2018 جىلى بىشكەكتە ۇيىمداستىرىلعان قۇرلىق دوداسىندا گرەك-ريم كۇرەسىنەن قازاقستان قۇراماسى 2 التىن, 1 كۇمىس جانە 4 قولا مەدالمەن جالپى ەسەپتە ەكىنشى ورىنعا تابان تىرەگەن بولاتىن.
الايدا, UWW (بىرىككەن كۇرەس الەمى) 97 كەلىدە بەلدەسىپ, چەمپيون اتانعان يراندىق مۇستافا سالەحيزادەنى دوپينگ قابىلداعانى ءۇشىن جارىستان شەتتەتىپ, التىن مەدالدى قايتارىپ الدى. وسىلايشا, چەمپيونات التىنى وزبەكستاندىق رۋستام اقساقالوۆقا بەرىلىپ, قولا جۇلدەگەر اتانعان قازاقستاندىق ەرۇلان ىسقاقوۆ ەكىنشى ورىنعا كوتەرىلدى.
«كۇمىس مەدال رەسمي تۇردە قولىما ءالى تيگەن جوق. بىراق فەدەراتسيا ارقىلى UWW (بىرىككەن كۇرەس الەمى) رەسمي حات جىبەرگەنىن ءبىلدىم. بۇل مەنىڭ ازيا چەمپيوناتتارىندا جەڭىپ العان ءتورتىنشى جۇلدەم. 2014 جىلى چەمپيون اتانسام, قالعان ءۇش جارىستا كۇمىس پەن قولانى ەنشىلەگەن ەدىم. شىنىمدى ايتسام, قولانىڭ كۇمىسكە اينالعانىنا ايتارلىقتاي قۋانعان جوقپىن. ويتكەنى, 2017 جانە 2018 جىلعى ازيا چەمپيوناتتارىندا تاپ وسى يراندىق بالۋاننان جەڭىلگەن ەدىم. كۇرەس كەزىندە ونىڭ استە شارشامايتىنىن بايقادىم. كەيىن ءبىر جىلداي ۋاقىت ونى رەسمي جارىستاردان كەزدەستىرمەدىك. مىنە, بۇگىندە ونىڭ دوپينگ ارقىلى جەڭىسكە جەتكەنىنەن حاباردار بولىپ وتىرمىز. ەگەر ول دوپينگ قابىلداماعاندا, مەنىڭ ونى جەڭىپ, فينالعا شىعاتىن مۇمكىندىگىم بار ەدى. سپورتتا تىيىم سالىنعان زاتتاردى قولدانۋ كوپتەگەن بالۋاننىڭ جولىن كەسەدى», - دەيدى ەرۇلان ىسقاقوۆ.
وسىلايشا, قازاقستان كومانداسى 2018 جىلعى ازيا چەمپيوناتىندا جالپى ەسەپتە ءبىرىنشى ورىن يەلەنىپ وتىر. ەكىنشى ورىندا قىرعىزستان, ءۇشىنشى ورىندا وزبەكسان كوماندالارى ورنالاسقان.
