قازاقستاننىڭ ءۇش دۇركىن چەمپيونى
ايەلدەردەن جانە ەرلەردەن قۇرالعان «Altay» ۆولەيبول كلۋبى وسكەمەندە 2015 جىلدىڭ كۇزىندە وبلىس اكىمى دانيال احمەتوۆتىڭ باستاماسىمەن قۇرىلعان-دى. ءبىر جاعىنان وڭىردەگى ۆولەيبول سپورتىن جاڭا بەلەسكە كوتەرۋ, جەرگىلىكتى سپورتشىلاردىڭ تالانت كوزىن اشۋ, ەكىنشى جاعىنان التاي برەندىن الەمگە ناسيحاتتاۋ, پاش ەتۋ ماقساتىندا اشىلعان كلۋب بۇگىندە كوزدەگەن مەجەگە باتىل قاداممەن كەلە جاتقانىن ەشكىم جوققا شىعارا قويماس. «سول جىلى (2015) «Altay»-دىڭ ەرلەر قۇراماسى دا, ايەلدەر قۇراماسى دا قازاقستان چەمپيونى بولىپ, شىعىس قازاقستاننىڭ ۆولەيبول تاريحىندا تۇڭعىش رەت جەڭىمپاز اتاندى. قازىرگى ۋاقىتتا «Altay» ۆولەيبول كلۋبىنىڭ قىزدارى ەلىمىزدىڭ ءۇش دۇركىن چەمپيونى. ەكى رەت قازاقستان كۋبوگىن, وسىنشا مارتە سۋپەركۋبوكتى جەڭىپ الدى. 2017 جىلى ايماق باسشىسىنىڭ ۇيىتقى بولۋىمەن وسكەمەندە العاش رەت كلۋبتىق ازيا چەمپيوناتى ءوتتى. وندا قىزدارىمىز ءتورتىنشى ورىننان كورىندى. بىلتىر قىتايدا جالاۋى جەلبىرەگەن كلۋبتىق الەم چەمپيوناتىندا «التايدىڭ» ارۋلارى دۇنيە ءجۇزىنىڭ تاڭداۋلى كوماندالارىنىڭ اراسىندا 5-ورىن يەلەندى», دەيدى «Altay» ۆولەيبول كلۋبىنىڭ ديرەكتورى مارحات شىنىباەۆ.
سانا جانە ونىڭ سىڭلىلەرى
8 ناۋرىز مەرەكەسى قارساڭىندا التايلىق ۆولەيبول شەبەرلەرىمەن كەزدەسىپ, جاتتىعۋ بارىسىن كورىپ, ەمەن-جارقىن اڭگىمە-دۇكەن قۇرۋدى جوسپارلاعان ەدىك. الايدا, جوسپارىمىز ورىندالمادى. «Altay» ۆولەيبول كلۋبىنىڭ قىزدارى قىزىلجارعا جارىسقا كەتىپتى. دەسەك تە, جارىس اراسىندا ۇيالى تەلەفون ارقىلى بايلانىسقا شىعىپ, از-كەم سۇحبات الۋعا تىرىستىق.
