قازىر وڭىردە حالىقتىڭ از قامتىلعان بولىكتەرىن قولداۋعا قاتىستى قولعا الىنعان ءىس-شارالار كەشەنى تۇراقتى ءارى جۇيەلى سىيپات الىپ كەلەدى. بۇل ورايدا باستى باعدارلامالىق باعىت Nur Otan پارتياسىنىڭ XVIII سەزىندە قر-نىڭ تۇڭعىش پرەزيدەنتى, ەلباسى نۇرسۇلتان نازارباەۆ قويعان مىندەتتەردەن تامىر تارتادى. سوعان سايكەس وبلىستا اتاۋلى الەۋمەتتىك كومەك پەن ماتەريالدىق قولداۋعا اسا مۇقتاج جانداردى نەعۇرلىم كوبىرەك قامتۋ كوزدەلگەن.
بۇعان دەيىن باق-تا حابارلانعانىنداي بيىل اتاۋلى الەۋمەتتىك كومەك بەرۋ تارتىبىنە بىرقاتار وزگەرىستەر ەنگىزىلگەنى ءمالىم. ونى وقىرماندار نازارىنا تاعى ءبىر سالا كەتسەك: بۇرىن اتاۋلى الەۋمەتتىك كومەك تاعايىنداۋ ءۇشىن ەسەپكە الىناتىن تومەنگى كۇنكورىس دەڭگەيىندەگى ولشەم 14 849 تەڭگە بولسا, ەندى ونىڭ مولشەرى 20 789 تەڭگە قۇرايدى. سونىمەن قاتار ازاماتتاردىڭ ءوتىنىش-تىلەكتەرىنە وراي وتباسىنداعى جيىنتىق تابىستى ەسەپتەگەندە, التىن جانە كۇمىس القالى جانە كوپ بالالى انالارعا تولەنەتىن جاردەماقىلار, سونداي-اق ستۋدەنتتەردىڭ شاكىرتاقىسى ەسەپتەلمەيتىن بولدى.
وسى ورايدا وبلىستا اتاۋلى الەۋمەتتىك كومەك تولەۋ ءۇشىن اسا مۇقتاج وتباسىلارعا بيىلعى 2019 جىلى 3,5 ميلليارد تەڭگە كولەمىندە قاراجات جۇمساۋ قاراستىرىلعان. بۇل جونىندە گازەت تىلىشىسىنە اقتوبە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قايرات وتاروۆ ايتىپ بەردى. ونىڭ مالىمدەۋىنشە قازىرگى كۇنى وبلىستا از قامتىلعان جانە كوپ بالالى وتباسىلاردىڭ الەۋمەتتىك كارتاسى جاساقتالۋ ۇستىندە. ونىڭ اۋماعى مەن استارى مەيلىنشە كەڭ. مۇنداعى باستى ماقسات اتاۋلى الەۋمەتتىك كومەكتى وڭدى-سولدى ۇيلەستىرىپ, ماسىلدىق كوڭىل-كۇيدىڭ شوعىن قوزدىرۋ ەمەس, كەرىسىنشە ەڭبەكپەن قامتۋ اياسىن بارىنشا كەڭەيتۋ.
بۇل ءۇشىن وبلىستا ءوز ءىسى مەن كاسىبىن باستاۋعا بەل بۋعاندارعا شاعىن نەسيەلەر بەرۋگە باعىتتالعان اۋقىمدى جۇمىستار جۇرگىزىلۋدە. وڭىردە قازىرگى قالىپتاسقان الەۋمەتتىك احۋالدى ايقىنداپ ونى وڭ جولعا قويۋ ىسىندە وتكەن اقپان جانە ناۋرىز ايلارىندا وتكىزىلگەن «اشىق ەسىك كۇندەرى» جاقسى ناتيجەلەر بەرگەنىن ايتۋعا ءتيىسپىز. وسى شىرايلى شارا شەڭبەرىندە وكىلەتتى ورگان وكىلدەرىنە ءار ءتۇرلى كومەكتەر مەن كەڭەستەر سۇراپ كەلگەن ازاماتتاردىڭ جالپى سانى 5 200-دەن اسىپ تۇسكەن ەكەن. ولاردىڭ تالاپ-تىلەكتەرىنىڭ ءبىر دە ءبىرىنىڭ ەلەۋسىز ءارى ەسكەرۋسىز قالماعانىنىڭ ءوزى ءبىر مەرەي.
وسى تۇستا اتاپ وتەرلىك ءجايت تۇرعىندار تاراپىنان ەڭ ءجيى قوزعالعان ماسەلە – باسپانا بولىپتى. بۇعان بايلانىستى نە دەۋگە بولادى؟ اقتوبە وبلىستىق مەملەكەتتىك ساۋلەت-قۇرىلىس باسقارماسىنىڭ باسشىسى نۇرلان يماناليننىڭ ايتۋىنشا ايماقتا الداعى كەزدە تابىسى تومەن كوپ بالالى وتباسىلارعا جىلدىق ءوسىمى ەكى پايىزدان اسپايتىن قولجەتىمدى پاتەرلەر الۋ مۇمكىندىگى جاسالماق.
وبلىس ورتالىعىندا بۇل باعىتتاعى ارناۋلى قۇرىلىس جۇمىستارىن «نۇراقتوبە» جاڭا تۇرعىن ءۇي اۋماعىنان باستاۋ جونىندە شەشىم الىنعان. تابىسى از, تۇرمىس دەڭگەيى تومەن وتباسىلار مەن مۇقتاج جانداردىڭ كوپشىلىگى كوپ جاعدايلاردا العاشقى جارنانى تولەۋدىڭ وزىنە قينالىپ قالۋى ابدەن مۇمكىن. وڭىردە ماسەلەنىڭ بۇل جاعى دا ەسكەرىلگەن. ءسويتىپ ازاماتتاردىڭ مۇنداي سىيپاتتاعى توپتارىنا تۇرعىن ءۇي سەرتيفيكاتتارىن بەرۋ كوزدەلگەن. بۇل ءۇشىن وبلىستىق بيۋدجەتتەن ەكى ءجۇز ميلليون تەڭگە قاراجات بولىنگەن.
مىنە, وڭىردە قولعا الىنعان, حالىقتى الەۋمەتتىك تۇرعىدان قولداۋ شارالارىنىڭ كەيبىر مىسالدارى وسىنداي.
اقتوبە
