جاقىندا ەلوردا تورىندە تۇساۋى كەسىلگەن «جىبەك ساتى» ءبىر اكتىلى وپەرا-فارسى ويىمىزدى دايەكتەي تۇسەدى. كارناۆال ستيلىندە قويىلعان قويىلىم تەاتر ءىشىنەن اشىلعان «PICCOLO» كامەرالىق تەاترىنىڭ تىرناقالدى جۇمىسى.
ءيا, ءوزىنىڭ تاريح بەتتەرىن 6 جىل بويى جازىپ كەلە جاتقان «استانا وپەرا» ءۇشىن بۇل ايتۋلى وقيعا. ويتكەنى تەاتردىڭ جەتەكشى سوليستەرىمەن قاتار, ءىرگەلى جوبادا جاس مامانداردىڭ دا شىعارماشىلىق مۇمكىندىگى مەن شەبەرلىگىن تانۋعا كەڭ جول اشىلعان. ياعني «PICCOLO» كامەرالىق تەاترى – ستۋدەنتتەر, تۇلەكتەر, جاس ۆوكاليستەردىڭ بەلگىلى وپەرا انشىلەرىمەن بىرگە ءوز شەبەرلىكتەرىن ارتتىرۋعا ارنالعان شىعارماشىلىق زەرتحاناسى ىسپەتتى.
انە, شىمىلدىق اشىلىپ, جايلى كامەرالىق اتموسفەرادا قويۋشى ديريجەر, قازاقستاننىڭ ەڭبەك سىڭىرگەن قايراتكەرى ابزال ءمۇحيتدينوۆتىڭ سۇيەمەلدەۋىمەن «استانا وپەرا» سيمفونيالىق وركەسترى ورىنداعان تاماشا مۋزىكا اياسىندا قىزىقتى وقيعا ورىن الا باستادى. ايگىلى يتاليالىق «دەل ارتە» كومەدياسى ستيلىندەگى تاڭعاجايىپ ماسكالارمەن ساحناعا شىققان ارتىستەردىڭ «جىبەك ساتى» اينالاسىندا ءوربيتىن كومەديالىق فارس جانرىنداعى شىتىرمان سيۋجەتتى شەبەر يگەرگەنى سونشالىق, كورەرمەن الدىنا شىققاننان ويناپ ەمەس, كەيىپكەر سەزىمىن قويىلىم ىشىندە بەينەبىر ءومىر ءسۇرىپ جۇرگەندەي شىنايى جەتكىزە ءبىلدى. وپەرا الەمىنىڭ جارىق جۇلدىزدارى سالتانات احمەتوۆا (دجۋليا), سۇندەت بايعوجين (دجەرمانو), ەۆگەني چاينيكوۆ (بلانزاك) باستاعان ۇزدىك سوليستەر جاس ءارتىستەرگە ناعىز شەبەرلىك مەكتەبىن كورسەتتى دەسەك, ءتىپتى دە ارتىق ايتقاندىق ەمەس. قويىلىم بويى ارتىستەر ءبىر ءسات تە تىنىم تاپپادى. ءان سالا ءجۇرىپ جۇگىرىپ, ەندى بىردە تىعىلىپ قالىپ, كۇتپەگەن ساتتەردە قايتا ورالىپ كورەرمەنىنە ونەردىڭ عالامات مەرەكەسىن تارتۋ ەتتى. ەڭ باستىسى, تىڭدارمانداردىڭ ءىشى پىسقان جوق. دارىندى جاس ورىنداۋشىلار مەن وپەرا ساحناسىنىڭ سۇرانىسقا يە شەبەرلەرى ءوز پارتيالارىنا نازىك ۆوكالدىق رەڭك بەرىپ قانا قويماي, ءبىر مەزەتتە ءتۇرلى ەموتسيالارىن ىم-يشارامەن, ويناقى كوزقاراسپەن جوعارى دەڭگەيدە ساراپتاي ءبىلدى. اسىرەسە قازاقستاننىڭ ەڭبەك سىڭىرگەن قايراتكەرلەرى, تەاتردىڭ جەتەكشى سوليستەرى سۇندەت بايعوجين مەن سالتانات احمەتوۆانىڭ اراسىنداعى جاستىق جالىنعا تولى تاماشا تاندەم زالعا جينالعان كورەرمەن كوڭىلىن بىردەن وزىنە باۋراپ الىپ, تىڭدارمانىن قويىلىم سوڭىنا دەيىن تاڭعالدىرۋدان تانبادى.
