مەكتەپ پەن بالاباقشالارداعى تاماقتىڭ ساپاسىن باقىلاۋدى ۇيىمداستىرۋ تۋرالى Primeminister.kz-كە بەرگەن ەكسكليۋزيۆتى سۇحباتىندا نۇر-سۇلتان قالاسىنىڭ ءبىلىم باسقارماسى باسشىسىنىڭ ورىنباسارى دۋلات جەكەباەۆ ايتىپ بەرەدى.
— دۋلات شايكەن ۇلى, وسى جىلى مەكتەپكە دەيىنگى جانە مەكتەپتەگى تاماقتاندىرۋدى ۇيىمداستىرۋدا قانداي وزگەرىستەر بولدى؟ سول تۋرالى ايتىپ بەرسەڭىز.
— جالپى مەكتەپتەردە تاماقتانۋ وسىعان دەيىن قر ءبىلىم جانە عىلىم مينيسترلىگىنىڭ №717 بۇيرىعىمەن ىسكە اسىرىلىپ كەلدى. 2019 جىلدان باستاپ اتالمىش بۇيرىققا وزگەرىستەر مەن تولىقتىرۋلار ەنگىزىلۋىنە بايلانىستى جاڭادان №598 بۇيرىق شىقتى جانە سوعان سايكەس جۇمىستار جاسالا باستادى. بۇل بۇيرىقتاعى نەگىزگى وزگەرىستەردىڭ ىشىندە ءبىر اتاپ وتەرلىگى — مەكتەپتەردەگى كونكۋرستىق ساتىپ الۋ, بۇنى ورتالىقتاندىرىلعان جەرگىلىكتى اتقارۋشى ورگاننىڭ شەشىمىمەن باسقا ورگان — اكتيۆتەر جانە مەملەكەتتىك ساتىپ الۋ باسقارماسى جۇرگىزدى, بۇگىندە ول ەلوردا مەكتەپتەرىندە ىسكە اسقان. بۇعان دەيىن اتالعان جۇمىس تەك مەكتەپتەردە وتەتىن بولسا, مەكتەپ باسشىسى ءوزى كوميسسيانىڭ توراعاسى بولسا, بۇل جولى كوميسسيالاردا ءبىر لوتتاردا مەكتەپ ديرەكتورلارى بولسا, كەيبىر لوتتاردا اتا-انالار, كەيبىر لوتتاردا باسقا دا كىسىلەر كوميسسيا توراعالارى بولدى. سونىمەن قاتار, كوميسسيا مۇشەلەرىن بيىل ءبىز كۇشەيتىپ, وعان كوبىنە اتا-انالاردى جۇمىلدىردىق, سونداي-اق, قالاداعى ءتورت اۋدانداعى Nur Otan پارتياسىنىڭ بولىمشەلەرىنىڭ قىزمەتكەرلەرى كوپ قاتىستى. ياعني, بۇل كىسىلەر ءبىرىنشى كۇننەن — قۇجاتتاردىڭ اشىلۋىنان باستاپ ەڭ سوڭعى شەشىم قابىلدانعانشا قاتىستى. جالپى, ءبىزدىڭ اكىمشىلىك پەن Nur Otan پارتياسىنىڭ اراسىندا مەكتەپتەگى تاماقتانۋ دەگەن جوبا بار. سول جوبا اياسىندا بىرلەسكەن جۇمىستار جۇرگىزىلدى. بۇل اكتيۆتەر مەن مەملەكەتتىك ساتىپ الۋ باسقارماسىنىڭ وتكىزۋىندە ساپاعا جاقسى اسەر ەتتى دەپ ويلايمىن, سەبەبى جۇمىستاردى ساتىپ الۋ ىسىمەن اينالىساتىن ءوز ءىسىنىڭ شەبەرلەرى اتقاردى. وسىنىڭ بارلىعى 2019 جىلعى زاڭعا وزگەرىستەردىڭ ەنگىزىلۋىنە بايلانىستى.
