لاڭكەستىك ارەكەتتىڭ الدىن الدى
بەيسەنبى, 5 ءساۋىر 2012 7:39
ينگۋشەتيادا جانكەشتىلەردىڭ قاتىسۋىمەن ورىن الۋى مۇمكىن دەلىنگەن لاڭكەستىك ارەكەتتەرگە توسقاۋىل قويىلدى. رەسپۋبليكانىڭ قۇقىق قورعاۋ ورگاندارىنا جەرگىلىكتى تۇرعىنداردان اقپارات كەلىپ ءتۇسىپ, وندا «جانكەشتىلەردىڭ ءوزىن ءوزى جارۋ ارقىلى بىرنەشە لاڭكەستىك اكتىلەرگە بارۋى مۇمكىن» ەكەندىكتەرى ەسكەرتىلىپتى.
بەيسەنبى, 5 ءساۋىر 2012 7:39
ينگۋشەتيادا جانكەشتىلەردىڭ قاتىسۋىمەن ورىن الۋى مۇمكىن دەلىنگەن لاڭكەستىك ارەكەتتەرگە توسقاۋىل قويىلدى. رەسپۋبليكانىڭ قۇقىق قورعاۋ ورگاندارىنا جەرگىلىكتى تۇرعىنداردان اقپارات كەلىپ ءتۇسىپ, وندا «جانكەشتىلەردىڭ ءوزىن ءوزى جارۋ ارقىلى بىرنەشە لاڭكەستىك اكتىلەرگە بارۋى مۇمكىن» ەكەندىكتەرى ەسكەرتىلىپتى.
وسىعان وراي, رەسەيدىڭ فەدەرالدى قاۋىپسىزدىك كەڭەسىنىڭ جەدەل قۇقىق قورعاۋ ورگاندارى قىزمەتكەرلەرى لاڭكەستەردىڭ كولىكتەرى مەن ولاردىڭ قوزعالۋ باعىتتارىن انىقتاعان. سونىڭ ناتيجەسىندە 3 ءساۋىر كۇنى كەشكى ساعات توعىز شاماسىندا رەسپۋبليكانىڭ فەدەرالدى قاۋىپسىزدىك كەڭەسى مەن ىشكى ىستەر مينيسترلىگى قىزمەتكەرلەرى نازران كوشەسىندە وزدەرىنە قارسىلىق كورسەتكەن 5 بىردەي جانكەشتىنىڭ كوزىن جويعان.
ءولىمنىڭ سەبەبى انىقتالۋ ۇستىندە
فرانتسياداعى ساياسي زەرتتەۋلەر ينستيتۋتىنىڭ جەتەكشىسى ريشار دەسكۋەننىڭ ءولى دەنەسى نيۋ-يوركتەگى قوناق ءۇيلەردىڭ بىرىندە تابىلعان. 53 جاستاعى ساياساتكەر سەيسەنبى كۇنى تاڭەرتەڭ كولۋمبيا ۋنيۆەرسيتەتىندە ۇيىمداستىرىلعان كونفەرەنتسياعا قاتىسۋى ءتيىس ەكەن.
الايدا, ول ءىس-شاراعا كەلمەگەننەن كەيىن ساياساتكەردىڭ ارىپتەستەرىنىڭ ءوتىنىشى بويىنشا قوناق ءۇي قىزمەتكەرلەرى ونىڭ بولمەسىنە كوتەرىلىپ, ريشار دەسكۋەننىڭ ءولى دەنەسىن كورگەن. نيۋ-يورك پوليتسياسى ساياساتكەر ءولىمىنىڭ كەزدەيسوق ەمەستىگىن ايعاقتاپ وتىر.
شەكارالىق باقىلاۋ كۇشەيە مە؟
گەرمانيانىڭ ىشكى ىستەر ءمينيسترى حانس-پەتەر فريدريح شەنگەن كەلىسىمىنە مۇشە ەلدەرگە قاتىستى شەكارالىق باقىلاۋدى ەنگىزۋ جونىندە ۇسىنىس ايتتى.
