جازادان جالتارعاندار جازالانادى
بەيسەنبى, 29 ناۋرىز 2012 7:56
ءبىزدىڭ ەلىمىزدە زاڭدى اتتاپ, قاندايدا بولماسىن قىلمىس جاساعان جاندار جازالانۋعا ءتيىس. بىراق جاسارىن جاساپ, سوسىن ايلاسىن اسىرىپ قاشىپ قۇتىلىپ كەتىپ جاتقان قىلمىسكەرلەر جۇزدەپ سانالادى. ولاردى ۇستايدى, قامايدى, جازاسىن تارتتىرادى دەگەن ءتيىستى ورگاندار السىزدىك تانىتۋدا. مىنە, وسى ورايدا كەشە باس پروكۋرور اسحات داۋىلباەۆتىڭ توراعالىق ەتۋىمەن باس پروكۋراتۋرانىڭ كەڭەيتىلگەن القا ءماجىلىسى ءوتتى.
بەيسەنبى, 29 ناۋرىز 2012 7:56
ءبىزدىڭ ەلىمىزدە زاڭدى اتتاپ, قاندايدا بولماسىن قىلمىس جاساعان جاندار جازالانۋعا ءتيىس. بىراق جاسارىن جاساپ, سوسىن ايلاسىن اسىرىپ قاشىپ قۇتىلىپ كەتىپ جاتقان قىلمىسكەرلەر جۇزدەپ سانالادى. ولاردى ۇستايدى, قامايدى, جازاسىن تارتتىرادى دەگەن ءتيىستى ورگاندار السىزدىك تانىتۋدا. مىنە, وسى ورايدا كەشە باس پروكۋرور اسحات داۋىلباەۆتىڭ توراعالىق ەتۋىمەن باس پروكۋراتۋرانىڭ كەڭەيتىلگەن القا ءماجىلىسى ءوتتى.
وندا ايىپتالۋشىلاردى, تەرگەۋ, انىقتاۋ جانە سوت ورگاندارىنان جاسىرىنىپ جۇرگەندەردى, ءىز-ءتۇزسىز جوعالعانداردى جانە سوت شەشىمىن ورىنداۋدان جالتارىپ جۇرگەندەردى ىزدەۋ بويىنشا جەدەل-ىزدەستىرۋ قىزمەتى زاڭدىلىعىنىڭ جاي-كۇيى قارالدى. تالداۋ كورسەتكەندەي, 2011 جىلى ىشكى ىستەر جانە قارجى پوليتسياسى ورگاندارى 7311 قىلمىسكەردى ءىزدەگەن, ولاردىڭ ىشىندە 1558-ىنە – مەملەكەتارالىق, 60-ىنا – حالىقارالىق ىزدەۋ جاريالانعان. قابىلدانعان شارالاردىڭ ناتيجەسىندە 4640 قىلمىسكەر, ولاردىڭ ىشىندە 176-سى شەتەلدەن تابىلعان. سونىمەن قاتار, رەسپۋبليكا بويىنشا ءالى دە 2266 قىلمىسكەر تابىلماي وتىر.
قارجى پوليتسياسى ورگاندارىندا قىلمىسكەرلەردى ىزدەۋ تيىمدىلىگى 12 پايىزعا تومەندەگەن. 405 تۇلعا تابىلماعان, ولاردىڭ اراسىندا سىبايلاس جەمقورلىق جانە لاۋازىمدىق قىلمىستار جاساعان 37, ەكونوميكالىق قىلمىس جاساعان 352 ادام بار كورىنەدى.
ىشكى ىستەر جانە قارجى پوليتسياسى ورگاندارىندا جەدەل بولىمشەلەر جۇمىسىنا ءتيىستى ۆەدومستۆولىق باقىلاۋدىڭ جوقتىعى جوعارىداعى كەلەڭسىز قالىپتاسقان جاعدايدىڭ نەگىزگى سەبەپتەرىنىڭ ءبىرى بولىپ تابىلادى. پروكۋرورلار جەدەل قىزمەتكەرلەردىڭ كىناسىنەن ۋاقتىلى ىزدەستىرۋ ءىسىن قوزعاماعان 334 فاكتىنى ىشكى ىستەر ورگاندارىنان, 28 فاكتىنى قارجى پوليتسياسى ورگاندارىنان انىقتادى.