— وتكەن جىلى مەكتەپ اسحانالارىنداعى اس ءمازىرىن قايتا قاراپ, تۇتىنۋعا تىيىم سالىنعان ونىمدەر ءتىزىمىن جاڭارتۋ جوسپارلانعان ەدى. بۇل ماسەلە شەشىلدى مە؟ قازىر بالاباقشالار مەن مەكتەپتەردە قانداي ونىمدەرگە تىيىم سالىنعان؟
— 2018 جىلعى جەلتوقسان ايىندا قوعامدىق دەنساۋلىق ساقتاۋ دەپارتامەنتتەرى وزدەرىنىڭ سايتتارىندا مەكتەپتەردىڭ, بالاباقشالاردىڭ اسحانالارىندا ساتۋعا جانە پايدالانۋعا بولمايتىن نەگىزگى دەگەن بىرنەشە تاعامنىڭ ءتىزىمىن شىعاردى. سول پايدالانۋعا بولمايتىن تىزىمگە سايكەس, 2019 جىلدان باستاپ مەكتەپتەگى تاعامنىڭ جاڭا اس ءمازىرىن جاسادىق. وسىعان دەيىن ءبىز اتا-انالارمەن بىرىگىپ, مەكتەپتەردە بالالاردىڭ تاماقتانۋىنىڭ جاي-كۇيىن قاراستىرعان كەزدە بالالاردىڭ تاراپىنان, اتا-انالاردىڭ تاراپىنان اس ءمازىرى جونىندە ءبىراز ۇسىنىس-پىكىرلەرىن ەسكەرە وتىرىپ, قالامىزداعى تاعامتانۋ ينستيتۋتىمەن بىرىگىپ جاڭادان اس ءمازىرىن قۇراستىردىق. بۇل جەردە ءبىر ايتا كەتەتىن جايت, مەكتەپتەردەگى تاماقتاندىرۋ مەن بالاباقشالاردا كىشكەنە وزگەرىس بار. مەكتەپتەردە كونكۋرس وتكەننەن كەيىن, وعان جەكە كاسىپكەر كەلىپ جۇمىس ىستەيدى, ال بالاباقشادا كونكۋرس ارقىلى تەك قانا كەرەك تاعامدار ساتىپ الىنادى دا, تاماقتى دايىندايتىن بالاباقشانىڭ ءوزىنىڭ شتاتتاعى اسپازدارى.
— دۋلات شايكەن ۇلى, وتكەن جىلى مەكتەپ اسحانالارى ءۇشىن ازىق-ت ۇلىكتى ورتالىقتاندىرىلعان ساتىپ الۋ جۇيەسىن جەتىلدىرۋ ماسەلەسى كوتەرىلدى. سونىڭ ناتيجەسىندە قانداي شەشىم قابىلداندى؟
— قالا اكىمدىگىنىڭ شەشىمىمەن بيىل كونكۋرستىق جۇمىستاردىڭ بارلىعىن مەكتەپ تە ەمەس, ءبىلىم باسقارماسى دا ەمەس, بۇعان قاتىسى جوق اكتيۆتەر جانە مەملەكەتتىك ساتىپ الۋ باسقارماسى جۇرگىزدى. №598 بۇيرىقتاعى وزگەرىستەردىڭ ارقاسىندا وسىلاي وزگەردى.
