د.نازارباەۆا سلوۆاكيانى ەقىۇ-عا توراعالىق ەتۋىنىڭ باستالۋىمەن قۇتتىقتاپ, قازاقستان كۇردەلى حالىقارالىق جاعدايدا جۇزەگە اسىپ جاتقان سلوۆاك ميسسياسىنىڭ باسىمدىقتارىن قولدايتىنىن اتاپ ءوتتى. «سىزدەردىڭ توراعالىق ەتۋلەرىڭىزدەگى قاقتىعىستاردىڭ الدىن الۋ, پرەۆەنتيۆتى ديپلوماتيا, مۋلتيلاتەراليزم باسىمدىقتارى قازاقستان تاۋەلسىزدىك العان كەزدەن باستاپ ۇستاناتىن سىرتقى ساياسي باعىتتارىمەن دالمە-ءدال ۇندەسىپ وتىر», - دەدى سەنات توراعاسى.
اڭگىمە بارىسىندا ەقىۇ-نىڭ بىتىمگەرلىك الەۋەتىن نىعايتۋعا باسا نازار اۋدارىلدى. م.لايچاك ۇيىمنىڭ قارۋلى قاقتىعىستار ايماقتارىنداعى شيەلەنىستى ازايتۋ جانە كەلىسسوز ۇدەرىستەرىن دامىتۋعا ارناعان كۇش-جىگەرى تۋرالى ايتتى. د. نازارباەۆا اۋعانستانداعى احۋالدىڭ ورىستەۋىنە بايلانىستى الاڭداۋشىلىق ءبىلدىردى جانە ەقىۇ-عا وسى ءوڭىردى نازاردان تىس قالدىرماۋعا شاقىردى.
م. لايچاك قازاقستاننىڭ الەمدىك ساياساتتاعى ءرولىن جوعارى باعالادى. «قازاقستان – ورتالىق ازياداعى نەگىزگى مەملەكەت, بۇل ەل ەقىۇ-نىڭ باسىمدىقتارىن جاقسى بىلەدى. ۇيىمنىڭ وسى جۇزجىلدىقتا جالعىز ءسامميتى ءدال وسى جەردە ءوتتى. سامميتتە قابىلدانعان استانا دەكلاراتسياسى قازىرگى ۋاقىتقا دەيىن ماڭىزىن جويعان جوق», - دەدى ەقىۇ توراعاسى.
ول سونداي-اق سيرياداعى جاعدايدى رەتتەۋ جونىندەگى قازاقستان استاناسىنداعى كەلىسسوزدەردىڭ ماڭىزدى ءرولىن اتاپ ءوتتى. «استانا كەلىسسوزدەرى سيريالىق رەتتەۋلەرگە زور ۇلەس قوستى, ال جەنەۆا پروتسەستەرى تىعىرىققا تىرەلگەن بولاتىن», - دەدى م. لايچاك.
سەنات توراعاسى ءوز كەزەگىندە استانا دەكلاراتسياسىنا قاتىسۋشىلاردىڭ ءبىرتۇتاس ءارى ورتاق ەۋرو-اتلانتيكالىق جانە ەۋرازيالىق قاۋىپسىزدىك قوعامداستىعىن قالىپتاستىرۋ جونىندەگى وزدەرىنە العان مىندەتتەمەلەرىن ىسكە اسىرۋ ماقساتىندا بىرلەسكەن كۇش-جىگەردى جالعاستىرۋ قاجەت دەگەن پىكىرىن ءبىلدىردى. ونىڭ پىكىرىنشە, استانا دەكلاراتسياسىن جۇزەگە اسىرۋ جونىندەگى ءىس-قيمىل جوسپارىن قابىلداۋ تۋرالى بۇرىن قول جەتكەن ۋاعدالاستىقتى ىسكە اسىرۋ قاجەت.
جۇزدەسۋشىلەر ەقىۇ پارلامەنتتىك ولشەمدەرىن نىعايتۋدىڭ كەلەشەگىن تالقىلادى. د.نازارباەۆانىڭ ايتۋىنشا, قازاقستاندىق دەلەگاتسيا ءاردايىم بەلسەندىلىك تانىتىپ وتىرعان ەقىۇ پارلامەنتتىك اسسامبلەياسى ونىڭ قاتىسۋشىلارى اراسىنداعى ۇنقاتىسۋدى نىعايتۋعا جانە سەنىمدى قالپىنا كەلتىرۋگە ارنالعان ماڭىزدى الاڭ بولىپ تابىلادى.
سەنات توراعاسى سونداي-اق وتكەن جىلى قازاقستاننىڭ تۇڭعىش پرەزيدەنتى-ەلباسى ن.ءا.نازارباەۆتىڭ 2020 جىلى 1975 جىلعى حەلسينكي قورىتىندى اكتىسىنىڭ 45 جىلدىعىنا ارنالعان قاۋىپسىزدىك جانە ىنتىماقتاستىق جونىندەگى حالىقارالىق كونفەرەنتسياسىن وتكىزۋ, سونداي-اق ەۋرازيا كەڭىستىگىندە كەشەندى قاۋىپسىزدىكتى قامتاماسىز ەتۋ ماسەلەلەرىن تالقىلاۋ ءۇشىن ەقىۇ, اوسشك جانە اسەان وڭىرلىك فورۋمى حاتشىلىقتارىنىڭ بىرلەسكەن كەزدەسۋىن ۇيىمداستىرۋ تۋرالى باستامالارىنا توقتالدى. د.نازارباەۆانىڭ پىكىرىنشە, سلوۆاك توراعالىعىنىڭ باسىمدىقتارىنا سايكەس كەلەتىن وسى باستامالاردى ىسكە اسىرۋ ەقىۇ-نى جاڭا دەڭگەيگە شىعارۋى ىقتيمال.