تالقىلاۋ قورىتىندىسى بويىنشا ىزدەستىرۋ تيىمدىلىگىن ارتتىرۋ ماقساتىندا ۋاكىلەتتى ورگاندارعا قازىرگى زامانعى اۆتوماتتاندىرىلعان اقپاراتتىق ءجۇيەلەردىڭ مۇمكىندىكتەرىن, اتاپ ايتقاندا, ارىزدار مەن حابارلامالاردى ەسەپكە الۋدىڭ ەلەكتروندى كىتابى مەن ءىز-ءتۇزسىز جوعالعاندار تۋرالى ىزدەستىرۋ ىستەرى بويىنشا قساجەك ارنايى ەسەبىنىڭ بىرەگەيلەندىرىلگەن مالىمەتتەر قورىن تولىعىراق پايدالانۋ ۇسىنىلدى. سونىمەن قاتار, القا اتاپ كورسەتكەندەي, اكىمشىلىك جاۋاپكەرشىلىككە تارتىلىپ وتىرعان نەمەسە جەكە باسىن كۋالاندىراتىن, جۇرگىزۋشى كۋالىگىن, م ۇلىك قۇقىعىن تىركەۋ تۋرالى قۇجاتتاردى الۋعا كەلگەن كەز كەلگەن ادامدى ارنايى ەسەپتەر بويىنشا تەكسەرۋ ءمىندەتتى بولۋى ءتيىس. وسى ماقساتتا تىركەۋشى ورگاندارعا ىزدەستىرىلۋشى ادامدار تۋرالى مالىمەتتەر قورىنا ەنۋگە قۇقىق بەرۋ تەتىكتەرىن جاساۋ مىندەتى قويىلدى.
سونداي-اق, ماجىلىستە قاماۋعا الىنعانداردى جانە باس بوستاندىعىنان ايىرۋ ورىندارىندا قىلمىستىق جازالارىن وتەپ جاتقانداردى مەديتسينالىق قامتاماسىز ەتۋ جاعدايى تۋرالى ماسەلە جان-جاقتى تالقىلاندى.
سوتتالعاندار اراسىندا تۋبەركۋلەزدى ۋاقتىلى تەكسەرۋ مەن دياگنوستيكا جاساۋعا ارنايى اپپاراتتاردىڭ بولماۋى كەرى اسەرىن تيگىزىپ وتىر. مىسالعا, رەنتگەن اپپاراتتاردىڭ جەتىسپەۋشىلىگى 46 پايىزدى قۇرايدى. دياگنوستيكا جاساۋدى جانە سوتتالعانداردى مامانداندىرىلعان مەكەمەلەرگە جىبەرۋدى ۋاقتىلى جۇرگىزبەۋ سالدارىنان تۇزەۋ مەكەمەلەرىندە تۋبەركۋلەزبەن اۋىرۋ دەڭگەيى ازاماتتىق سەكتورمەن سالىستىرعاندا 16 ەسە جوعارى بولىپ وتىر.
سوندىقتان ىشكى ىستەر مينيسترلىگىنە سوتتالعانداردى اۋرۋ بويىنشا بوساتۋدان باس تارتۋعا سەبەپ بولعان ارنايى مەديتسينالىق كوميسسيالاردىڭ نەگىزسىز قورىتىندىلار بەرۋ فاكتىلەرىن مۇقيات تەكسەرۋ, سونداي-اق دەنى ساۋ سوتتالعانداردى تۋبەركۋلەزگە قارسى مەكەمەلەرگە نەگىزسىز اۋىستىرىپ جىبەرۋ وقيعالارىنا تۇبەگەيلى باعا بەرۋ تاپسىرىلدى.
الەكساندر تاسبولاتوۆ.
