ۇكىمەتتىڭ جاڭا قۇرامى جاريالاندى
جۇما, 18 مامىر 2012 8:21
فرانتسيادا ۇكىمەتتىڭ جاڭا قۇرامى جاريا ەتىلدى. ەل پرەمەر-ءمينيسترى مىندەتىن جان-مارك ەرو اتقارا باستادى. قورعانىس ءمينيسترى ورىنتاعىنا جان-يۆ لە دريان, ەكونوميكا جانە قارجى ءمينيسترى ورىنتاعىنا پەر موسكوۆيسي, ال سىرتقى ىستەر ءمينيسترى ورىنتاعىنا لوران فابيۋس وتىردى.
جۇما, 18 مامىر 2012 8:21
فرانتسيادا ۇكىمەتتىڭ جاڭا قۇرامى جاريا ەتىلدى. ەل پرەمەر-ءمينيسترى مىندەتىن جان-مارك ەرو اتقارا باستادى. قورعانىس ءمينيسترى ورىنتاعىنا جان-يۆ لە دريان, ەكونوميكا جانە قارجى ءمينيسترى ورىنتاعىنا پەر موسكوۆيسي, ال سىرتقى ىستەر ءمينيسترى ورىنتاعىنا لوران فابيۋس وتىردى.
ىشكى ىستەر ءمينيسترى قىزمەتىن مانۋەل ۆالس, مادەنيەت ءمينيسترى قىزمەتىن ورەلي فيليپەتتي, ەڭبەك ءمينيسترى قىزمەتىن ميشەل ساپەن اتقاراتىن بولدى. بۇل فرانتسيا تاريحىندا ۇكىمەت قۇرامىندا ەرلەر مەن ايەلدەر سانى تەڭ تۇسكەن العاشقى وقيعا بولىپ تابىلادى. جاڭا كابينەتتىڭ العاشقى ءماجىلىسى كەشە ءوتتى. ال جان-مارك ەرو فرانتسيا پرەمەر-ءمينيسترى بولىپ 15 مامىردا تاعايىندالعان ەدى.
گرەكيادا ۋاقىتشا كابينەت جاساقتالدى
گرەكيادا اقىرى 17 ماۋسىمدا مەرزىمىنەن بۇرىن پارلامەنتتىك سايلاۋ ءوتكىزىلەتىن بولدى. ويتكەنى, ەلدە بەلگىلەنگەن ۋاقىتتا ۇكىمەت قۇرامى جاساقتالمادى. ءسويتىپ, گرەكيادا ۋاقىتشا كابينەتتىڭ قۇرامى جاريا ەتىلدى. ول سايلاۋعا دەيىن جۇمىس ىستەيتىن بولادى.
ۋاقىتشا پرەمەر-مينيستر بولىپ, بۇعان دەيىن حابارلانعانىنداي, مەملەكەتتىك كەڭەستىڭ باسشىسى پانايوتيس پيكرامەنوس تاعايىندالدى. قارجى ءمينيسترى مىندەتىن گەورگيوس زانياس, سىرتقى ىستەر ءمينيسترى مىندەتىن پەتروس موليۆياتيس, قورعانىس ءمينيسترى مىندەتىن فرانگوس فرانگۋليس اتقاراتىن بولدى. بارلىعى ۋاقىتشا ۇكىمەت قۇرامىنا 16 مينيستر كىردى. ۋاقىتشا كابينەتتىڭ وكىلەتتىلىگى شەكتەۋلى.
پحەنيان يادرولىق سىناق وتكىزە مە؟
وڭتۇستىك كورەيا بارلاۋ قىزمەتىندەگى دەرەك كوزىنە سىلتەمە جاساعان «رەنحاپ» اگەنتتىگى سولتۇستىك كورەيانىڭ يادرولىق سىناق جۇرگىزۋگە دايىندالىپ جاتقانىن حابارلادى. اگەنتتىكتىڭ دەرەكتەرىنە قاراعاندا, كحدر حامگەن-پۋكتو پروۆينتسياسىنداعى پوليگوندا جەراستى توننەلىن سالىپ جاتىر.
اتالعان جەردە بۇعان دەيىن ەكى رەت – 2006 جانە 2009 جىلدارى جەراستى يادرولىق جارىلىستارى جاسالعان كورىنەدى. ال جاڭا جەراستى جارىلىسىن جاساۋعا دايىندىق سوڭعى كەزەڭگە اياق باسسا كەرەك. بىراق يادرولىق سىناققا دايىندىق تۋرالى اقپاراتتى قۋاتتايتىن نەمەسە تەرىسكە شىعاراتىن رەسمي مالىمەت كحدر تاراپىنان ازىرشە تۇسكەن جوق.
باسقىنشىلىق زاڭىنان باس تارتپايدى
گرۋزيا ابحازيا مەن وڭتۇستىك وسەتياعا قاتىستى قابىلدانعان «باسىپ الىنعان اۋماقتار تۋرالى» زاڭنان باس تارتۋ تۋرالى نيەتى جوق ەكەنىن مالىمدەدى. بۇل مالىمدەمە گرۋزيانىڭ رەينتەگراتسيا ماسەلەلەرى ءجونىندەگى مەملەكەتتىك ءمينيسترى ەكا تكەشەلاشۆيليدىڭ اۋزىمەن جاسالدى.
