جول-پاترۋلدىك پوليتسياسى پولكىنىڭ پلاتسىندا پوليتسيا اعا لەيتەنانتى داۋلەت ابۋوۆ پەن پوليتسيا لەيتەنانتى رۋسلان بۇركىتباەۆ سالتاناتتى تۇردە ماراپاتتالدى.
پوليتسيا دەپارتامەنتىنىڭ ءباسپاسوز قىزمەتىنىڭ حابارلاۋىنشا وقيعا 26 ناۋرىزدا ورىن العان. ەسىل وزەنىندە سۋعا باتىپ بارا جاتقان ەر ادام تۋرالى اقپاراتتى «تالاس 201» ءپاترۋلى قىزمەتكەرلەرى قابىلداعان بولاتىن. بىرنەشە مينۋت وتكەننەن كەيىن وقيعا ورنىنا كەلگەن ءتارتىپ ساقشىلارى تجك قىزمەتكەرلەرىمەن بىرلەسىپ قۇتقارۋ شارالارىن جۇرگىزىپ, مۇزداي سۋدان ەر ادامدى الىپ شىعادى.
ىشكى ىستەر ءمينيسترى ەرلان تۇرعىمباەۆتىڭ اتىنا امان قالعان ەر ادامنىڭ قىزىنان پوليتسەيلەرگە العىس ايتالعان حاتى كەلىپ ءتۇستى.
اينۇر يماناليەۆا ءىىم باسشىلىعىنا جازعان حاتىندا تۋىسقاندارى مەن جاقىندارىنىڭ اتىنان ونىڭ اكەسىن قۇتقارۋ كەزىندە باتىلدىق پەن ەرلىك تانىتقان پوليتسەيلەردى ماراپاتتاۋدى سۇراعان. مارات يماناليەۆ پەن ونىڭ قىزى ەلوردالىق جول-پاترۋلدىك پوليتسياسى پولكىنە كەلىپ, ءومىرىن ساقتاپ قالعانى ءۇشىن پوليتسەيلەرگە ريزاشىلىعىن ءبىلدىردى.
ەر ازامات پوليتسەيلەردىڭ باتىل جانە كاسىبي ارەكەتتەرىنىڭ ارقاسىندا ءوزىنىڭ امان قالعانىن ايتتى.
پوليتسيا دەپارتامەنتى باستىعىنىڭ ورىنباسارى پوليتسيا پولكوۆنيگى باحىتجان مالىباەۆ پوليتسەيلەرگە مەدالدى تابىستاي وتىرىپ, ادام ءومىرىن قۇتقارىپ قالۋ كەزىندە باتىلدىق تانىتقانى ءۇشىن ولارعا العىس ءبىلدىرىپ, الداعى ۋاقىتتا ءوز قىزمەتتىك بورىشىن ادال ورىنداۋعا شاقىردى.
ءىس-شارا سوڭىندا باحىتجان مالىباەۆ پوليتسيا قىزمەتكەرلەرىنىڭ اتىنا جىلى لەبىزدەرىن بىلدىرگەنى ءۇشىن يماناليەۆتارعا العىس ايتىپ, ەلوردا تۇرعىندارىنىڭ العىسى ءتارتىپ ساقشىلارى ءۇشىن ەڭ ۇزدىك ماراپات ەكەندىگىن العا تارتتى.
