اياسىندا وتەدى. فەستيۆال العا قويعان ماقساتتارىن تولىق اتقارىپ كەلەدى. اتاپ ايتساق, وسى جىلدار ىشىندە اۋىلدارداعى مادەنيەت وشاقتارىنىڭ ماتەريالدىق-تەحنيكالىق جاعدايىنا جان كىرىپ, ەل اراسىنان تالانتتى جۇزدەگەن ونەرپازدار انىقتالدى. ءداستۇرلى ونەر دوداسىنىڭ ءار ماۋسىمىندا جۇرتشىلىققا بەيمالىم بولىپ كەلگەن 100-گە جۋىق جاڭا ەسىمدەردىڭ, ۇجىمداردىڭ تۇساۋى كەسىلەدى. فەستيۆالدىڭ باس جۇلدەسىنە جىل سايىن وبلىس اكىمى اۆتوكولىك سىيعا تارتىپ, جەڭىمپاز اۋدان-قالالارعا 17 اۆتوكولىكتىڭ كىلتى تابىستالعان. وسىلايشا مادەنيەت وشاقتارىنىڭ ماتەريالدىق-تەحنيكالىق بازاسىنىڭ نىعايۋىنا ۇلكەن ۇلەس قوسۋدا. ايتا كەتەتىن بولساق, 2007, 2009, 2011, 2013 جىلدارى جۇلدەگەرلەر كوشىن ماڭعىستاۋ اۋدانى باستاسا, 2006, 2010, 2013 جىلدارى تۇپقاراعان اۋدانى جەڭىمپاز اتانعان. وسى كوشتى 2010, 2012, 2017 جىلدارى جاڭاوزەن قالاسى جالعاستىرادى. ال مۇنايلى (2008 ج) مەن قاراقيا (2011 ج) اۋداندارى ۇزدىك دەپ تانىلسا, اقتاۋ قالاسى 2007, 2012 جىلدىڭ جۇلدەگەرلەرى اتانعان. ەلباسىنىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» باعدارلامالىق ماقالالارىندا كورسەتىلگەن تاپسىرمالاردى جۇزەگە اسىرۋ ماقساتىندا, سونداي-اق «جاستار جىلى», سۇگىر جىراۋ بەگەندىك ۇلىنىڭ 125 جىلدىعى, حالىق جازۋشى ءابىش كەكىلباي ۇلى مەن اقىن فاريزا وڭعارسىنوۆانىڭ 80 جىلدىق مەرەيتويلارى اياسىندا «ماڭعىستاۋ جۇلدىزدارى» ونەر فەستيۆالى بيىل XI رەت «جەتىستىككە جەتەلەيتىن جەتى قىر» دەگەن اتپەن ۇيىمداستىرىلىپ وتىر. فەستيۆالگە 15 جاستان جوعارى ءتۇرلى سالادا قىزمەت ەتەتىن, سونداي-اق ارناۋلى جانە ورتا وقۋ ورىندارىنداعى كوركەمونەرپازدار قاتىسا الادى. ءداستۇرلى تۇردە ءوتىپ كەلە جاتقان شارانىڭ ەڭ نەگىزگى ماقساتى – وسكەلەڭ ۇرپاقتى ونەرگە باۋلۋ, شىعارماشىلىق قابىلەتتەرىن دامىتىپ, جاس دارىنداردى انىقتاۋ. 9 اتالىم بويىنشا باقتارىن سىنايتىن ونەرپازداردىڭ ونەرىن كاسىبي مامانداردان ىرىكتەلگەن قازىلار القاسى سارالايتىن بولادى, دەدى ماڭعىستاۋ وبلىستىق مادەنيەت باسقارماسىنىڭ ءبولىم باسشىسى جەمىس ەرجىگىتوۆا.
فەستيۆالگە قاتىسۋ ءۇشىن شالعاي اۋىلدارداعى ونەرپازدار دا بەلسەندىلىك تانىتۋدا. اۋدانداردا ۆوكالدى اسپاپتار ءانسامبلى قايتا جاندانسا, ۇلت-اسپاپتار وركەسترى تۇراقتالعان. قازىرگى تاڭدا ت.جۇرگەنوۆ اتىنداعى ونەر ينستيتۋتىندا, قۇرمانعازى اتىنداعى ۇلتتىق كونسەرۆاتوريادا جانە باتىس قازاقستان وبلىسىنداعى م.وتەمىس ۇلى اتىنداعى ۋنيۆەرسيتەتىندە جەڭىپ العان گرانتتارى بويىنشا 25- كە تارتا جاس ءبىلىم الۋدا. حالىقتىڭ ءداستۇرىن, سالتىن, اۋەنىن, ماقامىن جوعالتپاي ەل مادەنيەتىنىڭ دامۋىنا ۇلەس قوسىپ كەلە جاتقان فەستيۆال جىل سايىن جوعارى دەڭگەيدە وتۋدە.
بيىلعى شارانىڭ باستى ەرەكشەلىگى – قاتىسۋشىلار, «كوركەمسوز وقۋ» اتالىمى بويىنشا ءا.كەكىلباي ۇلىنىڭ پروزالارى مەن ف.وڭعارسىنوۆانىڭ شىعارمالارىنان ءۇزىندى وقيتىن بولادى. بۇل دەگەنىمىز - ۇلى تۇلعالارىمىزدىڭ 80 جىلدىق مەرەيتويىنا وراي ۇيىمداستىرىلىپ, ولاردىڭ شىعارماشىلىعىن وسكەلەڭ ۇرپاققا ناسيحاتتاۋ بولىپ تابىلادى.
فەستيۆال جىل سايىن وبلىس ورتالىعى اقتاۋ قالاسىندا جەڭىمپازداردىڭ گالا كونتسەرتى جانە ماراپاتتاۋمەن قورىتىندىلانادى. ماڭعىستاۋ وبلىسى اكىمدىگىنىڭ قولداۋىمەن وتەتىن شارانىڭ باس جۇلدەسىنە وسى جولى دا اۆتوكولىك سىيعا بەرىلەتىن بولادى.
ماڭعىستاۋ وبلىسى
