زياتكەرلىك مەكتەپتە بالالاردى ناقتى عىلىم تۇرلەرىمەن اينالىسۋعا شاقىراتىن «عىلىم» تاقىرىبىنداعى ونكۇندىك ءوتتى. فيزيكا, حيميا, ماتەماتيكا, بيولوگيا ءپاندەرىنەن كۇن سايىن قىزىقتى زەرتتەۋ ساباقتارىن, شەبەرلىك ساعاتتار مەن بايقاۋلار ۇيىمداستىرىلۋدا. سونداي شارانىڭ ءبىرى – زىمىران قۇراستىرۋ شەبەرلىك ساباعىن فيزيكا كافەدراسىنىڭ ۇستازدارى وتكىزىپ, بالالارعا ەرەكشە كوڭىل كۇي سىيلادى. شەبەرلىك ساعاتىنا عارىش سالاسىنا ەرەكشە قىزىعاتىن وقۋشىلار جازىلدى. 15-كە جۋىق وقۋشى ءوز قولدارىمەن زىمىران جاساپ, ونى ۇشىرۋ مەحانيزمىمەن تانىستى.
– عارىشقا ۇشاتىن زىمىراندار تۋرالى ويلاعاندا, ونىڭ قالاي قۇراستىرىلاتىنىن, سونداي-اق جۇيەنىڭ قالاي جۇمىس ىستەيتىنىن ءبارىمىز بىلگىمىز كەلەدى. شەبەرلىك ساعاتى ءبىزدىڭ وسى ويىمىزدى جۇزەگە اسىرىپ, زىمىران قۇراستىرۋ سالاسىنداعى ءبىلىمىمىزدى كەڭەيتۋگە كومەكتەستى. شارانىڭ ەرەكشە تۇسى – مۇعالىمدەردىڭ زىمىراندى قولدا بار قاتتى قاعاز, پەنوپلاست, تۇربا, قالام, سىزعىش سەكىلدى زاتتاردان جاساۋعا بولاتىندىعىن كورسەتكەنى, – دەيدى ساباققا قاتىسقان دانا زاركۋم.
ايتا كەتۋ كەرەك, وقۋشىلار زىمىران قۇراستىرۋ جانە ۇشىرۋمەن العاش رەت اينالىسىپ وتىرعان جوق. ولار جىل سايىن زىمىراندى ۇشىرۋدىڭ ءارتۇرلى جولدارىن باقىلاپ كورىپ, ەكسپەريمەنت جۇرگىزەدى.
– بىلتىر سۋ قىسىمىنىڭ كومەگىمەن زىمىران ۇشىرۋعا تىرىستىق. بىراق ول كەزدە قۇرىلعىمىز ۇشپاپ ەدى. ال بيىل ءبىز ءبىرساتىلى ءتۇرىن جاساپ, ونى وق-ءدارى كومەگىمەن ۇشىرىپ كوردىك. ءبىر ءساتتە ءتورت زىمىران قاتار ۇشقانىن كورگەن دوستارىمىز قاتتى قۋاندى. بۇل قىزىعۋشىلىعىمىزدى ارتتىرا ءتۇستى, – دەيدى 10-سىنىپ وقۋشىسى ماعجان ۋتەەۆ.
جيىندا مۇعالىمدەرمەن بىرگە «عارىش. عىلىم. ينتەللەكت» تاقىرىبىندا قىزىلوردادا وتكەن ءىح ناۋرىز كەزدەسۋلەرى عىلىمي جوبالار بايقاۋىنا قاتىسقان وقۋشىلار بەلسەندىلىك تانىتىپ, وزگە دوستارىنا كومەك كورسەتتى.
– ءىح ناۋرىز كەزدەسۋلەرى بايقاۋى عارىش سالاسىنا بالالاردى باۋلۋعا ارنالعان ەڭ كەرەمەت جوبا دەر ەدىم. اتالعان سايىس ەلىمىزدىڭ تۇكپىر-تۇكپىرىنەن جينالعان ءبىز سەكىلدى جاستارعا زىمىران, تەلەسكوپ جاساۋدى ءۇيرەتكەن شەبەرلىك ساعاتتار وتكىزۋ, قازاقستاننىڭ عارىشكەرلەرىمەن كەزدەسۋ, NASA Spaceح سەكىلدى الىپ كومپانيالار ماماندارىنان ءدارىس الۋ مۇمكىندىگىن, عارىش استاناسى بايقوڭىردى كورۋ باقىتىن بۇيىرتقان ماڭىزدى شارا, – دەيدى 11-سىنىپ وقۋشىسى دينارا تىلەگەنوۆا.
– بۇل بالالاردى عارىش سالاسىن زەرتتەۋگە باعىتتايتىن ەرەكشە شارا دەپ ەسەپتەيمىن. وسى ارقىلى زىمىران جاساۋ بويىنشا حالىقارالىق كوسموناۆتيكا مەكتەبىنىڭ مۇعالىمدەرىمەن ءبىرگە شەبەرلىك ساعاتىن وتكىزۋگە قول جەتكىزدىم. بۇل كەرەمەت تاجىريبە بولدى, – دەيدى فيزيكا ءپانىنىڭ مۇعالىمى ەركىن ماكەنوۆ.
وقۋشىلارعا عانا ەمەس, ۇستازداردىڭ وزىنە ايرىقشا اسەر سىيلاعان جوبا جالعاسىن تاۋىپ, ىزدەنىس كوكجيەگى كەڭەيە تۇسەدى دەپ ويلايمىز.
ماڭعىستاۋ وبلىسى