«Altay» قىزدار ۆولەيبول كلۋبىنىڭ كاپيتانى, شابۋىلشى سانا انارقۇلوۆانى بۇرىن تەلەديداردان نەمەسە وسكەمەندە ارا-تۇرا وتەتىن جارىستاردان كورىپ, ءار سوققىسىن قۇددى ءوزىمىز سوققانداي تامسانىپ: «مىنە, قازاق قىزى! بارەكەلدى! قالاي-قالاي وينايدى ءوزى» دەپ تاقىمىمىزدى قىسىپ وتىرۋشى ەدىك. راسىندا, ول كەزدە ۇلتتىق قۇرامادا ۇنەمى كوزىمىزگە جالعىز سانا عانا ءتۇسىپ, وتتاي باسىلاتىن. قازىر سانانى وبلىس ورتالىعىنداعى جارىستار نەمەسە جاتتىعۋ كەزدەرىندە كۇندە بولماسا دا ايىنا ءبىر-ەكى مارتە كورىپ قالامىز. ۆولەيبولداعى سىڭلىلەرىنىڭ سانىنىڭ ارتىپ كەلە جاتقانىن دا بايقايمىز. «وسكەمەندىك كلۋب اتىنان ونەر كورسەتىپ جاتقانىما ءۇش جىلداي ۋاقىت بولىپتى. شىعىسقا ۇيرەنىپ, باۋىر باسىپ قالدىم دەسەم دە بولادى. كوپشىلىك بىزدەن: «سىزدەر سوڭعى ءۇش-ءتورت جىلدا قارسىلاس شاق كەلتىرمەي جۇرسىزدەر. مۇنىڭ سىرى نەدە؟» دەپ تاڭعالىپ سۇراپ جاتادى. مەن ايتار ەدىم, مۇنىڭ سىرى – ەڭ اۋەلى ءبىزدىڭ كوماندانىڭ تۇتاستىعىندا, بەرەكە-بىرلىگىندە. ەكىنشىدەن, وبلىس اكىمدىگى, سپورت باسقارماسى ويىنشىلارعا بارلىق جاعدايدى جاساپ وتىر. ۇشىنشىدەن, الەمدىك دەڭگەيدەگى ۆولەيبولشىلارمەن ءبىر كوماندادا ويناپ جاتىرمىز. مۇنىڭ دا اسەرى كوپ. تورتىنشىدەن, باپكەرلەر قۇرامى مىقتى. وسىنىڭ ءبارى ءبىزدىڭ ناتيجەلى ويىن ورنەگىن كورسەتۋىمىزگە ىقپالىن تيگىزىپ جاتقانى انىق», دەيدى كوماندا كوشباسشىسى.
بىرەۋ بىلەر, بىرەۋ بىلمەس, «Altay» قىزدار ۆولەيبول كلۋبى «Altay», «Altay 2», «Altay 3» جانە «Altay 4» دەگەن كوماندالاردان قۇرالعان. سوڭعى ەكەۋى الدىڭعى ەكەۋىنىڭ دۋبلەرى, ياعني ءىزباسارلارى ەكەنى ايتپاسا دا تۇسىنىكتى شىعار. ءبىر قۋانارلىعى, «Altay 2», «Altay 3», «Altay 4» كوماندالارىندا سانانىڭ سىڭلىلەرىنىڭ قاتارىنىڭ كوبەيىپ كەلە جاتقاندىعى. سونىڭ ءبىرى – «Altay 2» كومانداسىنىڭ شابۋىلشىسى, سەمەي قالاسىنىڭ تۋماسى ءمولدىر جاقسىباەۆا. «كلۋب قاتارىنا قوسىلعانىما التى ماۋسىم بولدى. وسى ۋاقىت ارالىعىندا كوپ نارسەنى ۇيرەندىك. شەبەرلىگىمىز شىڭدالىپ كەلەدى. اسىرەسە شەتەلدىك ۆولەيبولشىلاردان تالاي دۇنيەنى ۇيرەندىك. ولار ويىن كەزىندە پسيحولوگيالىق تۇرعىدان جاقسى كومەك بەرەدى. بىردەڭەنى دۇرىس ىستەمەي جاتساڭ ايتىپ تۇسىندىرەدى. جالپى, شەتەلدىك سپورتشىلارمەن تاجىريبە الماسقاننان ۇتپاساق, ۇتىلمايتىنىمىز انىق», دەيدى ول.