– مۋزىكاسى كوڭىلدى ءارى ويناقى بولعاندىقتان, سىرتتاي بۇل وپەرا جەڭىل قابىلدانۋى مۇمكىن. ايتسە دە ءارتىستەر ءۇشىن ۇلكەن شەبەرلىكتى تالاپ ەتەدى. «جىبەك ساتى» – ءارتىس شەبەرلىگىنىڭ بار ءمۇمكىندىگىن پاش ەتەتىن وپەرا. سوندىقتان دا «PICCOLO» كامەرالىق تەاترى ساحناسىنداعى العاشقى جۇمىسىمىزعا تىڭعىلىقتى دايىندىق, جان-جاقتى ءىزدەنىسپەن كەلدىك. سوڭىمىزدان ءوسىپ كەلە جاتقان جاس تالانتتارعا لايىقتى دەڭگەيدە ۇلگى بولا الساق, ماقساتىمىزدىڭ ورىندالعانى, – دەيدى قويىلىم سوڭىنان اسەرىمەن ءبولىسكەن دجەرمانو رولىندەگى سۇندەت بايعوجين.
راس, «جىبەك ساتى» وپەراسى شىمىلدىق اشىلعان ءساتتەن-اق سيۋجەتىنىڭ ويناقى دا جەڭىلدىگىمەن تىڭدارمان نازارىن ءبىردەن وزىنە بۇرىپ, كانىگى ۆەنەتسيالىق رومانتيكا لەبى ەسىپ تۇرعان عاجايىپ الەمگە جەتەلەي ءجونەلەدى. بۇعان ارينە يتاليادان ارنايى شاقىرىلعان ستسەنوگراف ءارى كوستيۋم سۋرەتشىسى مانانا گۋنيانىڭ سىڭىرگەن ەڭبەگى زور. سۋرەتشى كوستيۋمدەر مەن دەكوراتسيالاردى ۆەنەتسيالىق كارناۆال ستيلىندە, دالىرەك ايتقاندا, كەيىپكەرلەرى كاپيتان فراكاسس, دوكتور چۋما, ارلەكين ءار بەرگەن «دەل ارتە» كومەدياسى نەگىزىندە ورىنداعان.
– وپەراداعى وقيعالاردى ليبرەتتودا جازىلعانداي پاريجگە ەمەس, ۆەنەتسياعا اۋىستىردىق. «جىبەك ساتى» «سان-مويزە» تەاترىنا ارناپ شىعارىلىپ, ۆەنەتسيالىق كارناۆال مەرەكەلەرى كەزەڭىندە ورىندالۋى كەرەك بولاتىن. ادەتتە سپەكتاكلدى رومانتيزم, امپير نەمەسە مودەرن داۋىرىندە ۇسىنادى. ءبىزدىڭ كوستيۋمدەرىمىز كارناۆال ستيليستيكاسى مەن سول كەزەڭدەگى تاريحي تىگىس ۇلگىسىندە جاسالعان. دج.ءروسسينيدىڭ العاشقى يدەياسىنا ەتەنە جاقىن ۆەنەتسيالىق رۋحتى جەتكىزگىم كەلدى. بۇل قويىلىمدا كوستيۋمدەردىڭ سانى سونشالىقتى كوپ ەمەس, دەگەنمەن دە ولاردىڭ ءبارى وتە كۇردەلى ءارى دايىنداۋ مەرزىمى بويىنشا اۋقىمدى سپەكتاكلدەردى جاساۋمەن پارا-پار. ەڭ قاجىرلى جۇمىس بلانزاكتىڭ كوستيۋمىن جاساۋ بولدى, ول كاپيتان فراكاسستىڭ ءپىشىنىندە تىگىلدى, – دەيدى سۋرەتشى-ستسەنوگراف.
بۇل ەرەكشەلىكتى قويىلىم رەجيسسەرى اللا سيمونيشۆيلي (يتاليا) دە ءوز ساراپتاۋىندا ۇتىمدى توعىستىرىپ, ستسەنوگرافپەن ءساتتى تاندەم تۇزگەن. سۋرەتكەردىڭ سپەكتاكل گەوگرافياسىن كەرەمەت جاساعانى سونشالىق, ساحنانىڭ ءاربىر بۇرىشى جاندانىپ, ءتىپتى وقيعا ۆەنەتسيالىق الاڭدا ءوتىپ جاتقانداي اسەر سىيلادى.
كامەرالىق زالدى ەكى كۇن بويى ونەر دۋمانىنا اينالدىرعان پرەمەرا جاستار جىلى اياسىندا مادەنيەت جانە سپورت مينيسترلىگىنىڭ قولداۋىمەن اسا جوعارى دەڭگەيدە ءوتتى. تىڭدارماندار ارتىستەرگە ىستىق ىقىلاستارىن ءبىلدىرىپ, ۇزاعىنان قول سوعىپ, قوشەمەت كورسەتتى. وسىلايشا «PICCOLO» كامەرالىق تەاترى شىعارماشىلىق جوباسى اسقاق ونەردى باعالاۋشىلاردىڭ وڭ پىكىرىن الدى. دەمەك, بۇل – «جىبەك ساتىنى» ۇزاق تا باقىتتى ساحنالىق عۇمىر كۇتەدى دەگەن ءسوز. لايىم, سولاي بولعاي!