ءفريدريحتىڭ پىكىرىنشە, ەۋروپادا شەكارالىق باقىلاۋدى تەك اۋقىمدى ءىس-شارالار, ماسەلەن, فۋتبول جارىستارى مەن ساياسي كونگرەستەر كەزىندە عانا ەنگىزبەۋ كەرەك. مۇنداي باستاما شەنگەن ايماعىنىڭ شەكاراسىندا تۇرعان ەلدەر ءوزارا كەلىسىمدى ساقتاماعان جاعدايدا جانە زاڭسىز يمميگراتسيا تولقىنىنا توسقاۋىل قويۋ ءۇشىن قاجەت, دەپ سانايدى ساياساتكەر. نەمىس ءمينيسترى شەكارانىڭ اشىق بولۋى ءبىرتۇتاس ەۋروپا ءۇشىن ۇلكەن ماڭىزعا يە ەكەندىگىن, الايدا, قاۋىپسىزدىك ءماسەلەسىن دە نازاردان تىس قالدىرماۋ قاجەتتىگىن العا تارتادى.
ءۇشىنشى رەت سايلاۋعا تۇسپەكشى
سەربيا پرەزيدەنتى بوريس تاديچ ءوزىنىڭ وكىلەتتىگىنەن مەرزىمىنەن بۇرىن باس تارتتى. بۇل تۋرالى پرەزيدەنت ءوزىنىڭ بيلىكتەن باس تارتۋىن ەلدە 6 مامىردا وتەتىن كەزەكتەن تىس پرەزيدەنتتىك سايلاۋعا الدىن الا دايىندىق جۇرگىزۋگە مۇمكىندىك بەرۋىمەن بايلانىستىرعان. ءبىر ايتا كەتەرلىگى, بۇل سايلاۋ پارلامەنتتىك جانە مۋنيتسيپالدىق سايلاۋلارمەن ءبىر مەزەتتە وتەتىن بولادى.
ءتاديچتىڭ وكىلەتتىك مەرزىمى تەك 10 ايدان كەيىن عانا, ياعني 2013 جىلدىڭ 15 اقپانىندا اياقتالۋى ءتيىس بولاتىن. جاڭا سايلاۋدا تاعى دا سايلاۋعا تۇسۋگە نيەتتەنىپ وتىرعان ول ەگەر دە جەڭىسكە جەتسە, ءۇشىنشى رەت پرەزيدەنتتىك وكىلەتتىككە يە بولماق. ءتاديچتىڭ پرەزيدەنتتىك سايلاۋداعى باستى قارسىلاسى وپپوزيتسيالىق سەربيا پروگرەسشىل پارتياسىنىڭ ليدەرى توميسلاۆ نيكوليچ بولۋى مۇمكىن.
باسقارما باستىعى پارامەن ۇستالدى
كوسوۆونىڭ سىبايلاس جەمقورلىققا قارسى كۇرەس باسقارماسىنىڭ باستىعى نازمي مۋستافيگە ءوزىنىڭ قىزمەتتىك وكىلەتتىگىن اسىرا پايدالاندى جانە پارا الدى دەگەن ايىپ تاعىلىپ وتىر.
مەملەكەتتىك پروكۋرور يسمەت كاباشي مۋستافيگە قاتىستى حابارلامادا: «بۇل وقيعا كوسوۆونىڭ بارلىق زاڭ جۇيەسىنە نۇقسان كەلتىردى», دەپ مالىمدەلگەن. «مەندە بۇل ازاماتتىڭ قاتىسۋىمەن بولعان باسقا دا وسى تەكتەس ارەكەتتەر جونىندە اقپارات بار. ارنايى زەرتتەۋلەر جۇرگىزۋ ءۇشىن تاعى دا قوسىمشا اقپاراتتارعا يە ازاماتتاردىڭ بىزگە حابارلاۋىن سۇرايمىز», دەپتى يسمەت كاباشي. جەرگىلىكتى Zeri گازەتىنىڭ حابارلاۋىنشا, مۋستافي پارالاردى دەلدالدار جۇيەسى ارقىلى الىپ وتىرعان.
