«تۇركى تىلدەس حالىقتاردىڭ ورتاق رۋحاني قۇندىلىعى مەن قۇقىقتىق ءداستۇرىنىڭ قازىرگى قوعاممەن ساباقتاستىعى» اتتى حالىقارالىق كونفەرەنتسياعا جوعارعى سوتتىڭ سۋدياسى باعلان ماقۇلبەكوۆ, ءازىربايجان رەسپۋبليكاسىنىڭ جوعارعى سوتىنىڭ سۋدياسى اسكەروۆ گۋربەت اگا وگلى, ماڭعىستاۋ وبلىستىق سوتىنىڭ توراعاسى ەرجان داۋليەۆ, ماڭعىستاۋ وبلىسى اكىمىنىڭ ورىنباسارى رۋسلان ساكەەۆ, تۇركيانىڭ گازي ۋنيۆەرسيتەتىنىڭ پروفەسسورى ەردوعان يحسان, تاتارستان رەسپۋبليكاسى قازان فەدەرالدىق ۋنيۆەرسيتەتىنىڭ زاڭ عىلىمدارىنىڭ كانديداتى, دوتسەنت دەمەەۆا اينۇر, زاڭ عىلىمدارىنىڭ دوكتورلارى قىرعىزستان رەسپۋبليكاسىنان پروفەسسور تابالديەۆا ۆەنەرا, ءازىربايجان رەسپۋبليكاسىنان سافاروۆ ازەر, سونىمەن قاتار, رەسپۋبليكا سۋديالارى, ۋنيۆەرسيتەتتىڭ وقىتۋشىلار قۇرامى مەن جاس عالىمدار قاتىستى.
حالىقارالىق كونفەرەنتسيانى ەرجان داۋليەۆ قۇتتىقتاۋ سوزىمەن اشىپ, كونفەرەنتسيا ءوتىپ وتىرعان قازاقستان حالىقتار اسسامبلەياسىنىڭ كەڭ عيماراتىندا بىلتىر كاسپي ماڭىنداعى 5 مەملەكەتتىڭ پرەزيدەنتتەرى بەسىنشى سامميتتە باس قوسىپ, ماڭىزدى ماسەلەلەر تالقىلاعانىن, ال بۇگىن الىس-جاقىن شەت ەلدەردىڭ عالىم-پروفەسسورلارى مەن زاڭگەرلەرى تۇركى تىلدەس حالىقتاردىڭ ورتاق قۇقىقتىق ءداستۇرىن بولىسۋگە جينالىپ وتىرعانىن اتاپ ءوتتى.
سوت توراعاسى كونفەرەنتسيا باعدارلاماسىمەن جانە قاتىسۋشىلارمەن تانىستىردى. كونفەرەنتسيانىڭ ءى سەسسياسىندا ءسوز سويلەگەن باعلان ماقۇلبەكوۆ ەلىمىزدەگى تاريحي قۇندىلىقتاردىڭ يگىلىگى تۋرالى بايانداسا, اسكەروۆ گۋربەت اگا وگلى ءازىربايجان رەسپۋبليكاسىنداعى سوت-قۇقىق رەفورمالارىن باياندادى.
كونفەرەنتسيا بارىسىندا شەتەلدەن كەلگەن عالىم-پروفەسسورلار تۇرىك ازاماتتىق قۇقىعىنىڭ سىرتقى بەينەسى: قولدانىلۋ اياسى مەن نەگىزگى قاعيدالارى, ازاماتتىق قۇقىقتىڭ ونەگەلىك باستاۋلارى, اۆتورلىق قۇقىقتاردى قۇقىقتىق قورعاۋ سالاسىنداعى ءازىربايجان رەسپۋبليكاسىنىڭ زاڭنامالار جۇيەسى, قىرعىزستان رەسپۋبليكاسىنىڭ قازىرگى قۇقىقتىق جۇيەسىندەگى رۋحاني قۇندىلىقتاردىڭ ورنى تۋرالى باياندامالار وقىدى.
سونداي-اق, قازاق ادەت قۇقىعى بويىنشا ءسوز تەڭدىگىنىڭ قۇقىقتىق قۇندىلىق رەتىندە جۇزەگە اسۋ مەحانيزمدەرى, وتباسى قۇندىلىقتارىنىڭ قازىرگى زاڭنامادان كورىنىس تابۋى, دالا بيلەرىنىڭ بىتىمگەرلىك راسىمدەرى مەن تۇركى حالىقتارىنا ورتاق تاتۋلاستىرۋ ادىستەرىنىڭ ساباقتاستىعى, قازىرگى تاڭدا قۇقىقتىق مادەنيەتتى دامىتۋ ماسەلەلەرى تۋرالى باياندامالار تىڭدالدى, ورتاعا سالىندى.
بايانداماشىلار ءتۇرلى جاڭاشىلدىقتارمەن ءبولىسىپ, تۇركى حالىقتارىنا ورتاق سوت پراكتيكالارىنا ەرەكشە قىزىعۋشىلىق تانىتتى.
- قاتىسۋشىلار ەۋرازيانىڭ كىندىگىندە ورنالاسقان قازاقستاننىڭ – تۇركى حالىقتارىنىڭ قارا شاڭىراعىنا اينالعانىن ايتىپ, حالىقتار اراسىنداعى ورتاق ماسەلەلەردى تالقىلاۋ دوستىق قارىم-قاتىناستى نىعايتا تۇسەتىنىن اتاپ ايتتى. كونفەرەنتسيا قورىتىندىسى بويىنشا تۇركىتىلدەس حالىقتارعا ورتاق قۇقىق جۇيەسىن جانداندىرۋ ماسەلەلەرى تۋرالى شەشىم قابىلداندى. جيىندا تىڭدالعان ۇزدىك باياندامالار مەن عىلىمي جۇمىستار ارنايى جيناق بولىپ باسىلاتىن بولدى, دەيدى ماڭعىستاۋ وبلىستىق سوتىنىڭ ءباسپاسوز حاتشىسى گاۋحار نۇرحان.
قوناقتار ماڭعىستاۋدىڭ تاريحي-ولكەتانۋ مۇراجايىن ارالاپ, ءوڭىردىڭ ادەبي-تانىمدىق مۇرالارىمەن, ەسكەرتكىشتەرىمەن تانىستى.
ءىس-شارا سوڭىندا قاتىسۋشىلاردىڭ بارلىعىنا «360 اۋليەلى ماڭعىستاۋ» اتتى ەنتسيكلوپەديالىق كىتاپ پەن سەرتيفيكاتتار تابىستالدى.
ماڭعىستاۋ وبلىسى
