قاقتىعىس قايتا باستالدى
سەنبى, 14 ءساۋىر 2012 7:17
سيريا مەن تۇركيانىڭ شەكاراسىندا سيريا ارمياسى مەن وپپوزيتسيالىق كۇشتەردىڭ اراسىندا قارۋلى قاقتىعىس ءجۇرىپ جاتىر.
بۇل وق اتۋدى توقتاتۋ تۋرالى حالىقارالىق كەلىسىمنىڭ العاش رەت ەلەۋلى تۇردە بۇزىلۋى بولىپ تابىلادى. ۇلىبريتانيادا ورنالاسقان سيريانىڭ ادام قۇقىقتارى جونىندەگى قاداعالاۋشى كەڭەسىنىڭ مالىمەتتەرى بويىنشا, جانجال شەكاراداعى حيربەت ءال-دجوز ەلدى مەكەنى ماڭايىندا تۋىنداعان. سول سياقتى ولار قاقتىعىس باستالعانعا دەيىن ەلدى مەكەن اۋماعىنا ۇكىمەت اسكەرلەرىنىڭ تانكتەرى ەنگىزىلگەنىن دە اتاپ كورسەتكەن. وڭىردە مىلتىق داۋىستارى ەستىلگەنىمەن, اۋىر ارتيللەريالىق اتقىلاۋلار مەن بومبالاۋلار تۋرالى حابارلار تۇسپەگەن كورىنەدى.
سەنبى, 14 ءساۋىر 2012 7:17
سيريا مەن تۇركيانىڭ شەكاراسىندا سيريا ارمياسى مەن وپپوزيتسيالىق كۇشتەردىڭ اراسىندا قارۋلى قاقتىعىس ءجۇرىپ جاتىر.
بۇل وق اتۋدى توقتاتۋ تۋرالى حالىقارالىق كەلىسىمنىڭ العاش رەت ەلەۋلى تۇردە بۇزىلۋى بولىپ تابىلادى. ۇلىبريتانيادا ورنالاسقان سيريانىڭ ادام قۇقىقتارى جونىندەگى قاداعالاۋشى كەڭەسىنىڭ مالىمەتتەرى بويىنشا, جانجال شەكاراداعى حيربەت ءال-دجوز ەلدى مەكەنى ماڭايىندا تۋىنداعان. سول سياقتى ولار قاقتىعىس باستالعانعا دەيىن ەلدى مەكەن اۋماعىنا ۇكىمەت اسكەرلەرىنىڭ تانكتەرى ەنگىزىلگەنىن دە اتاپ كورسەتكەن. وڭىردە مىلتىق داۋىستارى ەستىلگەنىمەن, اۋىر ارتيللەريالىق اتقىلاۋلار مەن بومبالاۋلار تۋرالى حابارلار تۇسپەگەن كورىنەدى.
يران ماسەلەسى تالقىلانباق
14 ساۋىردە بۇۇ قاۋىپسىزدىك كەڭەسىنىڭ بەس تۇراقتى مۇشەسى مەن گەرمانيا ىستامبۇلدا يراننىڭ يادرولىق پروبلەماسىنا قاتىستى كەلىسسوزدەردى ودان ءارى جالعاستىرماق.
يراننىڭ يادرولىق پروبلەماسىنىڭ تاعدىرىن ايقىنداۋدا تاعى ءبىر شەشۋشى كەزەڭ تۋىنداپ وتىر. يران كەلىسسوزدەرگە قاتىسۋ ارقىلى قىسىم كورسەتۋدى السىرەتىپ, ىقتيمال دەگەن اسكەري ارالاسۋدىڭ الدىن العىسى كەلەتىن ءتارىزدى. ال اقش بولسا, كەلىسسوزدەر كەزىندە يرانعا جاسالعان سانكتسيالار مەن قىسىمداردىڭ قالايشا ىقپال ەتكەنىن كورمەك نيەتتە. وسىنداي جاعدايدا يزرايل اقش-تى يرانعا قاتىستى قاتاڭ پوزيتسيا ۇستانۋعا شاقىرۋدا. ىستامبۇلداعى كەلىسسوزدىڭ ناتيجە بەرەرىنە سەنۋشىلەر از.
گۆينەيا-بيساۋدا توڭكەرىس بولدى
گۆينەيا-بيساۋ ارمياسى مەملەكەت باسشىسى سايلاۋىنىڭ ەكىنشى تۋرى قارساڭىندا اسكەري توڭكەرىس جاسادى.
اسكەريلەر استانانىڭ ۇلكەن بولىگىن, بيلىك پارتياسىنىڭ شتاب-پاتەرىن باسىپ الىپ, سونداي-اق ۇلتتىق راديو حابارلارىن توقتاتقان. پرەمەردىڭ جەكە كۇزەتى مەن قازىرگى بيلىكتى جاقتايتىن اسكەري بولىمدەردىڭ قارسىلىق كورسەتۋىنەن ەل پرەمەر-ءمينيسترىنىڭ رەزيدەنتسياسىن باسىپ الۋدىڭ ءساتى تۇسپەگەن كورىنەدى. سوعان قاراماستان, ۇكىمەت باسشىسى جانە پرەزيدەنت مىندەتىن اتقارۋشى رايمۋندو پەرەيرانىڭ تاعدىرى بەلگىسىز كۇيىندە قالىپ وتىر. ەرەۋىلگە پرەزيدەنتتىككە كانديداتتاردىڭ ءبىرى كۋمبا يالانىڭ سايلاۋ بارىسىندا كوپتەگەن بۇرمالاۋشىلىقتار ورىن العانى تۋرالى جاساعان مالىمدەمەسى سەبەپكەر بولعان سىڭايلى.
