ب. ساپارباەۆ اتاۋلى الەۋمەتتىك كومەكتى بەلگىلەۋدىڭ نەگىزگى شارتتارىنىڭ ءبىرى تۇرعىلىقتى جەرى بويىنشا تۇراقتى نەمەسە ۋاقىتشا تىركەۋىنىڭ بولۋى ەكەنىن اتاپ ايتتى. ونداي مۇمكىندىگى جوق ازاماتتار ءۇشىن اكىمدىكتەر ۋاقىتشا تىركەۋ مۇمكىندىگىن قاراستىرۋى قاجەت.
«ااك بەلگىلەۋ ءۇشىن تۇراقتى تىركەۋىنىڭ بولۋى ءتيىس. ەگەر ازامات سوڭعى بەس جىلدا مىسالى, نۇر-سۇلتان قالاسىندا تۇرىپ جاتسا, جانە ونىڭ تىركەۋى بولماسا, وندا بۇل ازاماتتى جۇمىسپەن قامتۋ ورتالىقتارى ارقىلى ۋاقىتشا تىركەۋگە بولادى. نۇر-سۇلتان قالاسىندا الەۋمەتتىك بەيىمدەۋ ورتالىقتارى بار. اكىمدىك ولاردى سول جەردە ۋاقىتشا تىركەۋ تۋرالى شەشىم قابىلدادى. تەك سودان كەيىن جۇمىسپەن قامتۋ ورتالىقتارى ااك بەلگىلەۋ ءۇشىن ولاردىڭ قۇجاتتارىن قابىلداپ الادى جانە تابىستارىنا وراي ولارعا ااك تاعايىندالادى», — دەدى ب. ساپارباەۆ.
سونىمەن قاتار مينيستر ااك بەلگىلەۋگە بايلانىستى قۇجاتتاردىڭ قابىلدانا باستاۋىمەن جۇمىسپەن قامتۋ ورتالىقتارىندا ۇلكەن كەزەكتىڭ پايدا بولۋى ماسەلەسىن ءتۇسىندىرىپ, ۇرەيگە جول بەرمەۋگە شاقىردى.
«نۇر-سۇلتان قالاسىنداعى جۇمىسپەن قامتۋ ورتالىقتارىنا مەن ءوزىم باردىم. وكىنىشكە وراي, العاشقى كۇندەرى, اسىرەسە, ءبىرىنشى ونكۇندىكتە كەزەك بولدى. ءبىز بارلىعىنا بىردەن بارۋ قاجەت ەمەستىگىن بىرنەشە رەت تۇسىندىرگەن ەدىك. كومەكتى بەلگىلەۋ مەن قۇجاتتاردى قابىلداۋ اي بويى جۇرگىزىلەدى, ول قۇجاتتاردىڭ قاي كۇنى تاپسىرىلعانىنا بايلانىستى بولمايدى», — دەدى ب. ساپارباەۆ.
ول حالىقتى جۇمىسپەن قامتۋ ورتالىقتارىنىڭ قىزمەتكەرلەرى اراسىندا دا ااك بەلگىلەۋدىڭ جاڭا ەرەجەلەرىن ءتۇسىندىرۋ جۇمىستارى جۇرگىزىلىپ جاتقانىن ايتتى.
«وكىنىشكە وراي, ونداي ماماندار بار (ەسك. - قاجەتسىز قۇجاتتاردى تالاپ ەتەتىن). ءبىز ولارعا بىرنەشە رەت تەك جەكە كۋالىك قانا قاجەت ەكەنىن ايتتىق. ارالاۋ كەزىندە ءبىز وسىنداي ساتتەردى بايقاپ, جۇمىسپەن قامتۋ ورتالىقتارىنىڭ باسشىلارىنا, اكىمدىكتەرگە قاجەتسىز قۇجاتتاردى تالاپ ەتپەۋىلەرى ءۇشىن تاپسىرمالار بەردىك», — دەپ قوستى مينيستر.
سونىمەن قاتار ب. ساپارباەۆ بىرىڭعاي جيىنتىق تولەمدى تولەيتىن ازاماتتاردىڭ ااك الۋعا قۇقىلى ەكەنىن, بىراق ول ءۇشىن جۇمىسپەن قامتىلۋعا بەلسەنە ىقپالداسۋ كەرەكتىگىن ايتتى.
