– وقۋ ورنى الدىنا تىڭ جوبالار مەن باستامالاردى قويىپ وتىر. ماقسات – جاستارعا جاڭاشا ءبىلىم بەرىپ, زامان تالابىنا ساي باسەكەگە قابىلەتتى ماماندار دايارلاۋعا قول جەتكىزۋ. بۇل باعىتتا ۋنيۆەرسيتەت باسشىلىعى ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىن باستى باعدار ەتىپ, ونى جۇزەگە اسىرۋ جولىندا جۇمىس جاساۋدا. سونداي-اق ەلباسى 2019 جىلعى جاستار جىلىندا جاستارعا كوڭىل ءبولىپ, قولداۋ كورسەتۋ قاجەتتىگىن تاپسىردى. دامىپ كەلە جاتقان ەلiمiزدiڭ بولاشاعى جاستاردىڭ ەڭبەكقورلىعىنا, تالاپ-تiلەگiنە, ارمان-مۇراتىنا بايلانىستى. ولار اتا-بابالارىمىزدان مۇرا بولىپ كەلە جاتقان قۇندىلىقتارىمىزدى, تاريحي ءداستۇرلەرiمiزدi جاڭعىرتىپ, قاتارىنا ۇلگى بولۋى مىندەتتى, دەيدى ۋنيۆەرسيتەت رەكتورى ب.احمەتوۆ.
وتكەن جىلدان بەرى ءوڭىر جاستارى بىرنەشە ستارتاپ جوبالارعا قاتىسۋ ارقىلى كاسىپكەرلىگىن باستاپ, تابىس اكەلۋدە. سونىڭ ءبىرى – «مەنىڭ ارمانىم» ۇلتتىق ستارتاپ جوبالار بايقاۋى. ۋنيۆەرسيتەتتە ۇيىمداستىرىلعان ىرىكتەۋ كەزەڭىندە 200-دەن استام يدەيالار تىركەلدى, ۇزدىك 42 جوبا جەرگىلىكتى كاسىپكەرلەرگە ءوز جوبالارىن قورعاپ, 30 جوبا شيرەك فينالعا, سونىڭ ىشىندە 8 جوبا جارتىلاي فينالعا قاتىسىپ, 5 جوبا فينالعا ءوتتى. جۋىردا وڭىردە وتكەن جاستار فورۋمىندا ۋنيۆەرسيتەت ستۋدەنتتەرى تانىستىرعان «اقىلدى تاياقشا» جوباسى قازىرگى تاڭدا وتە كەرەكتى الەۋمەتتىك جوبالاردىڭ ءبىرى رەتىندە باعالانۋدا.
ەلباسىنىڭ 5 الەۋمەتتىك باستاماسىن جۇزەگە اسىرۋ جانە جاستاردى الەۋمەتتىك قولداۋ ماقساتىندا ۋنيۆەرسيتەت بيىلعى جىلى 500 ورىندىق ستۋدەنتتىك جاتاقحانا, كەلەسى جىلى تاعى ءبىر 500 ورىندىق ستۋدەنتتىك جاتاقحانا سالۋدى جوسپارلاپ وتىر.
الدىنا بيىك جوسپارلاردى قويىپ وتىرعان ۋنيۆەرسيتەتتە امال مەرەكەسى قارساڭىندا تىڭ جاڭالىقتاردىڭ تۇساۋى كەسىلدى. «رۋحاني جاڭعىرۋ» باعدارلاماسى اياسىندا كاسىپكەرلىك ءبىلىم بەرۋ باعىتىندا كاسپي ءوڭىرى جاستارىنىڭ, جاڭا باستاۋشى كاسىپكەرلەردىڭ جانە وقىتۋشىلار قۇرامى اراسىندا يننوۆاتسيالىق جانە كاسىپكەرلىك الەۋەتىن ارتتىرۋ, كەلەشەكتە ستارتاپ يدەيالاردى تابىستى بيزنەسكە اينالدىرۋ ماقساتىندا «كاسپي» كاسىپكەرلىك ورتالىعى اشىلدى. بۇل ورتالىقتا ۋنيۆەرسيتەتكە وقۋعا كەلگەن ستۋدەنت ءوز ماماندىعى بويىنشا ءبىلىم الىپ قويماي, ءوز بيزنەسىن دامىتۋىنا مۇمكىندىك الادى. سونداي-اق حالىق شەجىرەشىسى, قازاق حالقىنىڭ, ونىڭ ىشىندە ماڭعىستاۋ قازاقتارى باستان كەشىرگەن تاريحي وقيعالاردىڭ ءىزىن زەردەلەگەن ولكەتانۋشى, ادايدىڭ رۋلىق گەنەالوگياسىن, شەجىرەسىن قاعاز بەتىنە تۇسىرگەن العاشقى اۆتوردىڭ ءبىرى الشىن مەنداليەۆ اتىنداعى جانە قوعام قايراتكەرى, كوپ جىلدار اۋىل شارۋاشىلىعى سالاسىندا باسشىلىق قىزمەت اتقارعان, «پاراسات» قوزعالىسىنىڭ جەتەكشىسى, «حالىقتىق كەلىسىم» قب ءبىرىنشى توراعاسى بولعان جازدىرحان سەيداليەۆ اتىنداعى اۋديتوريالار ستۋدەنتتەر يگىلىگىنە ۇسىنىلدى.