— ءسىزدىڭ ۆەدومستۆو مەكتەپ اسحانالارىنداعى ازىق-ت ۇلىك ساپاسىن قالاي تەكسەرەدى؟
— №598 بۇيرىق جانە ونىڭ الدىنداعى №717 بۇيرىقتا دا ايتىلعان, مەكتەپتە براكەراجدىق كوميسسيا قۇرىلادى, ول كوميسسيانىڭ قۇرامىنا مەكتەپ ديرەكتورى, مەكتەپتەگى مەدبيكە, الەۋمەتتىك پەداگوگ, سونىمەن قاتار باسقا دا ۇستازدار, ەڭ باستىسى اتا-انالار كىرەدى, ولار مەكتەپتەگى تاماقتانۋدىڭ دۇرىس ۇيىمداستىرىلۋىن, اس مازىرىنە سايكەس كەلۋىن باقىلايدى. بىلتىرلارى ءبىز اتالعان جۇمىسقا اتا-انالاردى كوپتەپ تارتۋ شارالارىن جۇرگىزدىك. اتا-انالارمەن بىرىگىپ, مەكتەپتەردەگى, بالاباقشالارداعى تاماقتاندىرۋدى ۇيىمداستىرۋ ساپاسىن تەكسەرىپ, بىرگە قاراستىردىق. اتا-انالار كوبىرەك تارتىلسا, ساپانىڭ جاقسارا تۇسەتىنى انىق. اسحانادا تاماق دايىندايتىن ورىنعا تەك قولىندا سانيتارلىق كىتاپشاسى بار ادام عانا كىرە الادى. الدىن الا سونداي كەلىسىمگە كەلدىك. بۇل — مەكتەپتەگى دەڭگەي. ودان جوعارى قالادا ۆەدومستۆوارالىق ساراپشىلىق توپ قۇرىلعان, وعان قالالىق دەپۋتات وكىلى, ۇكىمەتتىك ەمەس ۇيىمداردىڭ, «ادىلەت» قوعامىنىڭ وكىلدەرى, اتا-انالار كىرەدى. قالالىق ۆەدومستۆوارالىق ساراپشىلىق توپ مەكتەپتەرگە بارىپ, براكەراجدىق كوميسسيانىڭ جۇمىسىن — جۇمىس قالاي جۇرگىزىلىپ جاتىر, ءوز دەڭگەيىندە مە, مەكتەپ سايتتارى ۋاقىتىندا تولىقتىرىلا ما, اس مازىرلەرى دۇرىس ءىلىنىپ تۇر ما, دايىنداعان تاماقتار اس مازىرىنە سايكەس كەلە مە جانە ت.ب. تەكسەردى.
— اتا-انالار مەكتەپ اسحانالارىن بارىپ كورە الا ما؟ كەمشىلىكتەر انىقتالعان جاعدايدا ولار قايدا شاعىمدانا الادى؟
— ءيا, اسحانالارداعى تاماقتىڭ دايىندالۋ پروتسەسىن اتا-انالار كورە الادى, ولار مەكتەپتەگى براكەراجدىق كوميسسيامەن بىرگە كىرىپ, مەكتەپتە تاماقتىڭ قالاي ازىرلەنىپ جاتقانىن باقىلاي الادى. مەكتەپتەگى تاماق دايىندايتىن جەرلەرگە بەينەكامەرالار ورناتىلعان. 2019 جىلدان باستاپ 30 مەكتەپكە ەنگىزىلگەن, 1 قىركۇيەككە قاراي بارلىق مەكتەپتەردە ەنگىزىپ بىتىرەمىز دەگەن جوسپار بار. كەيبىر مەكتەپتەردە اتا-انالار ءموبيلدى قوسىمشالار ارقىلى كورە الادى, بارلىق بەينەجازبالار كومپيۋتەردە ساقتالادى. اتا-انالار ءوز ەرىكتەرىمەن كەز كەلگەن ۋاقىتتا سول جازىلعان تاسپانى كورىپ, اسحانالارداعى سانيتارلىق نورمالاردىڭ ساقتالۋىن باعالاي الادى.
— ىستىق اسپەن نۇر-سۇلتان قالاسىنداعى بارلىق وقۋشىلار قامتىلعان با؟ قانشاسى قامتىلعان؟ بۇل كورسەتكىش ارتتىرىلا ما؟
— ەلوردا مەكتەپتەرىندە 1 – 4 سىنىپ وقۋشىلارىنىڭ بارلىعى بيۋدجەت تاراپىنان ىستىق تاماقپەن قامتاماسىز ەتىلگەن. سونىمەن قاتار, 5 – 11 سىنىپ ارالىعىنداعى بىرنەشە كاتەگورياعا جاتاتىن بالالار ىستىق تاماقپەن قامتاماسىز ەتىلگەن, وسى جۇمىستى ءبىز ءارى قاراي جالعاستىرىپ, قالا اكىمىنىڭ ۇسىنىسى بويىنشا جاڭا وقۋ جىلىنان باستاپ, ياعني 1 قىركۇيەكتەن باستاپ, وسى توپقا كوپ بالالى وتباسىلاردان شىققان بالالاردى دا قوسۋدى كوزدەپ وتىرمىز.
— سۇحباتىڭىزعا راقمەت!
