وليمپيادالىق سپورت تۇرلەرى بويىنشا ۇلتتىق قۇراما باپكەرلەرىمەن وتكەن كەزدەسۋگە قازاقستان ۇلتتىق وليمپيادالىق كوميتەتىنىڭ پرەزيدەنتى تيمۋر ق ۇلىباەۆ پەن مادەنيەت جانە سپورت ءمينيسترى ارىستانبەك مۇحامەدي ۇلى جەتەكشىلىك ەتتى.
تورتجىلدىق دوداسىنىڭ باستالۋىنا ءبىر جىلدان اسا ۋاقىت قالدى. بۇگىنگى تاڭدا سپورتشىلاردىڭ الدىندا توكيو ويىندارىنا جولداما الۋ مىندەتى تۇر. جيىن بارىسىندا بوكس, دزيۋدو, سەمسەرلەسۋ, تاەكۆوندو, كۇرەس تۇرلەرى, نىسانا كوزدەۋ, سۋ دوبى, ۆەلوسپورت پەن اۋىر اتلەتيكادان باس باپكەرلەردىڭ ەسەبى تىڭدالدى. وزگە دە وليمپيادالىق سپورت تۇرلەرىندەگى باس باپكەرلەر كوماندامەن بىرگە جارىستا جۇرگەندىكتەن, ولاردىڭ ەسەبىن مامىردىڭ اياعىنا دەيىن تىڭداۋ جوسپارلانىپ وتىر.
«توكيو-2020 وليمپيادا ويىندارىنا دايىندىقتى تالقىلاۋ ءۇشىن بۇگىنگى جيىندى ۇيىمداستىرعان ۇلتتىق وليمپيادالىق كوميتەتكە العىس بىلدىرەمىز. مينيسترلىك, ۇوك جانە فەدەراتسيالار بىرلەسە وتىرىپ, قازاقستاندىق سپورتشىلاردىڭ وليمپياداعا ىرىكتەۋ كەزەڭىنەن ءساتتى وتۋىنە جاعداي جاساۋىمىز قاجەت. سونداي-اق, ولاردىڭ ساپالى تۇردە دايىندالۋىنا كۇش سالۋىمىز كەرەك», - دەدى مينيستر.
جيىن بارىسىندا باپكەرلەر بارلىق كوماندالاردىڭ قاجەتتى ماتەريالدىق-تەحنيكالىق بازامەن جابدىقتالعانىن, كادر ماسەلەسى مەن مەديتسينالىق جابدىقتاۋ تۇرعىسىنداعى قيىندىقتاردىڭ شەشىلگەنىن اتاپ ءوتتى. قازاقستان ۇوك پرەزيدەنتى كەشەندى-عىلىمي توپتاردىڭ ماسەلەسىنە نازار اۋدارۋدى تاپسىردى.
«ەڭ الدىمەن سپورتشىلاردىڭ فۋنكتسيونالدىق دايىندىعى مەن فارماكولوگيالىق تۇرعىدان قامتاماسىز ەتىلۋىن رەتتەيتىن رەسۋرستارىمىز بولۋى ءتيىس. سونداي-اق, سپورتشىلاردى ەڭ باستى جارىستارعا ناعىز بابىندا اپارۋعا مىندەتتىمىز. كەشەندى-عىلىمي توپ مۇشەلەرى ولارمەن تىعىز جۇمىس ىستەۋى كەرەك», - دەدى ت. ق ۇلىباەۆ.
قازىرگى تاڭدا كەشەندى-عىلىمي توپ قۇرامىنداعى 110 مامان (دارىگەر, ماسساجشى, پسيحولوگ پەن بيوحيميك) كۇن سايىن سپورتشىلارمەن بىرگە وقۋ-جاتتىعۋ جيىنى مەن جارىستاردا قىزمەت ەتۋدە.
قازاقستان ۇوك باسشىسى «تازا سپورت» ەرەجەلەرىن ساقتاۋدىڭ ماڭىزدىلىعىنا تاعى دا توقتالىپ ءوتتى.
«دوپينگكە دەگەن تەرىس كوزقاراسىمىزدى ناقتى ءارى سەنىمدى تۇردە جاريالاۋىمىز كەرەك. سول سەبەپتى, ءاربىر سپورتشى, ءاربىر باپكەر مەن ءاربىر كەشەندى-عىلىمي توپ قىزمەتكەرى ءبىزدىڭ سپورتشىلاردى اتالعان پروبلەمادان ساقتاندىرۋ كەرەكتىگىن ءتۇسىنۋى قاجەت. بۇل تۇرعىدا ءبىز ەڭ مىقتى ۇستانىمنان باس تارتپايمىز. ەگەر قانداي دا ءبىر ەرەجە بۇزۋشىلىق بايقالىپ, دالەلدەنسە, سپورتشىلار مەن جاتتىقتىرۋشىلاردى ءتۇرلى تاسىلدەرمەن جازالاۋعا مىندەتتىمىز. بۇگىندە پارلامەنتتە سپورتشىنىڭ جاۋاپكەرشىلىگىن ارتتىرا تۇسەتىن دوپينگكە قارسى زاڭ جوباسىن قارالىپ جاتىر. وسى ورايدا دەپۋتاتتاردىڭ سپورتقا وڭ كوزقاراس تانىتىپ, مۇنداعى پروبلەمالاردى بىرلەسە شەشۋگە ءۇن قوسقانىنا العىس ايتقىم كەلەدى», - دەدى ۇوك پرەزيدەنتى.
سونداي-اق, ول وتاندىق سپورتتا دوپينگپەن كۇرەسۋ ماسەلەسى ءبىرىنشى كەزەكتە تۇراتىنىن ەسكەرتتى.
