«استانا LRT» جشس باسقارماسىنىڭ توراعاسى بەكمىرزا يگەنبەردينوۆ قالالىق اكىمدىكتە وتكەن وتىرىستا قالاداعى جولاۋشىلار تاسىمالى سالاسىندا جول قاۋىپسىزدىگىن قامتاماسىز ەتۋ بويىنشا ءىس-شارالار جوسپارىنىڭ جوباسى جول قوزعالىسى قاۋىپسىزدىگى بويىنشا كەشەندى تالداۋ جانە زەرتتەۋلەر (قاۋىپتى ايماقتاردى باعالاۋ, اۆتوتۇراقتار, جىلدامدىقتى شەكتەۋ جانە ت.ب.) جۇرگىزۋدى تالاپ ەتەتىندىگىن جەتكىزدى. سونىمەن قاتار, كولىك زاڭناماسىن ساقتاۋ جانە بۇزۋشىلىقتاردى بولدىرماۋ ءۇشىن مەملەكەتتىك ورگاندارمەن بىرلەسىپ قاداعالاۋ, تەكسەرۋ, مونيتورينگ جۇرگىزىلەدى.
ونىڭ ايتۋىنشا, 28 ناۋرىزدان باستاپ جولاۋشىلار اۆتوكولىك قۇرالدارىن كۇندەلىكتى الدىن-الا تەكسەرۋ جانە جۇرگىزۋشىلەردى مەديتسينالىق تەكسەرۋدەن وتكىزۋگە ارنالعان ەكى ايلىق وتكىزىلەتىن بولادى.
«ەلوردالىق اۆتوبۋس پاركتەرى اۆتوبۋستاردى باعدارلارعا شىعارۋ ەرەجەسىن تولىعىمەن قايتا قاراستىرادى. قازىرگى تاڭدا ءتيىستى كەڭەستەر تۇزىلگەن جانە وندا اۆتوبۋس جۇرگىزۋشىلەرىنىڭ جەكە كەلىسىمشارتتارىن قايتا قاراستىرۋ دا بار. ناقتىراق ايتقاندا, مىندەتتى مەديتسينالىق تەكسەرىستى 1 جىلدان 6 ايعا قىسقارتۋ كوزدەلۋدە», – دەدى بەكمىرزا يگەنبەردينوۆ.
2019 جىلدىڭ باسىنان باستاپ قالالىق ىكومەك مونيتورينگ جانە جەدەل ارەكەت ەتۋ ورتالىعىنا 82 مىڭ شاعىم تۇسكەن. بۇل – كەستەنى ساقتاماۋ, ەكيپاجدىڭ بۇرىس ارەكەتى, ايالدامادان ءوتىپ كەتۋ سياقتى بۇزۋشىلىقتارعا قاتىستى شاعىمدار.
«قالا تۇرعىندارىنىڭ قاۋىپسىزدىگى مەن كورسەتىلەتىن قىزمەتتەردىڭ ساپاسى ءبىرىنشى ورىندا تۇرۋى ءتيىس. اسىرەسە, قوعامدىق كولىكتە قاۋىپسىزدىكتى قامتاماسىز ەتۋ اسا ماڭىزدى», – دەدى باقىت سۇلتانوۆ.
وتىرىس قورىتىندىسى بويىنشا قالا اكىمى جول قوزعالىسى قاۋىپسىزدىگىن باقىلاۋ كۇشەيتىلەتىنىن تىلگە تيەك ەتىپ, ءتيىستى قالالىق باسقارمالاردىڭ باسشىلارىنا بىرقاتار ناقتى تاپسىرما بەردى.
پوليتسيا دەپارتامەنتى, كولىك جانە جول-كولىك ينفراقۇرىلىمىن دامىتۋ باسقارماسىنا «Bus Lane» جولاقتارى بويىنشا نەگىزگى اعىننىڭ ىلەسپە باعىتىندا كولىك قۇرالدارىنىڭ جىلدامدىعىن 40 كم/ساع دەيىن, قارسى باعىتتاعى كولىك قۇرالدارىنىڭ جىلدامدىعىن 30 كم/ساع دەيىن شەكتەۋ; جولداعى ەسكەرتۋ جانە تىيىم سالۋ بەلگىلەرىن ازايتۋ جۇكتەلدى.
قوعامدىق دەنساۋلىق ساقتاۋ باسقارماسى بارلىق جۇرگىزۋشىلەر مەن كونسۋلتانتتاردان ەسىرتكى قۇرالدارىن, جوعارى/تومەن قان قىسىمىمەن زارداپ شەگەتىن سوزىلمالى اۋرۋلار فاكتىلەرىن انىقتاۋ ءۇشىن كەشەندى تالداۋ جۇرگىزۋى ءتيىس.
پوليتسيا دەپارتامەنتى ينۆەستيتسيالار جانە كاسىپكەرلىكتى دامىتۋ باسقارماسىمەن بىرلەسىپ جۇك كولىگىنىڭ قوزعالىسىن شەكتەۋ تۋرالى اكىمدىك قاۋلىسىنىڭ ورىندالۋىنا باقىلاۋدى كۇشەيتۋى; «سەرگەك» جۇيەسى ارقىلى جۇك كولىگى قوزعالىسىن شەكتەۋ تۋرالى جول ەرەجەسىن بۇزۋشىلىقتاردى اۆتوماتتى تىركەۋدى ەنگىزۋى قاجەت.
كولىك جانە جول-كولىك ينفراقۇرىلىمىن دامىتۋ باسقارماسى جانە «استانا LRT» جشس-نە قوعامدىق كولىك جۇرگىزۋشىلەرىنىڭ مەديتسينالىق كۋالاندىرۋ راسىمىنەن ءوتۋىن تسيفرلاندىرۋ جۇمىستارىن جۇرگىزۋ تاپسىرىلدى.
