«بيىل رەسپۋبليكالىق ۆەتەريناريالىق زەرتحانا شەكارا ماڭىنداعى جانە ەكسپورتقا باعدارلانعان اۋدانداردا 4 زەرتحانانى اككرەديتتەۋدى, 28 اۋداندىق زەرتحانانى ماتەريالدىق-تەحنيكالىق تۇرعىدان جاراقتاندىرۋدى, دياگنوستيكا مەن تاماق قاۋىپسىزدىگى بويىنشا كورسەتىلەتىن قىزمەتتەر تىزبەسىن كەڭەيتۋدى جوسپارلاپ وتىر» دەدى س.وماروۆ.
ونىڭ ايتۋىنشا, ۆەتەريناريالىق قىزمەتتەردى ورنالاستىرۋ بويىنشا شەشىمىن تاپپاعان مىناداي ماسەلەلەرى بار. مىسالى, 2013-2014 جىلدارى جەرگىلىكتى اتقارۋشى ورگاندار جانىنان قۇرىلعان 2 534 ۆەتستانتسيا مەن ۆەتپۋنكتتىڭ تەك 33%-ى (834) عانا ءوز ءۇي-جايلارىندا ورنالاسقان, 63%-ى (1 585) اكىمدىكتەردە نەمەسە باسقا دا ۇيىمدارمەن بىرگە ورنالاسقان, ۆەتپۋنكتەردىڭ 4%-ىندا (115) ءۇي-جاي جوق.
«431 ۆەتستانتسيا مەن ۆەتپۋنكت ءۇي-جايلارىنا كۇردەلى جوندەۋ جۇرگىزۋ قاجەت, 13 374 لاۋازىمدىق بىرلىكتىڭ 537-ءسى (4%) بوس ورىن, 3 764 تەحنيكادان 130 تەحنيكا (3%-ى) پايدالانىلمايدى» دەدى ول.
سونداي-اق ول فيتوسانيتاريالىق جانە وسىمدىكتەر كارانتينى جونىندەگى ىس-شارالار تۋرالى ءسوز ەتتى.
«فيتوسانيتاريا (كارانتين) سالاسىنداعى ءىس-شارالاردى قارجىلاندىرۋعا 34,6 ملرد تەڭگە كوزدەلگەن. بۇل وتكەن جىلعى دەڭگەيدەن 7,2 ملرد تەڭگەگە ارتىق. 2019 جىلى اسا قاۋىپتى زياندى ورگانيزمدەر مەن كارانتيندىك وبەكتىلەرگە قارسى ءىس-شارالار جۇرگىزۋگە وتكەن جىلى 3,6 ملرد تەڭگە بولىنسە, بيىل 4,9 ملرد تەڭگەگە جۋىق قارجى ءبولىندى. پەستيتسيدتەر, ولاردى ساقتاۋ, تاسىمالداۋ جانە قولدانۋ جونىندەگى كورسەتىلەتىن قىزمەتتەر ساتىپ الىنىپ قويدى» دەدى ساپارحان وماروۆ.
بۇدان سوڭ, ول ءساۋىر ايىنىڭ ەكىنشى ونكۇندىگىندە وڭتۇستىك وڭىرلەردە شەگىرتكە زيانكەستەرىنە قارسى حيميالىق وڭدەۋ جۇرگىزىلەتىنىن ايتتى.
ەسكە سالا كەتەيىك, ەلىمىزدىڭ فيتوسانيتاريالىق قىزمەتى 2018 جىلى اسا قاۋىپتى زياندى ورگانيزمدەر مەن كارانتيندىك وبەكتىلەر (كارتالار) بويىنشا ەل اۋماعىن وڭىرلەندىرۋ جۇمىسىن جۇرگىزدى.
