رۋحانيات • 08 ءساۋىر، 2019

جىر قارلىعاشى – فاريزا

1017 رەت كورسەتىلدى

بيىل قازاقستاننىڭ حالىق اقىنى، مەملەكەتتىك سىيلىقتىڭ لاۋرەاتى فاريزا وڭعارسىنوۆانىڭ 80 جىلدىق مەرەيتويى. وسىعان وراي ەلىمىزدىڭ تۇكپىر-تۇكپىرىندە اقىندى ەسكە الۋعا ارنالعان تاعىلىمدى شارالار ۇزدىكسىز ۇيىمداستىرىلىپ كەلەدى.

ولەڭىن ومىرىنە بالاپ، عۇ­مىر بويى ايالاپ وتكەن پوەزيا پات­شايىمىنىڭ رۋحىنا تاعزىم ەتۋگە باعىتتالعان سونداي جارقىن كەش وتكەن اپتادا ەلوردا تورىندەگى جەتەكشى وقۋ ورنى – نازارباەۆ ۋنيۆەرسيتەتتىڭ «رۋحاني جاڭعىرۋ» مادەني ورتالىعىندا ءوتتى. «جىر – مەنىڭ پلانەتام» دەپ اتالاتىن تەاترلاندىرىلعان ادەبي-سازدى كونتسەرتتىك باعدارلامادا نازارباەۆ ۋنيۆەرسيتەت ستۋدەنت­تەرى ونەر كورسەتتى. اقىن ءومىرىنىڭ ءتۇرلى كەزەڭدەرىندەگى ايتۋلى ەستەلىكتەرى مەن ەر-ازاماتقا بەرگى­سىز ادامدىق مىنەزى جان-جاقتى بەي­نەلەنگەن ساحنالاندىرىلعان كو­رىنىستەر، سونداي-اق قازاقتىڭ ءبىرتۋار ايماڭداي ۇلدارى اسان­باي اسقاروۆ، مۇقاعالي ماقا­تاەۆ، ءابىش كەكىلباەۆ، اسقار سۇلەي­مەنوۆ سىندى زامانداس­تارى اراسىنداعى رۋحاني قارىم-قاتىناس، شىعارماشىلىق ىزدەنىس ىزدەرى شىنايى سۋرەتتەلگەن ايتۋلى كەش جينالعان كوپشىلىك كورەرمەننىڭ كوڭىلىن بىردەن باۋراپ الدى. 

جالپى، نازارباەۆ ۋنيۆەرسيتەت – الەمدىك ستاندارتقا ساي جاراتىلىستانۋ مەن مەديتسينا باعىتىندا ءبىلىم الاتىن ستۋدەنتتەردى تەك سالالىق دامىتۋمەن شەكتەمەي، جاستاردى رۋحاني كەمەلدەندىرۋ، ۇلتىمىزدىڭ تاريحى مەن ءداستۇرىن تەل ەمىپ وسكەن پاتريوت ازامات ەتىپ تاربيەلەۋدە ولشەۋسىز ۇلەس قوسىپ كەلە جاتقان جەتەكشى وقۋ ورنى. ونىڭ ايقىن ايعاعى – بۇگىنگى ءبىز كۋا بولعان «جىر – مەنىڭ پلانەتام» اتتى ادەبي-سازدى كەش. «رۋحاني جاڭعىرۋ» ورتالىعىنىڭ جەتەكشىسى گۇلتاس قۇرمانبايدىڭ جەتەكشىلىگىمەن ۇيىمداستىرىلعان تاعىلىمدى شارادا ستۋدەنتتەردىڭ شىعارماشىلىق قارىمى مەن مۇمكىندىگى كورەرمەنىن ءتانتى ەتتى. 

سونداي-اق تانىمدىق شارانىڭ تاعى ءبىر ەلەۋلى ءساتى – كەش اياسىندا «جىر قارلىعاشى – فاريزا» اتتى بايقاۋ جەڭىمپازدارىنىڭ ەسىمى جاريا ەتىلىپ، جۇلدەگەرلەرگە ارنايى ديپلومدار مەن باعالى سىيلىقتار تابىس ەتىلدى. اتاپ ايتار بولساق، نەگىزگى ءۇش باعىت بويىن­شا ۇيىم­داستىرىلعان ادەبي كونكۋرستا «ف.وڭعارسىنوۆانىڭ ولەڭدەرىن مانەرلەپ وقۋ» اتالىمى بويىن­شا ۋنيۆەرسيتەت ستۋدەنتتەرى: ايا­جان سەيدانوۆا، سايان كاترەنوۆ، نازەركە لەس، قۋاندىق ماقسۇتوۆ باستاعان جاس­تار ماراپاتتالسا، «ف.وڭعار­سىنو­ۆانىڭ ولەڭدەرىن اعىلشىن تىلىنە اۋدارۋ» اتالى­مىندا دارينا ءجۇنىسوۆا، ايت­بەك قاسىمجومارت جانە اسەت جۇما­تاي جەڭىمپاز اتاندى. ال «ف.وڭعارسىنوۆانىڭ ولەڭ­دەرىن ورىس تىلىنە اۋدارۋ» اتا­لىمىنداعى سىيلىقتى مي­راس قابيبۋللا مەن ءمادينا تلەۋ­عابىل تەڭدەي ءبولىستى. كەش سو­ڭىندا مىرزاگەلدى كەمەل، وڭاي­گۇل تۇرجان، يراك ەلەكەەۆ، ال­تىناي نوگەربەك باستاعان قۇر­مەتتى قوناقتار جاستارعا باتا­سىن بەرىپ، اق جول تىلەدى. پوە­زيا پاديشاسىنىڭ وتتى جىرى وقى­لىپ، اسەم ءان مەن رۋحتى كۇي­دەن شاشۋ شاشىلعان كونتسەرت وسىلايشا ءوز مارەسىنە جەتتى.
سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار