كىمگە مارافونعا قاتىسۋعا بولمايدى
«الماتى مارافونى» - بۇل قانداي دا ءبىر فيزيكالىق كۇشتى قاجەت ەتەتىن سپورتتىق ءىس-شارا. اۋەسقوي سپورتشىلار كەشەندى تەكسەرىستەن ءوتىپ, جىلىنا ەكى مارتە اناليز تاپسىرۋى قاجەت. ال, جۇگىرۋ جارىسىنا بىرنەشە كۇن قالعاندا دارىگەردەن كەڭەس الۋدى ۇمىتساڭىز, ءالى دە كەش ەمەس! تەراپەۆت, كارديولوگقا بارىپ, جالپى قان ءاناليزىن تاپسىرىپ, گليۋكوزا دەڭگەيىن تەكسەرتىڭىز! جۇگىرۋ كەزىندە جۇرەككە قىسىم كورسەتۋ, جۇرەك اقاۋى بار ادامداردىڭ دەنساۋلىعىنا كەرى اسەرىن تيگىزۋى مۇمكىن. ال, قانت دەڭگەيى مولشەردەن جوعارى بولسا, مارافون جارىسىنا قاتىسۋعا مۇلدەم تىيىم سالىنىپ, ارنايى جەكە جاتتىعۋلار بەرىلەدى. سول سەبەپتى دارىگەرگە قارالۋ – مىندەتتى شارت. سونىمەن قاتار, دارىگەر وسى سپورت تۇرىنە قارسى كورسەتىلىم بەرۋى مۇمكىن.
«جۇگىرۋ جۇرەك-قان تامىرلار اۋرۋلارى بار, اياق بۋىندارىنىڭ دەگەنەراتيۆتى جانە اسقىنعان وزگەرىستەرى, سوڭعى ايلارداعى جۇكتىلىك, سونداي-اق وستەوپوروزعا شالدىققان 60 جاستان اسقان ادامدار مەن وپەراتسيادان كەيىنگى كەزەڭدەگى ناۋقاستارعا قارسى كورسەتىلگەن. دەگەنمەن, فيزيكالىق بەلسەندىلىكتى شەكتەۋ – شەشىم ەمەس. مۇمكىندىگىنشە ءوز كەستەڭىزگە دەنە جاتتىعۋلارىن قوسىپ, سكانديناۆيالىق جۇرىسپەن اينالىسىڭىز نەمەسە جاياۋ ۇزاق ۋاقىت بويى سەرۋەندەۋگە كوڭىل ءبولىڭىز. جاراقات العان جاعدايدا نەمەسە اۋرۋ كەزىندە جۇگىرۋ جارىسىنا قاتىسپاي, جانكۇيەر رەتىندە كەلگەن ءجون», - دەيدى فلەبولوگ-دارىگەر جانە انگيوحيرۋرگ, ەۋروپانىڭ انگيولوگتار قوعامىنىڭ مۇشەسى ءاليا باقىتجانقىزى جۇماتاەۆا.
مارافون كەزىندە قالاي تاماقتانۋ كەرەك
تاماقتانۋ — جارىسقا دايىندىقتىڭ ماڭىزدى شارتتارىنىڭ ءبىرى. مارافون قارساڭىندا دارىگەرلەر مايلى, كەپتىرىلگەن, تۇزدى, اششى جانە ءتاتتى تاعامداردان باس تارتۋعا كەڭەس بەرەدى. جارىس قارساڭىندا جاڭا, ءسىز بىلمەيتىن تاعامداردان باس تارتقان دۇرىس. ءار تاعامعا اعزانىڭ قالاي جاۋاپ بەرەتىنى بەلگىسىز. مارافونعا ءبىر اپتا قالعاندا اقۋىز بەن مايلاردى جەۋدى توقتاتىڭىز. باياۋ كومىرسۋلارى بار تاعامدارعا تاڭداۋ جاساڭىز. ولار جۇگىرۋ كەزىندە اعزاعا قاجەتتى ەنەرگەتيكالىق قور بەرەدى. قاتتى سۇرىپتى بيدايدان جاسالعان سپاگەتتي جەپ, سورە قارساڭىندا وزىڭىزگە پاستا-پاتي ۇيىمداستىرىڭىز.
مارافون كۇنى سورەگە 3 ساعات قالعاندا كومىرسۋلاردى قابىلداپ, سوڭعى استى جارىسقا 1,5-2 ساعات قالعاندا جەگەن دۇرىس. جۇگىرۋ الدىندا شولدەسەڭىز, 1 نەمەسە 2 ستاقان سۋ ىشكەن ءجون.
ءوز اعزاڭىز بەن دەنساۋلىعىڭىزعا كوڭىل ءبولىڭىز
سورە كەزىندە بىردەن قاتتى جۇگىرە باستاماي, جىلدامدىقتى بىرتىندەپ جوعارىلاتقان دۇرىس. ايتپەسە قاشىقتىق ورتاسىندا جۇگىرۋدى ارى قاراي جالعاستىرۋ قيىن بولادى. ءوز كۇشىڭىز بەن مۇمكىندىگىڭىزدى تەڭ پايدالانىڭىز.
«ەگەر شارشاعاندىقتى سەزىنسەڭىز, جۇگىرۋ تەمپىن باياۋلاتىڭىز. ال اياق ءسىڭىرىنىڭ ءتۇيىرىلۋى, بۇلشىقەت قۇرىسۋى, اياق باسۋىڭىز قيىنداسا, باياۋ جۇرىسكە اۋىسقانىڭىز ءجون. وتىرۋعا مۇلدەم بولمايدى – بۇل اعزانى شوكقا اكەلۋى مۇمكىن. تىپتەن مارەدەن كەيىن دە ءجۇرۋدى توقتاتپاڭىز, بىردەن توقتاۋعا بولمايدى», - دەيدى كارديولوگ دارىگەر, مەديتسينا عىلىمنىڭ كانديداتى شاتەكوۆا ساۋلە جارىلعاسىنقىزى.
جۇگىرۋ تەحنيكاسىن ۇمىتپاي, قاۋىپسىزدىك شارالارىنا بەي-جاي قاراماڭىز. جۇگىرۋ كەزىندە قۇلاققاپتى قولدانباعان ءجون, سەبەبى وزگە قاتىسۋشىلار مەن ۇيىمداستىرۋشىلاردىڭ ەسكەرتۋىن ەستىمەي قالۋىڭىز مۇمكىن.
باستىسى ءوزىڭىزدى جاقسى سەزىنۋىڭىز قاجەت. ءوز دەنساۋلىعىڭىز بەن دەنەڭىزگە مۇقيات كوڭىل ءبولىپ, شامادان تىس تىرىسپاڭىز. الدىمەن ءسىز ءوزىڭىز ءۇشىن, ال ەكىنشى كەزەكتە مارەگە ءبىرىنشى بولىپ كەلۋ ءۇشىن جۇگىرەسىز.
