ءساۋىردىڭ سىركىرەگەن جاڭبىرى استىندا تابيعات مىنەزىن تىپتەن دە توسىرقاماعان قاۋىم جاسالعان بۇل قۇرمەتكە ريزاشىلىقپەن قول سوقتى. سونىمەن ءنادىر بيعازيەۆ كىم؟
وعان يگىلىكتى شارانى اشىپ تۇرعىنداردان ءسۇيىنشى سۇراعان الماتى قالاسى اكىمىنىڭ كەڭەسشىسى ماماي احەتتىڭ سويلەگەن سوزىنەن جاۋاپ ىزدەپ كورەيىك. «عىلىم مەن مادەنيەتتىڭ, ونەردىڭ ورتاسىنا اينالعان ارۋ الماتىمىزدا حالقىمىزعا ەڭبەگى سىڭگەن نەبىر تۇلعالاردىڭ ەسىمدەرى قۇرمەتپەن اتالىپ تۇراتىن يگى ءداستۇر بار, – دەدى بەلگىلى عالىم-كەڭەسشى. –بۇگىنگى سالتاناتتىڭ ءبىر ەرەكشەلىگى سول – اۋىلدا ءوسىپ, اۋىل شارۋاشىلىعىن وركەندەتىپ, اۋىلدىڭ جايىن كۇيتتەگەن اردا ازماتىمىزعا سول كەزدەگى استانامىز الماتىدان نەلىكتەن سونشاما قۇرمەت كورسەتىلدى ەكەن دەيسىز؟ شىنتۋايتىندا ناعىز ەڭبەك مايتالماندارىنا كەشە دە, بۇگىندە دە لايىقتى كوڭىل ءبولىنىپ ءىليپات كورسەتىلگەن, كورسەتىلىپ كەلەدى دە. ەندەشە, كىل ونەر مەن مادەنيەتتىڭ, عىلىمنىڭ مارقاسقالارى قاتارىنرا ول كەزدەگى استانامىز الماتىدان سول كەزدە اۋىل ادامىنا ءۇش بولمەلى ءۇيدىڭ تەگىن بەرىلۋى تەكتەن تەك ەمەس, ۇلى ەڭبەكتىڭ وتەۋى دەپ ۇعىنۋمىز كەرەك.
قۇرىعى قۇتتى جىلقىشىنىڭ ۇلى, اۋىل شارۋاشىلىعى عىلىمدارىنىڭ دوكتورى نۇرعالي بيعازيەۆ قالا اكىمى كەڭەسشىسىنىڭ ساليقالى ءسوزىن بىلاي ساباقتاستىردى.
– 80-ءشى جىلداردىڭ باسىندا ەل ارالاۋعا شىققان قازاقستان باسشىسى دىنمۇحامەد قوناەۆ اتاقتى «لۋگوۆوي» اسىل تۇقىمدى جىلقى زاۋىتىنا ات باسىن ىركەدى. اۋىل ەڭبەكشىلەرىمەن جىلى شىرايلى كەزدەسۋ بارىسىندا ديمەكەڭ اكەمىزدىڭ ەڭبەك كورسەتكىشىنە قاتتى ءسۇيسىنىپ باس شايقاعانى بار ەكەن. سوندا, «اينالايىن ءنادىر, وركەنىڭ ءوسسىن ماڭداي تەرىڭ اقتالسىن, ءوزىڭ تۇرماساڭ دا ءوسىپ كەلە جاتقان شيەتتەي بالا-شاعاڭ بار ەكەن, كادەڭە جاراتارسىڭ,» – دەپ ەسەنتاي وزەنىنىڭ جاعاسىنان وسى ءۇش بولمەلى ءۇيدى تۇپپا-تۋرا سىيعا تارتقان. اعايىندى ون بالانىڭ دەنى وسى ۇيدە وستىك-وندىك. يگى ىسكە تىكەلەي قولداۋ كورسەتىپ, قامقور بولعان قالا باسشىلىعىنا مىڭ دا ءبىر راحمەت. بۇگىن, مىنە, اكەمىزدىڭ رۋحى, ەل قامىن جەگەن ابىز اعالارىمىزدىڭ قۇرمەتى ءۇشىن جاسالىنىپ جاتقان ۇلكەن تاريحي وقيعاعا بارشاڭىز كۋا بولدىڭىزدار.
–ەلىمىز ەتەك-جەڭىن جيناپ, تاۋەلسىزدىك تۋىن كوتەرگەن تۇستا ءنادىر اعامىز بيلىك ورىندارىنا ءوتىنىش جاساپ اۋلىمىزدا العاشقى مەشىتكە ورىن تاۋىپ, ونىڭ العاشقى تاسىن ءوز قولىمەن قالاپ ەدى, – دەدى كوكدەنە اۋلىنىڭ يمامى قايرات قاجى. اۋىلدا دا, استانادا دا ايشىقتى ءىزى سايراپ قالعان سوتسياليستىك ەڭبەك ەرىنىڭ, كسرو كومپارتياسى ءححۇى سەزىنىڭ دەلەگاتى داڭقتى جىلقىشىنىڭ ەل يگىلىگى ءۇشىن ەتكەن ەرەن ەڭبەگى تۋرالى سالتانات بارىسىندا قازاقستان رەسپۋبليكاسىنىڭ مادەنيەت قايراتكەرى قىدىرالى قويتاي, قر ىشكى ىستەر سالاسىنىڭ ارداگەرى, پولكوۆنيك ساتىمبەك رىسپاەۆ جانە باسقا دا ازاماتتار قىزىقتى ەستەلىك-ويلارىن ورتاعا سالدى. بەلگىلى ايتىس اقىنى سەرىك قالي جىردان شۋماق شاشتى.
تاريحقا باي مىڭجىلدىق جاسى بار الماتىنىڭ مۇراعاتى بۇگىن تاعى ءبىر ايتارلىقتاي قۇندى دەرەكپەن, قۇجاتپەن, وقيعامەن تولىقتى.
