وتكەن جىلى «جاعالاۋ» شاعىن اۋدانىندا وسىنداي اتپەن وتباسىلىق دەنساۋلىق ورتالىعى جۇمىسىن باستادى. ول مەملەكەتتىك-جەكە مەنشىك ارىپتەستىك اياسىندا اشىلعان بولاتىن. ماقسات – تۇرعىنداردىڭ باستاپقى مەديتسينالىق-سانيتارلىق كومەكتى جاقىن جەردەن الۋىن قامتاماسىز ەتۋ.
تۇرعىن ءۇي كەشەنىنىڭ ءبىرىنشى قاباتىندا ورنالاسقان بولمەدە تەراپەۆت, پەدياتر دارىگەرى, پروتسەدۋرالىق, ۆاكتسيناتسيا, العاشقى جاردەم جانە ەمدەۋ كابينەتتەرى بار. ولاردىڭ بارلىعى قاجەتتى مەديتسينالىق جابدىقپەن جابدىقتالعان.
«مۇنداي ورتالىقتار قالا ەمحانالارىنداعى جۇكتەمەنى تومەندەتۋگە مۇمكىندىك بەرەدى. ورتاشا ەسەپپەن العاندا ەمحانالار 50 مىڭ ادامعا دەيىن قابىلداۋى ءتيىس, بىراق تۋ مەن كوشى-قون پروتسەستەرىن ەسكەرە وتىرىپ, بۇل كورسەتكىش نورمادان 1,5-2 ەسە اسادى. ءبىزدىڭ ورتالىقتارىمىز قولجەتىمدىلىكتى, ۇلكەن كەزەكتەردى جويۋدى, سونداي-اق پاتسيەنتتەرگە قىسقا مەرزىمدە كاسىبي مەديتسينالىق كومەك كورسەتۋدى قامتاماسىز ەتەدى», – دەدى «سالاۋاتتى استانا» جشس-ءنىڭ ديرەكتورى لەيلا يشباەۆا.
بۇل ەمحانا نۇر-سۇلتان اكىمدىگى 2019-2023 جىلدارعا ازىرلەگەن باستاپقى مەديتسينالىق-سانيتارلىق كومەك جۇيەسىن (بۇدان ءارى - بمسك) دامىتۋ تۇجىرىمداماسىنىڭ بولىگى رەتىندە اشىلدى. تۇجىرىمداما قالانىڭ تۇرعىن اۋداندارىندا «ۇيدەگى دارىگەر» ىقشام وبەكتىلەردىڭ اشىلۋى ارقاسىندا باستاپقى مەديتسينالىق-سانيتارلىق كومەك كورسەتۋ جەلىسىن ودان ءارى دامىتۋدى كوزدەيدى. وسى ۋاقىت ارالىعىندا وسىنداي 51 ورتالىق اشىلادى دەپ جوسپارلانۋدا. ولاردىڭ 11-ءى 20 مينۋتتىق جەردە مەديتسينالىق مەكەمەسى جوق تۇرعىن الاپتاردا, 40-عى 2023 جىلعا دەيىن تۇرعىندار سانىنىڭ ەڭ كوپ ءوسۋى كۇتىلەتىن 9 تۇرعىن ءۇي الابىندا بوي كوتەرەتىن بولادى.
«ۇيدەگى دارىگەر» ورتالىقتارىندا ءبىرىنشى كەزەكتە ادامدارعا العاشقى كومەك جانە كەڭەس بەرەتىن ۋچاسكەلىك دارىگەرلەردىڭ بولۋى ماڭىزدى. تسيفرلاندىرۋعا كوشۋ ارقىلى ءبىز ازاماتتارعا جاڭا تەحنولوگيالاردىڭ ارتىقشىلىقتارىن جەتكىزگىمىز كەلەدى. مىسالى, ناۋقاس دارىگەرمەن قاشىقتىقتان كەڭەس الا الادى. بىزدە WhatsApp ارقىلى سويلەسۋ بولمەلەرى بار, ولار ارقىلى جۇكتى ايەلدەرگە, ءبىر جاسقا تولماعان ءسابيى بار انالارعا, مۇگەدەكتەرگە كەڭەس بەرەمىز. بارلىق سۇراقتارعا ءبولىم مەڭگەرۋشىسى, دارىگەر جانە باس مەدبيكە جاۋاپ بەرەدى», – دەدى لەيلا يشباەۆا.
جىل اياعىنا قاراي نۇر-سۇلتاندا تاعى 30 «ۇيدەگى دارىگەر» ورتالىعى پايدا بولادى دەپ كۇتىلۋدە.
