اقپاراتقا سۇيەنسەك, اپاتتا قازا بولعان 13 اسكەري قىزمەتشىنىڭ 8-ءى الماتى وبلىسىنىڭ تۋماسى. الدىمەن قازاقستان رەسپۋبليكاسىنىڭ قورعانىس ءمينيسترى, گەنەرال-مايور نۇرلان ەرمەكباەۆ ءسوز الىپ, مارقۇمداردىڭ وتباسى مەن جاقىن تۋىستارىنا كوڭىل ايتتى.
- ەلباسىمىز نۇرسۇلتان نازارباەۆتىڭ جانە قازاقستان پرەزيدەنتى قاسىم-جومارت توقاەۆتىڭ تاپسىرمالارى بويىنشا قازا تاپقان اسكەري قىزمەتشىلەردىڭ وتباسىلارىنا زاڭنامادا بەلگىلەنگەن بارلىق كەپىلدى كومەكتەر كورسەتىلەتىن بولادى. باسقا دا مورالدىق-ماتەريالدىق, پسيحولوگيالىق قولداۋلار جاسالادى. بۇل كومەك ءبىر جولعى كومەك بولماۋى كەرەك. مەن گارنيزوندار باستىقتارىنا قازاق تاپقان جاۋىنگەرلەردىڭ وتباسىلارىن قامقورلىققا الىپ, ولاردىڭ بالالارىن وقىتۋ, الەۋمەتتىك ماسەلەلەرىن شەشۋ شارالارىن اتقارۋدى تاپسىرامىن. قازا بولعانداردى ماڭگى ەستە ساقتاۋ ءۇشىن مەموريال تۇرعىزۋ جوسپارلانۋدا. قىزمەتتەستەرىمىز ءوز اسكەري بورىشىن ادال ورىنداعانىن ەسكەرە وتىرىپ, ولار مەملەكەتتىك ناگرادالارعا ۇسىنىلاتىن بولادى, - دەدى ن. ەرمەكباەۆ. سونىمەن قاتار جەتىسۋلىق ءتورت ازاماتتىڭ دەنەسى ءتيىستى مەديتسينالىق ساراپتامادان وتكىزىلۋ ۇستىندە ەكەنىن دە اتاپ ءوتتى.
وبلىس اكىمى اماندىق باتالوۆ تا اۋىر قايعىنى ءبولىسىپ, مارقۇم جاۋىنگەرلەردىڭ وتباسىلارىنا بارىنشا كومەك كورسەتىلەتىنىن ايتتى:
- «قايعىنى بولىسسەڭ, ازايادى» دەيدى حالقىمىز. بۇل قايعىلى وقيعا بارىمىزگە دە اۋىر ءتيدى. قانشا كومەك كورسەتكەنىمىزبەن, قايعىنى ءبولىسىپ كوڭىل ايتقانىمىزبەن, ازاماتتاردى قايتارا المايمىز. بولعان ىسكە بولاتتاي بەكەم بولىڭىزدار. ءبىزدىڭ ىنىلەرىمىز وزدەرىنىڭ بورىشتارىن ەلدىڭ الدىندا, وتاننىڭ الدىندا ادال وتەدى. مەن ءوز تاراپىمنان, الماتى وبلىسىنىڭ جۇرتشىلىعى اتىنان توپىراقتارى تورقا, جاندارى جانناتتا بولسىن دەيمىن. باتىر ۇلدارىمىزدىڭ اتتارىن ماڭگىگە ساقتاپ, ۇرپاققا ۇلگى ەتەمىز. ارتىندا قالعان بالالارىنا قامقورلىق جاساپ, ارقاشان كومەك كورسەتۋ – ءبىزدىڭ پارىزىمىز, - دەدى ا. باتالوۆ.
مۇنان سوڭ قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي سەرىكباي قاجى وراز, الماتى وبلىسى قارۋلى كۇشتەرى ارداگەرلەر كەڭەسىنىڭ باسشىسى راحىم قيرگاباكوۆ ءسوز الىپ, ازاماتتاردىڭ تاۋەلسىز ەلدىڭ تىنىشتىعىن كۇزەتۋ جولىندا كوز جۇمعانىن اتاپ ءوتتى. «قاھارمان جاۋىنگەرلەردىڭ ەسىمى جادىمىزدا ماڭگى ساقتالادى» دەدى ءوز سوزدەرىندە.
ميتينگىدە جاۋىنگەرلەردى ەسكە الىپ, ولاردىڭ قۇرمەتىنە اسپانعا وت اتىلىپ, گۇل شوقتارى قويىلدى.
بۇگىن تالدىقورعانمەن قاتار ەلىمىزدىڭ بىرقاتار وڭىرىندە جاۋىنگەرلەرمەن قوشتاسۋ ميتينگىلەرى ءوتتى. سونىڭ ىشىندە تالعار, كەربۇلاق اۋداندارىندا دا ءوتىپ, جۇرتشىلىق مايور تيمۋر قۇدايبەرديەۆ پەن لەيتەنانت اسلان ايتباەۆتى سوڭعى ساپراعا شىعارىپ سالدى. ال وزگە ءتورت مارقۇمنىڭ دەنەسى ءتيىستى ساراپتامادان ءوتۋ ۇستىندە. ساراپتاما اياقتالعاننان كەيىن, ول جاۋىنگەرلەرگە ارناپ وسىنداي راسىمدەر اتقارىلاتىن بولادى.
اتاپ وتسەك, الماتى وبلىسىنىڭ اكىمدىگى اسكەري جاتتىعۋ كەزىندە قازا بولعان جەتىسۋلىق ازاماتتاردىڭ وتباسىلارىنا 1 ملن. تەڭگەدەن كومەك كورسەتەتىن بولادى. سونىمەن قاتار جەرلەۋ راسىمدەرىن اتقارۋدى كوتەرىپ الماق.
