تاعى ءبىر ەل تاۋەلسىزدىگىن جاريالادى
سەنبى, 7 ءساۋىر 2012 8:02
ءماليدىڭ سولتۇستىك اۋداندارىن باقىلاۋىنا العان تۋارە تايپاسىنىڭ كوتەرىلىسشىلەرى وزدەرى باسىپ العان اۋماقتى تاۋەلسىز دەپ جاريالادى. فرانس-پرەسس اگەنتتىگىنىڭ حابارلاۋىنشا, 6 ساۋىردەن باستاپ بۇل اۋماق ازاۆاد مەملەكەتى دەپ اتالادى.
سەنبى, 7 ءساۋىر 2012 8:02
ءماليدىڭ سولتۇستىك اۋداندارىن باقىلاۋىنا العان تۋارە تايپاسىنىڭ كوتەرىلىسشىلەرى وزدەرى باسىپ العان اۋماقتى تاۋەلسىز دەپ جاريالادى. فرانس-پرەسس اگەنتتىگىنىڭ حابارلاۋىنشا, 6 ساۋىردەن باستاپ بۇل اۋماق ازاۆاد مەملەكەتى دەپ اتالادى.
ءماليدىڭ سولتۇستىك بولىگىندە تۇراتىن تۋارەگتەر ۇزاق جىلداردان بەرى ەل ۇكىمەتىنە تاۋەلسىز مەملەكەت قۇرۋ جونىندە ءوتىنىش ءبىلدىرىپ كەلگەن. ءتىپتى, ولارمەن پارتيزاندىق كۇرەس تە جۇرگىزىپتى. ناتيجەسىندە 4 ساۋىردە تۋارەگتىك كوتەرىلىسشىلەر مالي اسكەرلەرىمەن شايقاستا وزدەرى تالاپ ەتكەن اۋماقتى باسىپ العان. ناۋرىزدىڭ سوڭىندا بۇل ەلدە اسكەري توڭكەرىس بولعانى بەلگىلى. ەڭ باستىسى, ەل پرەزيدەنتىنىڭ كوتەرىلىسشىلەردى باسىپ-جانشۋعا قاۋقارسىزدىعى.
فرانتسياداعى اەس-تەن اقاۋ شىقتى
فرانس-پرەسس اگەنتتىگىنىڭ تاراتقان اقپاراتتارى بويىنشا, فرانتسيانىڭ سولتۇستىگىندەگى «پەنلي» اتوم ەلەكتر ستانساسىندا راديواكتيۆتى سۋ تامشىلاعان. كەيبىر اقپارات كوزدەرىنە قاراعاندا, 5 ساۋىردە اەس-تە ەكى ءورت بولعان. رەاكتور جۇمىسىن اۆتوماتتى تۇردە توقتاتقان.
EDF كومپانياسى ستانسا وپەراتورىنىڭ ايتۋىنشا, راديواكتيۆتى سۋدىڭ تامشىلاپ, ءورتتىڭ شىعۋى رەاكتوردى سالقىنداتۋ ءۇشىن پايدالانىلاتىن سورعى جۇيەسىنىڭ قوسىلاتىن جەرى ب ۇلىنۋىنەن بولعان. قازىرگى كەزدە تامشىلاعان راديواكتيۆتى سۋ ارنايى رەزەرۆۋارعا قۇيىلۋدا, رەاكتوردى سالقىنداتۋ شتاتتىق رەجىمدە وتۋدە. EDF كومپانياسى وكىلدەرىنىڭ حابارلاۋىنشا, قورشاعان ورتاعا قازىرگە قاۋىپ جوق. «پەنلي» اەس-ءى 1990 جىلى جۇمىس ىستەي باستاعان. وندا جىلىنا 2,7 مىڭ مەگاۆاتتقا جۋىق ەلەكتر ەنەرگياسى وندىرىلەدى.
پرەزيدەنتتىك سايلاۋعا قاتىسقىسى كەلەدى
بۇرىنعى يۋگوسلاۆيانىڭ سوڭعى پرەزيدەنتى جانە سەربيالىق وپپوزيتسيا دەموكراتتارىنىڭ ليدەرى ۆويلاۆ كوشتۋنيتسا سەربيادا وتەتىن پرەزيدەنتتىك سايلاۋعا قاتىسۋعا نيەتتەنىپ وتىر.
ۆ.كوشتۋنيتسا سەربيا دەموكراتيالىق وپپوزيتسياسى ۇسىنعان كانديدات بولماق. ونىڭ نەگىزگى يدەياسى – سەربيانىڭ ساياسي جانە اسكەري بەيتاراپتىعى بولىپ تابىلادى. كوشتۋنيتسانىڭ مالىمدەۋىنشە, «سەربيا ءۇشىن بوستاندىق سينونيمىنە» بايلانىستى بەيتاراپتىقتى ساقتاۋ. كانديداتتىڭ ايتۋىنشا, ونىڭ بۇل ۇستانىمى سەربتەردىڭ كوزقاراسىنا جاقىن كەلەدى. سونداي-اق ساياساتكەر سەربيانىڭ ەۋروپالىق وداققا كىرۋىنە جانە كوسوۆانىڭ سەربيا قۇرامىندا بولۋىنا ءۇزىلدى-كەسىلدى قارسى ەكەنىن مالىمدەگەن.
رەسەيدىڭ ناتو-داعى جاڭا وكىلى
رەسەيدىڭ ناتو جانىنداعى تۇراقتى وكىلىنە رەسەي فەدەراتسياسى سىرتقى ىستەر ءمينيسترىنىڭ ورىنباسارى الەكساندر گرۋشكو تاعايىندالادى. مۇنى ناتو-نىڭ بريۋسسەلدەگى شتاب-پاتەرى مالىمدەدى.
