قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى قالمۇحانبەت قاسىموۆ پەن وزبەكستان رەسپۋبليكاسىنىڭ پرەزيدەنتى جانىنداعى قاۋىپسىزدىك كەڭەسىنىڭ حاتشىسى ۆيكتور ماحمۋدوۆتىڭ توراعالىعىمەن جانە ورتالىق مەملەكەتتىك ورگاندار باسشىلارىنىڭ قاتىسۋىمەن وتكەن كەلىسسوزدەر بارىسىندا قاۋىپسىزدىكتى قامتاماسىز ەتۋدىڭ وزەكتى مىندەتتەرى قارالدى.
تاراپتار كونترابانداعا قارسى ءىس-قيمىل جانە كەدەن زاڭناماسىن بۇزۋشىلىقتار بويىنشا شەكارالىق قىزمەتتەر مەن كەدەن ورگاندارىنىڭ ءوزارا ءتيىمدى ارەكەتتەستىگىن ارتتىرۋ ماسەلەلەرىن تالقىلادى. قازاقستان-وزبەكستان مەملەكەتتىك شەكاراسىنداعى وتكىزۋ بەكەتتەرى مەن اۆتوموبيل جولدارىن قايتا قۇرۋ جانە جاڭعىرتۋ, ىرگەلەس اۋماقتى جايلاستىرۋ جونىندەگى جول كارتاسىنىڭ تارماقتارىن ورىنداۋ بارىسى قارالدى.
كەلىسسوزدەردىڭ كۇن تارتىبىنە ورتالىق ازياداعى تاتۋ كورشىلىك پەن ءوزارا سەنىمدى ودان ءارى نىعايتۋ بويىنشا شارالار ەنگىزىلدى. ەكى مەملەكەتتىڭ وكىلدەرى اۋعانستانداعى جاعدايدىڭ اياسىندا ءوڭىر قاۋىپسىزدىگى جانە ونىڭ تۇراقتى دامۋى ماسەلەلەرىن تالقىلادى.
سونىمەن بىرگە, تاراپتار ءدىني ەكسترەميزمنىڭ الدىن الۋ سالاسىندا جيناقتاعان تاجىريبەلەرىمەن جانە ۇسىنىمدارىمەن الماستى.
جۇمىس قورىتىندىسى بويىنشا ەكى ەلدىڭ ءتيىستى مەملەكەتتىك ورگاندارىنا ناقتى تاپسىرمالار بەرىلدى.