«بۇل ماسەلەگە وتە ساق بولىپ, ۇنەمى باقىلاۋدا ۇستاۋ قاجەت. ءاربىر قۇراما مەن ءاربىر سپورتشى ءۇشىن ءىس-شارا جوسپارىنىڭ ناقتى بولۋىن ۇسىنامىن. سپورتشىلاردىڭ مىندەتى بولۋى ءتيىس. ولاردىڭ دوپينگ قابىلداۋعا قۇقىعى جوق», - دەدى قر ۇوك پرەزيدەنتى تيمۋر ق ۇلىباەۆ.
ايتا كەتەلىك, قازاقستان ۇوك دوپينگكە قارسى ورتالىق جانە سپورتتىق فەدەراتسيالارمەن بىرلەسە وتىرىپ, 2020 جىلعى وليمپيادا ويىندارىنىڭ قارساڭىنداعى دوپينگكە قارسى شارالار اياسىندا ءاربىر سپورتشىمەن جەكەلەگەن جۇمىس جۇرگىزۋدى جالعاستىرادى جانە جىل بويىنا جارىستان تىس باقىلاۋ وتكىزەدى. ءبىر جىل شاماسىندا حالىقارالىق وليمپيادالىق كوميتەتتىڭ تالاپتارىنا سايكەس جارىس كەزىندە جانە جارىستان تىس ۋاقىتتا 3000 سىناما الۋ جوسپارلانۋدا.
قازىرگى تاڭدا الدا تۇرعان باستى مىندەت – وليمپيادا ويىندارىنا جولداما الۋ. بۇگىندە قازاقستاندىق جەڭىل اتلەت سپورتتىق ءجۇرىس بويىنشا وليمپيادا ويىندارىنىڭ جولداما بەرەتىن ءنورماتيۆتى ورىندادى.
2019 جىلى ۇلتتىق قۇراما كوماندالار 28 ليتسەنزيالىق الەم چەمپيوناتىنا, 19 ازيا چەمپيوناتىنا, سونداي-اق, وليمپيادا ويىندارىنا كۆوتا بەرەتىن 12 الەمدىك ىرىكتەۋ تۋرنيرىنە قاتىسۋدى جوسپارلاۋدا. 2020 جىلى ءبىزدىڭ كوماندالار 3 الەم چەمپيوناتى, 19 ازيا ايماقتىق, 18 الەمدىك ىرىكتەۋ تۋرنيرلەرىنە قاتىسادى. سونداي-اق, ليتسەنزيا الۋ ءۇشىن رەيتينگىلىك ۇپاي بەرەتىن 50-دەن اسا الەم كۋبوگى كەزەڭدەرىندە باق سىناۋ مىندەتى تۇر. 2020 جىلدىڭ 25 ماۋسىمىندا ليتسەنزيالىق جارىستار تىزبەگى تولىعىمەن اياقتالادى.
«مامىر ايىندا مانچەستەر قالاسىندا تاەكۆوندودان الەم چەمپيوناتى وتەدى. الەمدىك دودا الدىندا وڭتۇستىك كورەيادا وتەتىن وقۋ-جاتتىعۋ جيىندارىنا قاتىسامىز. ءبىزدىڭ الدىمىزداعى ەڭ ماڭىزدى دودا – توكيوداعى وليمپيادا ويىندارى. تورتجىلدىق دوداسىنا قاتىسۋ ءۇشىن بۇكىلالەمدىك تاەكۆوندو فەدەراتسياسى تۇزگەن رەيتينگتە ۇزدىك بەستىككە ەنۋ قاجەت. ازىرگە بىزدە مۇنداي سپورتشىلار جوق. دەسە دە, الەم چەمپيوناتىنان كەيىن وتەتىن ازيا ايماقتىق ىرىكتەۋ سىنىندا وليمپيادا جولداماسىن يەلەنەتىن مۇمكىندىگىمىز بار», - دەيدى تاەكۆوندودان قازاقستان ۇلتتىق قۇراماسىنىڭ باس باپكەرى يۋ يونگ دجين.
سۋ دوبىنان ەرلەر كومانداسىنىڭ باس باپكەرى الەكساندر شۆەدوۆ توكيو-2020 ويىندارىنا جولداما الۋ تۋرالى جوسپارلارىمەن ءبولىستى.
«سۋ دوبىنان وليمپيادا ويىندارىنا ازيا ايماعىنداعى ىرىكتەۋ ءتۋرنيرى كەلەسى جىلدىڭ اقپانىندا ءبىزدىڭ استانامىزدا وتەدى. بۇگىندە كوماندامىز اتالعان سىنعا دايىندىق ۇستىندە. بارلىق قارسىلاستاردى جەڭۋگە بولادى. سول سەبەپتى, وليمپيادا ويىندارىنا قاتىساتىن مۇمكىندىگىمىز بار. قازىرگى تاڭدا كوماندا رەسەي چەمپيوناتىنداعى كەزدەسۋلەرىن اياقتاپ, الەمدىك ليگانىڭ سۋپەرفينالىنا دايىندىقتى باستايدى. اتالعان تۋرنير ارقىلى الەم بىرىنشىلىگىنە دايىندىعىمىزدى پىسىقتايمىز. ءبارى جوسپار بويىنشا وتۋدە. قازاقستان ۇوك ءبىزدى بارلىق قاجەتتى قۇرالدارمەن, كەشەندى-عىلىمي توپ مۇشەلەرىمەن جابدىقتادى», - دەيدى سۋ دوبىنان قازاقستان قۇراماسىنىڭ باس باپكەرى الەكساندر شۆەدوۆ.
ەسكە سالا كەتەيىك, توكيوداعى وليمپيادا ويىندارى 2020 جىلدىڭ 24 شىلدەسى مەن 9 تامىزى ارالىعىندا وتەدى.