ە.تكەشەلاشۆيلي حانىمنىڭ سوزىنە قاراعاندا, زاڭ تەك اتالعان اۋماقتار گرۋزيانىڭ يەلىگىنە قايتارىلعان جاعدايدا عانا كۇشىن جويۋى ىقتيمال. «اۋماعىنىڭ 20 پايىزىنان ايىرىلىپ وتىرعان ەل مۇنداي ارنايى زاڭ قابىلداۋعا تولىق قۇقىلى. ويتكەنى, بۇل زاڭدىق قۇجات اتالعان پروبلەمانىڭ تامىرىنا بالتا شابۋعا باعىتتالعان», دەيدى مەملەكەتتىك مينيستر.
ساراپشى-كريميناليست اتىلىپ ءولدى
كەشە ەرتەڭگىسىن قىرعىز رەسپۋبليكاسى ىشكى ىستەر مينيسترلىگىنىڭ عيماراتىندا ميليتسيا پودپولكوۆنيگى نادىر ابدىراحمانوۆ اتىلىپ ولگەن. بۇل تۋرالى اكيpress اگەنتتىگى حابارلادى. وزىنە ءوزى قول جۇمساعان ادام ءىىم-ءنىڭ ساراپشى-كريميناليستيكا ورتالىعىندا اعا ساراپشى بولعان ەكەن. ول جۇمىس ورنىندا كوز جۇمىپتى.
بۇقارالىق اقپارات قۇرالدارىنىڭ العاشقى حابارلارىندا ن.ابدىراحمانوۆتىڭ ءوزىن ءوزى ەكى رەت اتقانى ايتىلعان بولاتىن. كەيىنىرەك ىشكى ىستەر مينيسترلىگىندەگىلەر تاپانشا ءبىر مارتە اتىلعانى تۋرالى مالىمدەمە جاسادى. اۋەلدە ميليتسيا پودپولكوۆنيگىنىڭ وزىنە ءوزى نە سەبەپتى قول جۇمساعانى تۋرالى ءتۇرلى بولجامدار ايتىلعان ەدى. سوڭعىسى ول ءوزىن ابايسىزدا اتىپ العان دەگەنگە سايادى.
كيشينەۆتە قارالى شارالار ءوتتى
كەشە مولداۆيانىڭ استاناسى كيشينەۆ قالاسىندا مەملەكەتتىك تۋ تومەن ءتۇسىرىلىپ, ەۋرووداق تۋىنا قارا لەنتالار بايلاندى. مۇنداي قارالى شارا بۋحارەست بەيبىت كەلىسىمى بويىنشا بەسسارابيانىڭ رەسەي يمپەرياسى قۇرامىنا ءوتۋىنىڭ 200 جىلدىعىنا بايلانىستى ۇيىمداستىرىلدى.
وسىدان ەكى عاسىر بۇرىن بەسسارابيانىڭ باسىم بولىگىن قازىرگى مولداۆيا اۋماعى قۇرايتىن. ال 1918 جىلى بەسسارابيا رۋمىنياعا قوسىلسا, 1940 جىلى وڭىرگە باقىلاۋدى كەڭەس بيلىگى وزىنە قايتارىپ العانى بەلگىلى. 16 مامىر قارالى كۇن دەپ كيشينەۆ مەرى دورين كيرتواكەنىڭ وكىمى بويىنشا جاريالاندى. ليبەرالدار پارتياسىنىڭ سەركەسى ميحاي گيمپۋدىڭ پىكىرىنشە, بۇگىنگى كەدەيشىلىك, جەمقورلىق, باسقا دا كەسىرلەر باسقىنشىلىق ساياساتتىڭ سالدارى بولىپ تابىلادى.
قىسقا قايىرىپ ايتقاندا:
l ەۋرووداق ۋكرايناعا ەكس-پرەمەر, وپپوزيتسيالىق ساياساتكەر يۋليا تيموشەنكونى ەمدەۋگە قاتىسۋ ءۇشىن مەديتسينالىق ساراپشىلار جىبەرۋ نيەتىندە. بۇل جونىندە ەۋروپارلامەنت توراعاسى مارتين شۋلتس مالىمدەدى.
l سولتۇستىككورەيالىق كاتەر ەكيپاجى 29 قىتاي بالىقشىسىن اماناتقا العان. ەندى كحدر وكىلدەرى كەپىلدەگىلەردى بوساتۋ ءۇشىن تولەم تالاپ ەتىپ وتىرعان كورىنەدى. ءبىر قىزىعى – قىتايلىقتار تۇتقىنعا قحر-ءدىڭ, ياعني وزدەرىنىڭ اۋماقتىق سۋلارىندا الىنعان ەكەن.
l ۋكراينانىڭ سەۆاستوپول وكرۋگتىك اكىمشىلىك سوتى رەسەي قورعانىس مينيسترلىگىنەن 5 ميلليون رۋبل كولەمىندە جيناقتالىپ قالعان سالىقتىق قارىزدى ءوندىرىپ الۋ تۋرالى قاۋلى شىعاردى. قارىزدىڭ باسىم بولىگىن قوسىمشا قۇن سالىعى (ققس) قۇرايدى ەكەن.
l يندونەزيا اۋماعىندا اپاتقا ۇشىراعان رەسەيدىڭ Sukhoi Superjet-100 ۇشاعىنان تابىلعان «قارا جاشىكتە» ۇشقىشتاردىڭ سوڭعى ەكى ساعاتتاعى سويلەگەن سوزدەرى ساقتالىپ قالىپتى. ەندى سوزدەردى اجىراتۋ ءۇشىن جاشىك ماسكەۋگە جەتكىزىلەتىن بولادى.
ينتەرنەت ماتەريالدارى نەگىزىندە ازىرلەندى.