بۇرىنعى پرەمەرلەرگە قارسى زاڭ
ەگيپەت پارلامەنتى ەلدىڭ ەكس-پرەزيدەنتى حوسني مۋباراك اپپاراتىندا جۇمىس ىستەگەن پرەمەر-مينيسترلەر مەملەكەت باسشىسى لاۋازىمىنا سايلانا المايدى دەگەن زاڭ جوباسىن قابىلدادى.
اتالعان زاڭ جوباسى بۇرىنعى ۆيتسە-پرەزيدەنت جانە ۇستىمىزدەگى جىلدىڭ 23-24 مامىرىندا وتەتىن سايلاۋدا پرەزيدەنتتىككە كانديدات ومار سۋلەيمانعا قارسى باعىتتالعان كورىنەدى. بۇل زاڭ جوباسى ح.مۋباراكتىڭ ۇكىمەتىندە سوڭعى ون جىل ىشىندە قىزمەت ىستەگەن كەز كەلگەن پرەمەر-مينيسترگە قاتىستى بولماق. ەگيپەتتى باسقارىپ تۇرعان اسكەري كەڭەس پارلامەنت ۇسىنىسىن قۋاتتاعان جاعدايدا و.سۋلەيمان سايلاۋعا تۇسە المايتىن بولادى.
ەكس-پرەزيدەنت تۇتقىنعا الىندى
موڭعوليا وكىمەتى ەلدىڭ بۇرىنعى پرەزيدەنتى نامبارىن ەنحباياردى قاماۋعا الۋ جونىنەن ارنايى وپەراتسيا وتكىزدى.
موڭعوليانىڭ بۇرىنعى باسشىسىنا جاپپاي ءتارتىپسىزدىكتەر مەن جەمقورلىققا قاتىسى بار دەگەن ايىپ تاعىلىپ وتىر. ارناۋلى بولىمدەر بۇرىنعى مەملەكەت باسشىسىنىڭ قارسىلىعىن تويتارىپ, ونى تۇتقىنعا العان. ال ەنحباياردىڭ ءوزى بولسا, ءوز اتىنا تاعىلعان ايىپتاردىڭ ساياسي استارى بار دەپ ەسەپتەيدى. 2005-2009 جىلدارى بيلىكتە بولعان ەنحبايار 2008 جىلى ۋلان-باتوردا ورىن العان تارتىپسىزدىكتەرگە بايلانىستى تۇتقىندالىپ وتىر.
زىلزالانى پايدالانىپ, تۇرمەدەن قاشقان
يندونەزيادا ورىن العان جەر سىلكىنىسىنەن كەيىن ونداعان قىلمىسكەرلەر تۇرمەدەن قاشىپ شىققان.
كەيبىر اقپاراتتارعا قاراعاندا, سۋماترا ارالىنداعى اچەح قالاسىنداعى تۇرمەدەن كەم دەگەندە 32 سوتتالۋشى زاڭسىز قاشىپ كەتكەن. تۇرمە باسشىلىعى ءزىلزالا مەن تسۋنامي قاۋپىنە بايلانىستى جاسالعان دابىلعا وراي 221 تۇتقىندى وزگە جەرگە كوشىرگەن كورىنەدى. تۇرمەدەن قاشقان 63 قىلمىسكەر وسىنداي قولايلى ءساتتى پايدالانعان. كەيىنىرەك 13 ادام ءوز ەرىكتەرىمەن تۇرمەگە ورالسا, تاعى 18 ادامدى پوليتسيا قىزمەتكەرلەرى ۇستاعان. قازىرگى ۋاقىتتا 32 ادامنىڭ قاشىپ جۇرگەنى بەلگىلى بولىپ وتىر. دەگەنمەن, وكرۋگ پوليتسياسىنىڭ باسشىسى قاشقىنداردىڭ قاي جەردە جاسىرىنىپ جۇرگەندىگىن بىلەتىنىن مالىمدەگەن.
كورەيا مەرەكەگە دايىندالۋدا
زىمىران ۇشىرۋدىڭ ءساتسىز اياقتالعانىنا قاراماستان, كحدر كيم ير سەننىڭ 100 جىلدىعىن اتاپ وتەتىن بولادى.
راديو جانە تەلەارنالار ارقىلى بەرىلگەن «كۆانمەنسون-3» سپۋتنيگىنىڭ ءساتسىز ۇشىرىلعانى تۋرالى حابارلار ەل استاناسىنداعى احۋالعا ونشا اسەر ەتە قويماعان سىڭايلى. مۇندا كيم ير سەننىڭ تۋعانىنا 100 جىل تولۋ مەرەكەسىن 15 ءساۋىر كۇنى اتاپ ءوتۋ ءۇشىن قىزۋ دايىندىقتار جۇرۋدە. قالانىڭ ورتالىق الاڭىندا, اراسىندا ستۋدەنتتەر مەن مەكتەپ وقۋشىلارى بار, مىڭداعان جاستار مەرەكە كۇنى كورسەتىلەتىن شەرۋگە ازىرلىكتەرىن ودان ءارى شىڭداۋ ۇستىندە. رەسمي ەمەس مالىمەتتەرگە قاراعاندا, وسى كۇنى الاڭدا اسكەري پاراد وتپەكشى.
ينتەرنەت ماتەريالدارى نەگىزىندە ازىرلەندى.