قاستاندىق ارەكەتىنە ەش وكىنبەيدى
2011 جىلدىڭ جازىندا نورۆەگيادا 77 ادامنىڭ ءومىرىن قيىپ, ەكى بىردەي اۋىر لاڭكەستىك ارەكەتكە بارعان اندەرس بەرينگ برەيۆيك «پسيحيكالىق اۋرۋدان ەمدەلۋ ولىمنەن دە جامان», دەگەن مالىمدەمە جاسادى. بۇل تۋرالى ول ءوزىنىڭ 38 بەتتەن تۇراتىن اشىق حاتىندا جازعان.
«ساياسي بەلسەندىگە پسيحيكالىق اۋرۋ دەگەن دياگنوز قويىپ, ونى ەمدەتۋ ءۇشىن اۋرۋحاناعا جىبەرۋ – بۇل بارىپ تۇرعان, ءتىپتى ونى ولتىرگەننەن دە ارتىق قاتىگەزدىك! مۇنداي تاعدىر ولىمنەن دە جامان», دەپ جازعان ءوز حاتىندا برەيۆيك. حاتىندا لاڭكەس مەديتسينالىق ساراپشىلاردىڭ وزىنە جاساعان قورىتىندىسىن «جىلىكتەپ شاعىپ بەرگەن». سونداي-اق, ول مەديتسينالىق قورىتىندى جاساۋ كەزىندە دارىگەرلەردىڭ ەموتسيانى باسشىلىققا العاندىعىن, بۇعان ءوزىنىڭ اسقان قاتىگەزدىكپەن جاساعان ارەكەتتەرى سەبەپ بولعاندىعىن, ال وزىندە ەشقانداي اۋىتقۋشىلىق جوق ەكەندىگىن مالىمدەگەن. برەيۆيك ءوزىنىڭ قاستاندىق ءىس-ارەكەتىن «ەۋروپانى يسلامدانۋدان قۇتقارۋ ءۇشىن جاسادىم» دەپ تۇسىندىرۋدە كورىنەدى.
تالابىن ەسكەرمەي تاستادى
حالىقارالىق قىلمىستىق سوت پالەستينا اۆتونومياسىنىڭ يزرايلگە قاتىستى تالابىن قاراۋدان باس تارتتى. 2011 جىلدىڭ شىلدە ايىندا پالەستينا ۇلتتىق اۆتونومياسى جەتەكشىلەرى حالىقارالىق قىلمىستىق سوتتان يزرايلدىڭ قارۋلى كۇشتەرىنىڭ جاساعان اسكەري قىلمىستارىنا زەرتتەۋ جۇرگىزۋدى تالاپ ەتكەن بولاتىن.
پالەستينا باسشىلارىنىڭ پىكىرىنشە, بۇل قىلمىستار 2008-2009 جىلدارى گازا سەكتورىندا ورىن العان. الايدا, حالىقارالىق قىلمىستىق سوت بۇل تالاپتىڭ ەسكەرىلمەۋىن پالەستينا ۇلتتىق اۆتونومياسىنىڭ ازىرگە بۇۇ-نىڭ تولىققاندى مۇشەسى ەمەستىگىمەن, سايكەسىنشە, حالىقارالىق قىلمىستىق سوتتىڭ يۋريسديكتسياسى پالەستينا جەرىندە تاراتىلمايتىندىعىمەن تۇسىندىرگەن.
ينتەرنەت ماتەريالدارى نەگىزىندە ازىرلەندى.
