بۇگىن اكىم باقىت سۇلتانوۆ جول-كولىك اپاتىنان زارداپ شەككەندەرگە شۇعىل مەديتسينالىق كومەك كورسەتۋگە قاتىسقان مەديتسينا قىزمەتكەرلەرىمەن كەزدەستى.
كەزدەسۋدى اشقان قالا اكىمى جەرگىلىكتى دارىگەرلەر اپات, ءورت جانە باسقا دا جازاتايىم وقيعالار كەزىندە مىڭداعان ادام ءومىرىن قۇتقارعانىن ەسكە الدى. جىل باسىنان جەدەل جاردەم قىزمەتى 155 مىڭنان استام قوڭىراۋدى قابىلداپ, قىزمەت كورسەتكەن.
«مەديتسينا قىزمەتكەرلەرى 26 ناۋرىزدا بولعان اپاتتا كاسىپقويلىق پەن جەدەلدىكتىڭ جوعارى دەڭگەيىن كورسەتتى. قايعىلى وقيعا ورنىنا ءتورت مينۋت ىشىندە جەدەل جاردەم بريگاداسى كەلىپ, زارداپ شەككەندەرگە العاشقى كومەك كورسەتىپ, اۋرۋحانالارعا جەتكىزدى. جەدەل جاردەم قىزمەتكەرلەرى مەن قالالىق اۋرۋحانالاردىڭ شەبەر جانە كاسىبي ارەكەتتەرىنىڭ ارقاسىندا ءبىز كوپتەگەن ادامداردىڭ ءومىرىن ساقتاپ قالدىق», – دەدى باقىت سۇلتانوۆ.
وقيعا ورنىندا بارلىعى 15 جەدەل جاردەم بريگاداسى جۇمىس ىستەدى.
«سول قايعىلى كۇنى ءبىزدىڭ ەلىمىزدىڭ ءاربىر ازاماتى بىرەۋدىڭ قايعىسىنا ورتاقتاسا الاتىنىن, وعان بەي-جاي قارامايتىنىن كورسەتتى. ءوز ومىرىنە قاۋىپ تونگەندىگىنە قاراماستان, ولار ادامداردى اۆتوبۋستاردان الىپ شىعۋعا كومەكتەستى. ولاردىڭ ءبىرى – №303 باعداردىڭ جۇرگىزۋشىسى باقداۋلەت الىبەك. ول وقيعا ورنىنا جاقىن جەردە بولعان», – دەپ اتاپ ءوتتى ب. سۇلتانوۆ.
اكىم دارىگەرلەرگە, مەدبيكەلەرگە, بارلىق ازاماتتارعا كەز-كەلگەن ۋاقىتتا كومەك قولىن سوزۋعا جانە ەموتسيونالدى قولداۋ كورسەتۋگە دايىن ەكەندىگىنە ۇلكەن ريزاشىلىعىن ءبىلدىردى.
كەزدەسۋ سوڭىندا باقىت سۇلتانوۆ 14 دەنساۋلىق ساقتاۋ قىزمەتكەرىنە, سونداي-اق, زارداپ شەككەندەردى قۇتقارۋعا كومەكتەسكەن جۇرگىزۋشىگە العىس حاتتار تابىس ەتتى.
ەسكە سالا كەتەيىك, 26 ناۋرىزدا ۇلى-دالا كوشەسى مەن قابانباي باتىر داڭعىلىنىڭ قيىلىسىندا ءۇش اۆتوبۋس پەن بىرنەشە جەڭىل اۆتوكولىكتەردىڭ قاتىسۋىمەن ۇلكەن جول كولىك وقيعاسى ورىن العان بولاتىن. اپات سالدارىنان ەكى ادام قازا بولىپ, 29 ادام جاراقات الدى.
