كەڭەس وتىرىسىن پارتيا وبلىستىق فيليالى توراعاسىنىڭ ورىنباسارى شابدەن تىلەۋمۇرات اشىپ, تاريحي وقيعانىڭ مەملەكەت ءۇشىن ماڭىزدىلىعىنا توقتالدى. ول ءوز سوزىندە تاۋەلسىزدىگىمىزدى الىپ, ەگەمەن ەل بولىپ قالىپتاسۋىمىزدا ەلباسىنىڭ ەتكەن ەرەن ەڭبەگىنە ەشكىمنىڭ دە كۇمانى جوق ەكەنىن اتاپ ءوتتى.
اۋەلى قر مادەنيەت قايراتكەرى الىبەك امزە ۇلى ءسوز الىپ, «ەڭسەمىز ءتۇسىپ, ەسىمىزدى جيناي الماي تۇرعاندا ەلباسى ەلورداعا جاڭا ەسىم بەرىپ, ەسەمىزدى قايتاردى» دەسە, اقىن, قازاقستاننىڭ ەڭبەك سىڭىرگەن قايراتكەرى قايىربەك اسانوۆ «سوناۋ توقسانىنشى جىلدارى الاتاۋدىڭ باۋرايى الماتىدان ايازى ازىناعان اقمولاعا كوشۋدى نۇرسۇلتان ءابىش ۇلى ءوزىنىڭ مۇددەسى ءۇشىن جاساعان جوق. سارىارقانىڭ تورىنە جاڭا استانانىڭ قازىعىن قاققان ەلباسىنىڭ سول كەزدەگى كورەگەن ساياساتى ەلدى العا قاراي جەتەلەدى», دەپ ءوز ويىن ءبىلدىردى. اقىن شىرىن ماماسەرىكوۆا مەركى اۋدانىندىق مۋزەيىندە قىزمەت اتقارىپ جۇرگەن كەزىندە ەلباسىمەن بىرنەشە رەت كەزدەسكەنىن ايتىپ, ەلباسىنا بىرنەشە ولەڭ ارناعانىن اڭگىمەلەدى. سونىمەن قاتار, قازاقستاننىڭ حالىق ءارتيسى ماكەن راقىمجانقىزى ەل ىشىندە ءتۇرلى پىكىرلەر بولعانىمەن, استانا اتاۋىنىڭ ەلباسىنىڭ اتىمەن اتالعانى قۇپتارلىق شەشىم ەكەنىن ايتىپ وتسە, ماحمۋد قاشقاري اتىنداعى ۇيعىر ەتنو-مادەني بىرلەستىگىنىڭ جەتەكشىسى مۋحابات تۋردىەۆا بۇگىنگى بەيبىتشىلىك پەن تاتۋلىقتىڭ ەلباسى ساياساتىنىڭ جەمىسى ەكەنىن جەتكىزدى.
جامبىل وبلىسى
