- مەنىڭشە, ماۋسىم ءبىز ءۇشىن ءساتتى ءوتتى. بۇل باس باپكەر رەتىندەگى العاشقى ماۋسىمىم, سول سەبەپتى, الدىما قويعان مىندەتتەردى ورىنداي الدىم. دالەل رەتىندە ءتورت بىردەي ەل رەكوردىنىڭ جاڭارتىلۋىن ايتار ەم. ونىڭ ەكەۋى ەكاتەرينا ايدوۆانىڭ ەنشىسىندە. ال دميتري موروزوۆ, دەميان گاۆريلوۆ پەن ۆيتالي ششيگولەۆتەر كوماندالىق سىندا رەكوردقا قول جەتكىزدى.
ماۋسىمداعى سوڭعى كەزەڭدە دميتري موروزوۆ 10 شاقىرىمدىق باسەكەدە ەل رەكوردىنا تۇزەتۋ ەنگىزدى. ايتپاقشى, ول مەنىڭ 2013 جىلى ورناتقان رەكوردىمدى بۇزعانىن ەسكەرۋ كەرەك.
بارلىق سپورتشىلار جارادى. ماۋسىم بويى قيىندىقتارعا قاراماستان, ءساتتى ونەر كورسەتتى. ولاردىڭ كوپشىلىگى ءۇشىن بۇل ەرەسەكتەر اراسىنداعى العاشقى ماۋسىم ەدى. سوندىقتان, الەمنىڭ ۇزدىك سپورتشىلارىمەن ءبىر قاتاردا جارىسۋ وڭاي بولماعانى انىق.
كەلەسى جىلى وتەتىن الەم كۋبوگى كەزەڭدەرىندە 1500 مەتر جانە 5 شاقىرىمدىق جارىسقا قاتىسۋ ءۇشىن تاعى قوسىمشا ەكى ورىن ۇتىپ الدىق. وسىلايشا, حالىقارالىق سىندارعا قاتىساتىن ءبىزدىڭ كوماندا قۇرامى تاعى دا ۇلعايا تۇسپەك. نەگىزى, بۇل وتكەن ماۋسىمعا قويىلعان باستى مىندەت بولاتىن. الايدا, كوپتەگەن فاكتورلار, اسىرەسە, جاراقات الۋ قاۋپى كەرى اسەرىن تيگىزدى.
ماسەلەن, ەكاتەرينا ايدوۆا بۇكىل ماۋسىم بويى تىزەسىندەگى جاراقاتىنا قاراماستان ايدىنعا شىقتى. الەم كۋبوگى كەزەڭدەرىنىڭ فينالىندا ول ناعىز بابىندا ەدى. ءوزىنىڭ رەكوردىن جاڭارتتى, دەسە دە, بۇدان ۇلكەن كورسەتكىشكە قول جەتكىزۋ مۇمكىندىگى بار ونىڭ. كەيىن كانادانىڭ اشىق كۋبوگىندە 1500 مەتردە توپ جارىپ, قازاقستان رەكوردىنا وزگەرتۋ ەنگىزدى.
- ءسىز ۇلتتىق قۇراما تىزگىنىن بىلتىر الدىڭىز. كوماندانى دامىتىپ, ناتيجەنى جاقسارتۋ ءۇشىن ۋاقىت جەتكىلىكتى بولدى ما؟
- ءبىز العاشقى جارىستاردان كەيىن-اق وزىمىزگە نە قاجەت ەكەنىن تۇسىنە باستادىق. بۇگىندە ولقى تۇستارىمىزدى جەتىلدىرىپ, الداعى ماۋسىمعا جوسپار قۇرۋدامىز. بىزگە ءوسۋ كەرەك, دامۋ كەرەك. ماۋسىم وتكەن سايىن دامي ءتۇسىپ, مەدال ءۇشىن باسەكەلەسە الاتىن جاعدايعا جەتۋ قاجەت. ءاربىر تۋرنيردەن سوڭ جاتتىعۋ كەزەڭىن سارالاپ, ناتيجەنى مەيىلىنشە جوعارىلاتۋ ءۇشىن ەڭبەكتەندىك. ازىرگە بۇل مىندەتىمىزدى ويداعىداي اتقارىپ كەلەمىز.
- ايدوۆا ءۇشىن بيىلعى جىل ءساتتى ءوتتى دەپ ايتا الاسىز با؟
- اقپان ايىندا گوللانديادا وتكەن سپرينتەرلەر اراسىنداعى الەم چەمپيوناتىندا ايدوۆا وليمپيادا جۇلدەگەرلەرىن باسىپ وزىپ, 5-ءشى ورىنعا تۇراقتادى. ال 1000 مەترلىك سىندا قولا جۇلدە الۋ ءۇشىن وعان 0,8 سەكۋند جەتپەي قالدى. بيىلعى بەسىنشى ورىننىڭ قۇنى جوعارى. ويتكەنى, كاتيا جىلدامدىقتى ارتتىردى. بۇل كەلەسى ماۋسىمعا جاقسى كوڭىل-كۇيمەن دايىندالۋعا سەرپىن بەرەدى.
- دميتري, كومانداداعى رەزەرۆ ماسەلەسى تۋرالى نە ايتاسىز؟ كوشباسشىلاردىڭ ءىزىن باساتىن جاستار جاعى ءىرى دودالارعا دايىن با؟
- جاقىندا عانا باپكەرلەرمەن كەڭەس وتكىزىپ, كوماندا قۇرامى تۋرالى ءسوز قوزعادىق. ازىرگە, ۇلتتىق قۇرامادا جاڭا ەسىمدەر جوق. كوماندا قاتارىنا قوسىلاتىن جاستاردىڭ الدىنداعى ماقسات باسقا بولماق. ەرەسەكتەر اراسىنداعى تۋرنيرلەرگە قاتىسۋ ءۇشىن ولارعا بەلگىلى ءبىر ۋاقىتشا ءليميتتى ورىنداۋ قاجەت. وسى تۇرعىدان جۇمىس ىستەيمىز.
دەگەنمەن, كوماندا قۇرامانىڭ جاڭاراتىنى ءسوزسىز. الدا ازيا ويىندارى مەن وليمپيادا كەلە جاتىر. سول سەبەپتى, كوماندانى جاسارتۋدان باس تارتپايمىز. بۇگىندە ۇوك جانە فەدەراتسيا تاراپىنان قاجەتتى قولداۋدى سەزىپ وتىرمىز. سوندىقتان, تەك العا باسامىز.
