ءساۋىر ايىنىڭ باسىنان باستاپ 3 مىڭنان استام ادام ااك الۋعا ءوتىنىش بىلدىرگەن.
«ءبىز ادامداردىڭ قاراسى قالىڭ بولاتىنىن ءبىلىپ, الدىن الا دايىندالدىق. 1 ساۋىرگە دەيىن ءبىزدىڭ 36 قىزمەتكەر قايتا وقىتىلدى, قازىر ولار جۇمىسپەن قامتۋ ورتالىعىنىڭ وپەراتسيالىق زالىندا, سونداي-اق اۋداندىق اكىمدىكتەردە ادامداردى قابىلدايدى. كوپبالالى انالارعا جۇمىسپەن قامتۋ ورتالىعىنا بارۋ مىندەتتى ەمەس, جەرگىلىكتى اكىمدىككە دە جۇگىنۋگە بولادى. وندا كەزەك از. بۇل رەتتە ماماندار ساۋاتتى ءارى بارىنشا تەز كەڭەس بەرەدى», – دەدى حالىقتى جۇمىسپەن قامتۋ ورتالىعىنىڭ ءباسپاسوز حاتشىسى دانا تۇرعىنوۆا.
قالا تۇرعىندارىنا ىڭعايلى بولۋ ءۇشىن جۇمىسپەن قامتۋ ورتالىعى ساعات 8:30-دان 20:00-گە دەيىن تۇسكى ءۇزىلىسسىز جۇمىس ىستەيدى.
«قۇجاتتاردى ءساۋىر ايىندا تاپسىرۋعا بولادى. ازاماتتاردىڭ جۇگىنگەن ۋاقىتىنا قاراماستان, ءوتىنىم راستالعان جاعدايدا ولار تولەمگە قول جەتكىزە الادى. ااك 1 ساۋىردەن باستاپ تاعايىندالدى», – دەدى د. تۇرعىنوۆا.
سونداي-اق, ول قىزمەتكەرلەردىڭ كەيبىرەۋلەردەن قۇجاتتاردىڭ تولىق پاكەتىن, ال باسقالاردان تەك جەكە كۋالىكتى تالاپ ەتەتىنىن ءتۇسىندىردى.
«ەڭبەك جانە حالىقتى الەۋمەتتىك قورعاۋ مينيسترلىگى «ە-حالىق» جاڭا اقپاراتتىق بازاسىن ىسكە قوستى. اتالعان اقپاراتتىق بازادا دەرەكتەرى جوق ازاماتتاردان قوسىمشا قۇجاتتار تالاپ ەتىلەدى. بۇرىن ااك العان ازاماتتار جاڭا فورماتتاعى ااك الۋشىلار قاتارىنا اۆتوماتتى تۇردە كوشەدى», – دەپ ءتۇسىندىردى ول.
قۇجاتتاردى قابىلداعاننان كەيىن ۋچاسكەلىك كوميسسيا العاش ءوتىنىش بەرۋشىلەردىڭ ماتەريالدىق جاعدايىن تەكسەرەدى.
ەستەرىڭىزگە سالا كەتەيىك, 1 ساۋىردەن باستاپ ااك تاعايىنداۋدىڭ جاڭا كريتەريلەرى انىقتالدى, وعان سايكەس ەلوردا تۇرعىندارى ءۇشىن ءبىر ادامعا 21 572 تەڭگە كولەمىندە كەدەيلىك شەگى انىقتالدى. تيىسىنشە, الەۋمەتتىك كومەك الۋ ءۇشىن وتباسىنىڭ ءبىر مۇشەسىنە تابىسى كەدەيلىك شەگىنەن اسپايتىن بارلىق ادامدار جۇگىنە الادى.
