«ديماشتىڭ نۇر-سۇلتاندا وتەتىن كونتسەرتىنەن باسقا تاعى ءبىر جوبامىز - ءانشى تۋرالى دەرەكتى فيلم. ول جونىندە ءبىز ءبىر ۋاقىتتا كەلىستىك. وتكەن جىلى ديماشتىڭ كونتسەرتىن ۇيىمداستىرۋ جونىندە اقىلداسىپ جاتقان ۋاقىتتا, دەرەكتى فيلم تۇسىرسەك دەگەن ۇسىنىس ايتقان ەدىك. ونىڭ شىعارماشىلىعىنا قىزىعۋشىلىق وتە ۇلكەن», - دەدى «قازاقستان» رترك» اق باسشىسى ەرلان قارين.
«بۇل فيلمدە بۇرىن جاريالانباعان ءتۇرلى بەينەماتەريالدار كورسەتىلەتىن بولادى. وعان دايىندىق بارىسىندا ءبىزدىڭ كوماندا ءانشىنىڭ ماسكەۋدەگى كونتسەرتىنە باردى. ارىپتەستەرىمەن ارنايى سۇحباتتار ءتۇسىردى. ماسكەۋدەگى كونتسەرتىنەن كەيىن قىتايعا ساپارعا اتتانىپ, حۋنان ارناسىنداعى ۇلكەن شوۋعا قاتىستى. ءبىز شوۋدىڭ تۇسىرىلىمىنە دە قاتىسىپ, ول جاقتا دا قىتايداعى دوستارى مەن ارىپتەستەرى تاراپىنان سۇحباتتاردى تۇسىردىك. ارينە, نەگىزگى ءتۇسىرىلىم نۇر-سۇلتاندا 29 ماۋسىمدا وتەتىن كونتسەرتىنە بايلانىستى بولدى. وقيعا جەلىسى وسىنىڭ نەگىزىندە قۇرىلادى. بۇل - ديماشتىڭ ەڭ ۇلكەن كونتسەرتى. البەتتە, ديماشتىڭ الەمنىڭ ءار تۇكپىرىندە كونتسەرتى ءوتىپ جاتىر. بىراق, بۇل ەڭ اۋقىمدى كونتسەرتى بولادى دەپ ويلاپ وتىرمىز», - دەيدى ەرلان قارين.
«قازاقستان» تەلەارناسىنىڭ باسقارما توراعاسىنىڭ ايتۋىنشا, فيلم كۇزدە كورسەتىلەدى.