جارما اۋدانى قالباتاۋ اۋىلىنىڭ تۋماسى سامال يبراەۆا «Altay 3» كومانداسىندا جاپون باپكەرى شۋتو كويچيدىڭ قاراماعىندا جاتتىعادى. سامال وسكەمەندەگى سپورتتاعى دارىندى بالالارعا ارنالعان ينتەرناتقا 8-سىنىپتا قابىلدانعان ەكەن. ء«بىزدىڭ باس باپكەرىمىزدىڭ جاتتىقتىرۋ مانەرى وزگەشە. تاڭعى 5 جارىمنان باستاپ جاتتىقتىرادى. سونىڭ ناتيجەسى دە شىعار, كوپتەگەن جەتىستىكتەرگە جەتىپ جاتىرمىز. تايلاندتا وتكەن 17 جاسقا دەيىنگىلەر اراسىنداعى ازيا چەمپيوناتىنا قاتىستىق. جاپونياعا بارىپ, شەبەرلىگىمىزدى شىڭدادىق», دەيدى بويجەتكەن.
شەبەرلىكتى شىڭدايتىن – شەتەل ويىنشىلارى
«Altay» قىزدار ۆولەيبول كلۋبىندا شەتەلدىك سپورتشىلاردىڭ ونەر كورسەتەتىنى دە بەلگىلى. كلۋب ديرەكتورى مارحات شىنىباەۆ قازىرگى ۋاقىتتا «Altay» جانە «Altay 2» كوماندالارىندا الەم چەمپيونى سيلۆيا پوپوۆيچ, ماتەيا يكيچ, ازەربايجان ۇلتتىق قۇراماسىنىڭ مۇشەسى ناتاليا ماممادوۆا مەن بويانا رادۋلوۆيچ سەكىلدى مىقتى ۆولەيبولشىلاردىڭ ويناپ جاتقانىن ايتادى. قىزىلجاردا جارىستا جۇرگەن بويانامەن ۇيالى تەلەفون ارقىلى سويلەسكەنىمىزدە كلۋب قۇرامىنا الىنعانىنا ەكىنشى ماۋسىم بولعانىن, العاش وسكەمەنگە كەلگەن جىلى توڭىپ, بىرىنە-ءبىرىن قاباتتاپ, ەكى كۇرتەشەمەن جۇرگەنىن, قازىر قالاعا دا, سەرىكتەس ويىنشىلارعا دا بوي ۇيرەتىپ, ءتىپتى كوماندالاستارىنىڭ كوپشىلىگىمەن دوس بولىپ كەتكەنىن ايتادى. «كوماندامىز وتە ۇيىمشىل, تاتۋ. وتباسىم سياقتى كورەمىن. ءوز وتانىما قىسقا ۋاقىتقا دەمالىسقا بارعان كەزدە ولارمەن تەلەفون ارقىلى ءجيى حابارلاسىپ تۇردىق. مەن بۇعان دەيىن كوپتەگەن ەلدە وينادىم. بىراق ونداعى كوماندا مۇشەلەرىمەن مۇنداي جىلى قارىم-قاتىناس بولعان ەمەس. التايدىڭ اقكوڭىل قىزدارىن ەرەكشە جاقسى كورىپ كەتتىم. وسى جاقتان كەتكەن كۇننىڭ وزىندە ولارمەن ارالاسىپ, سىيلاسىپ تۇراتىنىما ەش كۇمانىم جوق. ۆولەيبول – كوماندالىق ويىن. ءبىرىڭ ءبارىڭ, ءبارىڭ ءبىرىڭ ءۇشىن جان الىسىپ, جان بەرىسىپ ويناماساڭ ناتيجە بولمايدى. كومانداداعى ەڭ ماڭىزدى دۇنيە – وسى. «Altay» قىزدارىندا وسى دۇنيە بار. بىرلىك بار, تۇسىنىستىك بار, ىنتىماق بار. ءبىز – ءبىر كوماندامىز, ءبىز – ءبىرتۇتاسپىز», دەيدى ول.
ازامات قاسىم,
«Egemen Qazaqstan»
وسكەمەن
