قازاقستان • 04 ناۋرىز، 2019

«حالىققا كومەك» جوباسى «نۇر وتان» پارتياسىنىڭ قوعامدىق قابىلداۋ بولىمدەرىنىڭ جۇمىسىن كۇشەيتەدى

1760 رەتكورسەتىلدى

استانا اكىمى باقىت سۇلتانوۆ «نۇر وتان» پارتياسى قالالىق فيليالى اكتيۆىنىڭ وتىرىسىندا iKomek قالالىق ورتالىعى مەن «نۇر وتان» پارتياسى فيليالىنىڭ قوعامدىق قابىلداۋ بولىمىندە «حالىققا كومەك» ەلوردادىق پارتيالىق جوباسىن ىسكە قوسۋدى ۇسىندى، دەپ حابارلايدى استانا اكىمدىگىنىڭ رەسمي سايتى. 

ونىڭ ايتۋىنشا، بۇل iKomek-ءتىڭ اپروباتسيالانعان مۇمكىندىكتەرىن قولدانۋعا جول اشادى. «مەملەكەت باسشىسى «نۇر وتان» پارتياسىنىڭ XVIII سەزىندە حالىقتىڭ ءال-اۋقاتىن ارتتىرۋعا باعىتتالعان جاڭا الەۋمەتتىك ساياساتتى جاريالادى. كوپبالالى، تولىق ەمەس جانە از قامتىلعان وتباسىلاردى، بيۋدجەتتىك ۇيىمداردىڭ قىزمەتكەرلەرىن قولداۋ، دەنساۋلىق ساقتاۋ سالاسىن دامىتۋ، بيزنەستى جانە الەۋمەتتىك ينفراقۇرىلىمدى دامىتۋ، جەرگىلىكتى جولدار جەلىسىن جوندەۋ، سالۋ جانە كەڭەيتۋ الەۋمەتتىك دوكترينانىڭ نەگىزى بولىپ تابىلادى. ەندى ءبىز قوعامدىق باقىلاۋدىڭ جاڭا پارمەندى تەتىكتەرىن ازىرلەۋىمىز كەرەك»،  دەدى قالا اكىمى.

ول مەملەكەت باسشىسىنىڭ «حالىققا كومەك» جوباسى ارقىلى حالىقپەن كەرى بايلانىستىڭ قۋاتتى جۇيەسىن قالىپتاستىرۋدى تاپسىرعانىن ەسكە سالدى. «بۇگىن ەلوردا قالالىق iKomek قىزمەتى ارقىلى شۇعىل ماسەلەلەردى شەشۋدە جانە حالىقپەن كەرى بايلانىس ورناتۋدا تابىستى تاجىريبەگە قالالىق IKomek ورتالىعى مەن پارتيا فيليالىنىڭ قوعامدىق قابىلداۋ ءبولىمىنىڭ ىقپالداستىعى اياسىندا استانالىق «حالىققا كومەك» پارتيالىق جوباسىن ىسكە قوسۋدى ۇسىنامىن. بۇل بىزگە iKomek-ءتىڭ اپروباتسيالانعان مۇمكىندىكتەرىن قولدانۋعا جول اشادى»، دەپ ءتۇسىندىردى ب.سۇلتانوۆ.

ول سونداي-اق، قالالىق iKomek مونيتورينگ جانە جەدەل ارەكەت ەتۋ ورتالىعىنىڭ باسشىسى جاننات دۋبيروۆا مەن پارتيانىڭ استانالىق فيليالى توراعاسىنىڭ ءبىرىنشى ورىنباسارى باقىت ساپاروۆقا پارتيانىڭ استانالىق فيليالىنىڭ قوعامدىق قابىلداۋ ءبولىمى مەن 109 قىزمەتىنىڭ تەتىكتەرىن بىرىكتىرىپ پىسىقتاۋدى تاپسىردى.

سونىمەن قاتار، ەلوردا اكىمى تۇرعىندارمەن تىكەلەي بايلانىس، «سەنىم تەلەفوندارى»، وتىنىشتەرمەن جۇمىس سياقتى بارلىق بايلانىس ارنالارىنىڭ ماڭىزدى ەكەنىن اتاپ ءوتىپ، ينتەرنەتتىڭ كەڭەيتىلگەن مۇمكىندىكتەرىن بەلسەندى ىسكە قوسۋ كەرەكتىگىن العا تارتتى. باقىت سۇلتانوۆ قوعامدىق پارتيا قابىلداۋ بولىمدەرى كۇن سايىن جۇمىس ىستەۋى ءتيىس ەكەنىن ايتتى.

«بۇل – قالا تۇرعىندارىنىڭ جەكە ماسەلەلەرىن شەشۋدەگى كومەك قانا ەمەس، سونىمەن قاتار ول «ساعاتتاردى سالىستىرۋ»، پارتيالىق باعدارلامانىڭ ىسكە اسىرىلۋىن باقىلاۋ»،  –  دەدى ول.

سوڭعى جاڭالىقتار

ۇقساس جاڭالىقتار