كەزدەسۋ بارىسىندا كوپبالالى انالار مەملەكەتتىك قوردان تۇرعىن ءۇي بەرۋدى جەدەلدەتۋدى سۇرادى.
قالا اكىمىنىڭ ورىنباسارى تۇرعىن ءۇي كەزەگىندە 45 مىڭ ادامنىڭ تۇرعانىن اتاپ ءوتتى: مۇگەدەكتەر, سوعىس ارداگەرلەرى, ينتەرناتسيوناليست-جاۋىنگەرلەر, جەتىم بالالار, چەرنوبىل اپاتىنىڭ قاتىسۋشىلارى مەن مۇگەدەكتەرى جانە كوپبالالى وتباسىلار. بۇل رەتتە تۇرعىن ءۇي كەزەگىندە 2969 كوپبالالى وتباسى تىركەلگەن.
سونىمەن قاتار, ول كەزەكتە تۇرعاندارعا مەملەكەتتىك قوردان بەرىلەتىن پاتەرلەر جالعا بەرۋ شارتىمەن بەرىلەتىنىن اتاپ ءوتتى.
«قازاقستاندا 4 جانە ودان دا كوپ بالاسى بار 340 مىڭعا جۋىق كوپبالالى وتباسى بار. ولاردىڭ ىشىندە رەسمي كەزەكتە تۇرعىن ۇيگە مۇقتاج رەتىندە 31725 مىڭ وتباسى تۇر. ولار ءۇشىن سوڭعى باستامالار شەڭبەرىندە الداعى 7 جىلدا 40 مىڭ شارشى مەتردەن استام جالعا بەرىلەتىن تۇرعىن ءۇي سالۋدى جوسپارلاپ وتىرمىز.
كوپبالالى وتباسىلارعا تۇرعىن ءۇي بەرۋدى جەدەلدەتۋ ءۇشىن بەلگىلەنگەن تالاپتارعا جاۋاپ بەرەتىن دايىن تۇرعىن ءۇي ساتىپ الۋ سياقتى ءادىس جوسپارلانىپ وتىر. مامىر ايىندا رەسپۋبليكا بويىنشا العاشقى پاتەرلەر بەرىلەتىن بولادى», – دەپ مالىمدەدى قر يدم قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ وكىلى سارا قۇرمانعوجينا. كوپبالالى وتباسىلار جوسپارلانعان جالعا بەرىلەتىن پاتەرلەردى جالعا الۋشىلاردىڭ مەنشىگىنە بەرۋ مۇمكىندىگى ماسەلەسىن كوتەردى.
«مۇنداي مۇمكىندىك قاراستىرىلعان. قالاداعى جالعا بەرىلەتىن پاتەرلەردىڭ ءبىر بولىگى كەيىننەن ساتىپ الۋ قۇقىعىمەن جالعا بەرىلەتىن بولادى», – دەپ جاۋاپ بەردى سارا قۇرمانعوجينا.
«ەلباسى ءاربىر كوپبالالى وتباسى ءۇشىن جىلدىق 2 پايىز جەڭىلدىكتى يپوتەكالىق نەسيە بەرۋدى تاپسىردى. ۇكىمەتتە جەڭىلدەتىلگەن يپوتەكا بەرۋ ەرەجەلەرى ازىرلەنگەننەن كەيىن, اكىمدىك جەرگىلىكتى اتقارۋشى ورگان رەتىندە ولاردى ءىس جۇزىندە جۇزەگە اسىراتىن بولادى», – دەدى نۇركەنوۆ.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ مالىمەتتەرىنە سايكەس, تۇرعىن ءۇي بەرۋ باعدارلاماسى بويىنشا كوپبالالى ادامدارعا 2 پايىز باستاپقى جارنا كەمىندە 10 پايىزدى قۇرايدى.
«پاتەر قۇنى 15 ميلليون تەڭگە بولسا, تۇرعىن ءۇي قۇرىلىس جيناق بانكىنىڭ شامامەن ەسەپتەۋى بويىنشا وتباسىنا قاجەتتى تابىس 104250 تەڭگەنى قۇراۋى ءتيىس. بۇل رەتتە ءسىز ءوزىڭىزدىڭ ماتەريالدىق جاعدايىڭىزدى جاقسارتىپ, نەسيەلىك باسپانادان ءۇمىتتى بولا الاسىز», – دەدى سارا قۇرمانعوجينا.
ول تاۋەلسىزدىك العاننان بەرى قازاقستاندا تۇرعىن ءۇي قۇرىلىسى بويىنشا 8 باعدارلاما قابىلدانعانىن اتاپ ءوتتى. وسى ۋاقىت ىشىندە 1,3 ملن ازامات تۇرعىن ءۇي جاعدايىن جاقسارتتى. ال وتكەن جىلى 113 مىڭنان استام تۇرعىن ءۇي پايدالانۋعا بەرىلدى.
