ۇكىمەت • 02 ءساۋىر، 2019

ەەو مۇشە مەملەكەتتەر شەكاراسىندا 32 ۆەتەريناريالىق جانە فيتوسانيتاريالىق باقىلاۋ پۋنكتى ورناتىلادى

276 رەتكورسەتىلدى

رەسەيدەگى الدىن الا حابارلاۋ پۋنكتەرى سەكىلدى قازاقستان ساۋىردەن باستاپ ەۋرازيالىق ەكونوميكالىق وداققا مۇشە مەملەكەتتەرمەن شەكاراعا جاقىن جەرلەردە 32 ۆەتەريناريالىق جانە فيتوسانيتاريالىق باقىلاۋ پۋنكتىن ورناتۋدا. بۇل تۋرالى اۋىل شارۋاشىلىعى ءمينيسترى ساپارحان وماروۆ «ۆەتەريناريالىق جانە فيتوسانيتاريالىق (كارانتيندىك) قاۋىپسىزدىك ماسەلەلەرى تۋرالى» ۇكىمەتى وتىرىسىنداعى بايانداماسىندا ايتتى.

«ءاربىر باقىلاۋ پۋنكتى قازاقستاننىڭ باسقا دا قىزمەتتەرىمەن جانە شەكارالاس ەۋرازيالىق ەكونوميكالىق وداققا مۇشە مەملەكەتتەردىڭ وسىعان ۇقساس قىزمەتتەرىمەن ءوزارا اقپاراتتىق ءىس-قيمىل جاساسۋ ءۇشىن تەحنيكالىق جاراقتاندىرىلعان. سونداي-اق ءاربىر باقىلاۋ بەكەتىندە ەكسپرەسس-تالداۋ جۇرگىزۋگە ارنالعان جىلجىمالى زەرتحانا جانە كەرى قايتارۋ مۇمكىن بولماعان، ەل اۋماعىن زالالداۋ قاۋپى جوعارى بولعان اسا قاۋىپتى جۇكتەردى جويۋعا ارنالعان قازىرگى زامانعى پەش (ينسەنيراتور) بار»، دەيدى مينيستر.

ونىڭ ايتۋىنشا، اتالعان پۋنكتتەردە تاۋارلاردىڭ كەلىپ-كەتۋىنە باقىلاۋ جۇرگىزۋ باسقا دا مەملەكەتتىك ورگانداردىڭ ءوزارا ءىس-قيمىل جۇرگىزۋىن قاجەت ەتەدى.


ماسەلەن، شەكاراشىلار مەن كەدەنشىلەردەن تاۋارلاردىڭ شەكارا ارقىلى وتكەنى تۋرالى شۇعىل اقپاراتتى باقىلاۋ پۋنكتتەرىنە جەتكىزۋ، ىشكى ىستەر دەپارتامەنتىنىڭ اۆتوينسپەكتورلارىنان جانە كولىك كوميتەتىنىڭ كولىكتىك باقىلاۋ ينسپەكتورلارىنان كولىك قۇرالدارىن توقتاتۋ جانە قۇجاتتارىن تەكسەرۋ، قاجەت بولعان جاعدايدا، كەرى قايتارىلاتىن جۇكتەردى شەكاراعا دەيىن الىپ ءجۇرۋ بويىنشا جاردەم قاجەت بولادى.


بۇل تاۋارلاردىڭ يمپورتى مەن ءترانزيتىن ءتيىمدى باقىلاۋعا، ۆەتەريناريالىق، فيتوسانيتاريالىق جانە تاماق قاۋىپسىزدىگى تالاپتارىنا، سونداي-اق تەحنيكالىق رەگلامەنتتەرگە سايكەس كەلمەيتىن ونىمدەردى ەل اۋماعىنا كىرگىزۋگە جول بەرمەۋگە مۇمكىندىك بەرەدى.


«شەكارادا باقىلاۋدىڭ كۇشەيتىلۋى اسا قاۋىپتى اۋرۋلار بويىنشا ەلىمىزدى سالاماتتى دەپ تانۋ ماسەلەلەرىندە بۇعان دەيىن قول جەتكىزىلگەن جەتىستىكتەردى ساقتاپ قالۋعا جانە شوشقالاردىڭ كلاسسيكالىق وباسى، قۇس تۇماۋى بويىنشا سالاماتتى ەكەنىمىزدى تانىتۋعا كومەكتەسەدى. ال بۇل ءوز كەزەگىندە ەكسپورت گەوگرافياسىن كەڭەيتۋگە جانە قازاقستاندىق ءونىم ەكسپورتىنىڭ كولەمىن ارتتىرۋعا مۇمكىندىك بەرەدى»، دەدى ساپارحان وماروۆ.


مۇنداي جۇمىستى جۇرگىزۋدىڭ ماڭىزدى ەكەنىنە بارلىق باقىلاۋ-قاداعالاۋ ورگاندارى، ونىڭ ىشىندە باس پروكۋراتۋرا دا تۇسىنىستىكپەن قاراۋى ءتيىس.
سونداي-اق جەرگىلىكتى اتقارۋشى ورگاندارمەن، قوعامدىق بىرلەستىكتەرمەن، حالىقارالىق ۇيىمدارمەن ۆەتەريناريالىق جانە فيتوسانيتاريالىق سالاماتتىلىقتى قامتاماسىز ەتۋ بويىنشا بىرلەسىپ جۇمىس ىستەۋ ماڭىزدى. 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار