بوزجايناق دۇنيەنىڭ بويىنا ءنار جۇگىرتكەن, ناۋرىز مەرەكەسى كۇندەرى داۋىسى كوكتە دامىلداعان ديماشىمىز ماسكەۋدىڭ كرەمل سارايىندا ءان سالىپ القالاعان الەۋمەتتىڭ ايىزىن ءبىر قاندىرىپ قايتقان ەدى. ەندى مىنە, سول ساحنادا «استانا وپەرا» تەاترىنىڭ بالەت ترۋپپاسى بيلەمەك. ولار الداعى ءساۋىر ايىندا وتەتىن «ۆاتسلاۆ نيجينسكي. ورىس بالەتىنىڭ كەمەڭگەرى» اتتى عالامات گالا-كونتسەرتكە قاتىسۋعا شاقىرتۋ الدى. ايتۋلى ونەرلەرىنىڭ ارقاسىندا تالاي جەردى ارالاعان استانالىقتار وندا جاھاندىق حورەوگرافيا جاۋھارلارىنىڭ ءبىرى – ايگىلى كومپوزيتور ن.ريمسكي-كورساكوۆتىڭ مۋزىكاسىنا مايتالمان حورەوگراف م.فوكين قويعان «شەحەرازادا» بالەتىن اپارادى. تاسى ورگە دومالاعان شىعارماشىل توپتىڭ جەتەكشىسى, رەسەي حالىق ءارتىسى التىناي اسىلمۇراتوۆانىڭ ايتۋىنا قاراعاندا, بۇل ساپاردىڭ ءجونى بۇرىنعىلاردان بولەكتەۋ كورىنەدى. ەۋروپا قالالارىنداعى گاسترولدەرىن تابىستى اياقتاعان تالانتتى ۇجىم وسى جولى دا كورەرمەن كوڭىلىن كونشىتەرلىك دەڭگەيدە ونەر كورسەتۋدى كوزدەپ وتىر.
ارينە, مايەكتى مادەني شارانىڭ ءمان-ماڭىزىن ارتتىرار شىرايلى شىعارمالاردىڭ از بولماسى انىق. ءداستۇرلى بي دۋمانىن ۇيىمداستىرۋشى رەسەيدىڭ حالىق ءارتىسى اندريس ليەپا ىرىكتەگەن ىلىپالارلىق قويىلىمدار قاتارىندا «ۇيقىداعى ارۋ», «جيزەل», «قاسيەتتى كوكتەم», «پەترۋشكا», «تاليسمان» سەكىلدى بالەتتەر بار. دەگەنمەن دە كەرەمەت كەشتىڭ ءسانىن ءبىزدىڭ ونەرپازدار كىرگىزەتىنىنە سەنگىمىز كەلەدى. ويتكەنى باس-اياعى ەكى ءبولىمنەن تۇراتىن باعدارلامانىڭ تەڭ جارتىسى قازاقستاندىقتاردىڭ ۇلەسىنە تيگەلى تۇر.
تالايدى تامساندىرار تاماشا گالا-كونتسەرتكە «كوۆەنت-گاردەن» كورولدىك تەاترىنىڭ پرەمەرى ۆاديم مۋنتاگيروۆ, سانكت-پەتەربۋرگتەگى ماريا تەاترىنىڭ ساڭلاعى يۋليا ماحالينا, رەسەيدىڭ ۇلكەن تەاترىنىڭ پريماسى ەلەنورا سەۆەنارد سەكىلدى بالەت جۇلدىزدارى قاتىسادى. باق تا, باپ تا سىنالاتىن باسەكەدە باقتيار ادامجان, اناستاسيا زاكلينسكايا, جانىبەك يمانقۇلوۆ, يلدار شاكيرزيانوۆ جانە باسقا ەلوردالىق جاس دارىندار جارقىراپ كورىنەرىنە شەك كەلتىرمەيمىز.
تالعات باتىرحان,
«Egemen Qazaqstan»