الەكساندر گرۋشكو ءمينيستردىڭ ورىنباسارى رەتىندە جالپى ەۋروپالىق جانە ەۋرواتلانتيكالىق ۇيىمدار ماسەلەسىمەن اينالىسادى. دەرەك كوزدەرى ونىڭ اتالعان ماسەلەلەردى جاقسى بىلەتىنىن ايتادى. «گرۋشكو كاسىبي مامان رەتىندە ناتو-مەن كوپتەن بەرى اينالىسىپ كەلەدى», – دەپ اتاپ وتكەن دەرەك كوزدەرى. ول رەسەي سىرتقى ىستەر مينيسترلىگىندە 1977 جىلدان بەرى ىستەپ كەلەدى. ءمينيستردىڭ ورىنباسارى قىزمەتىنە 2005 جىلى تاعايىندالعان. بۇل قىزمەتتى بۇعان دەيىن دميتري روگوزين اتقارعان ەدى.
ەڭ تومەنگى دەڭگەيگە ءتۇستى
ۇلىبريتانيا پرەمەر-ءمينيسترى دەۆيد كەمەروننىڭ رەيتينگى ەڭ تومەنگى رەكوردتىق دەڭگەيگە تۇسكەن. The Syn باسىلىمىنىڭ جازۋىنشا, ەكى اپتادا ۇكىمەت باسشىسىنىڭ رەيتينگى سەگىز پايىزعا تومەندەگەن, قازىرگى كەزدە ول 30 پايىزدى قۇرايدى. بۇل د.كەمەروننىڭ ءوز لاۋازىمىنا كىرىسكەننەن بەرگى ەڭ تومەنگى كورسەتكىش.
دەگەنمەن, پرەمەر-ءمينيستردىڭ باستى باسەكەلەسى, لەيبوريستەر پارتياسىنىڭ ليدەرى ەد ميليبەندتى سۇراۋ سالعانداردىڭ 19 پايىزى قولداعان. ۇمىتكەرلەردىڭ اراسىنداعى ەڭ تومەنگى رەيتينگتىك كورسەتكىش پرەمەر-ءمينيستردىڭ ورىنباسارى, ليبەرالدى دەموكراتيالىق پارتياسىنىڭ جەتەكشىسى نيك كلەتتكە تيەسىلى. ونىڭ رەيتينگى – 5 پايىزدىڭ ءتوڭىرەگىندە. دەۆيد كەمورون رەيتينگىنىڭ وسىنشالىقتى قۇلدىراۋى ەلدەگى ەكونوميكالىق ساياساتقا بايلانىستى بولسا كەرەك.
جولاۋشىلار تاسىمالداۋعا تىيىم سالدى
بەلورۋسسيانىڭ «بەلاۆيا» ۇلتتىق اۆيا كومپانياسى 13 ساۋىردەن باستاپ رەسەيدىڭ بارلىق وڭىرلەرىنە (ماسكەۋ قالاسىنان باسقا) جولاۋشىلار تاسىمالداۋعا تىيىم سالادى. بۇل جونىندە «بەلاۆيا» باس ديرەكتورىنىڭ ورىنباسارى يگور چەرگينەتس حابارلادى.
دەرەك كوزدەرىنە قاراعاندا, «بەلاۆيا» كومپانياسى ءماسكەۋ, كالينينگراد, سانكت-پەتەربۋرگ, ەكاتەرينبۋرگ جانە سوچي قالالارىنا جولاۋشىلار تاسىمالداپ كەلگەن. اۆياكومپانيا جازدا نوۆوسىبىرگە رەيس اشۋدى جوسپارلاپ وتىرعان. بۇل رەسەيلىكتەرگە ۇناماي قالسا كەرەك.
قىسقا قايىرىپ ايتقاندا:
* اقش سوتى مەكسيكالىق ەسىرتكى كارتەلىنىڭ باسشىسى حوسە ەرناندەستى ءومىر بويى تۇرمەدە ۇستاۋ جونىندە ۇكىم شىعاردى.
* ليۆيانىڭ بۇرىنعى باسشىسى م.كاددافيدىڭ تۇرمەدەگى ۇلىنا شابۋىل جاسالدى. گااگا حالىقارالىق سوتى وكىلىنىڭ مالىمدەۋىنشە, ونىڭ زارداپتارى تۋرالى ازىرگە ناقتى مالىمەتتەر جوق.
* وڭتۇستىك افريكا رەسپۋبليكاسىنىڭ قارۋلى كۇشتەرى ەلدىڭ اۋىل جانە ورمان شارۋاشىلىعىنا تيەسىلى جەتى كەمەنى ءوز باقىلاۋىنا الاتىندىعىن مالىمدەدى.
* ۋكراينانىڭ بۇرىنعى قورشاعان ورتانى قورعاۋ ءمينيسترى گ.فيليپچۋك ءوز وكىلەتتىگىن اسىرا پايدالانعانى ءۇشىن ءۇش جىلعا باس بوستاندىعىنان ايىرىلدى.
* بەرلين اۋەجايىنىڭ قىزمەتكەرلەرى ەرەۋىلگە شىعۋىنىڭ ارقاسىندا ايلىق جالاقىلارىنىڭ كوبەيۋىنە قول جەتكىزدى.
* فرانتسيا پرەزيدەنتى نيكوليا ساركوزي ەل پرەزيدەنتى بولىپ قايتا سايلانعان جاعدايدا ەۋرووداقتىڭ جالپى بيۋدجەتىنە جارنا تولەۋدى توقتاتاتىنىن مالىمدەدى.
ينتەرنەت ماتەريالدارى نەگىزىندە ازىرلەندى.
