وندا مەملەكەت باسشىسى نۇرسۇلتان ءابىش ۇلى نازارباەۆتىڭ «نۇر وتان» پارتياسىنىڭ XVIII سەزىندە جاريالاعان ماڭىزدى باستامالارىنا ايرىقشا نازار اۋدارىلدى.
ەلباسىنىڭ از قامتىلعان تۇرعىنداردى الەۋمەتتىك قولداۋ, باسپانا ماسەلەسىن شەشۋ, ءبىلىم جانە دەنساۋلىق سالالارىن جاقسارتۋ, وڭىرلەردى كەشەندى دامىتۋعا باعىتتالعان اۋقىمدى باستامالارىنا توقتالعان ء ماجىلىس توراعاسى ولاردىڭ بارلىعى قارجىلىق تۇرعىدان دا قولداۋ تاباتىنىن ايتىپ, ەلىمىزدە الەۋمەتتىك جاڭعىرتۋدىڭ جاڭا كەزەڭى باستالعانىن اتاپ ءوتتى.
وسى ورايدا پالاتا سپيكەرى دەپۋتاتتىق كورپۋستىڭ ءرولى زور ەكەنىن العا تارتا كەلىپ:
ەڭ الدىمەن پرەزيدەنتىمىزدىڭ «نۇر وتان» پارتياسىنىڭ سەزىندە بەرگەن بارلىق تاپسىرمالارىن جەدەل ءارى ساپالى زاڭنامالىق قامتاماسىز ەتۋىمىز قاجەت. ەلباسى ءماجىلىس دەپۋتاتتارى, اسىرەسە, مەملەكەتتىك جانە سالالىق باعدارلامالاردى ىسكە اسىرۋعا مونيتورينگ جاساۋ جۇمىستارىنا بەلسەنە قاتىسۋعا ءتيىس ەكەندىگىن اتاپ ءوتتى. ءبىز وسى تاپسىرمالاردى اتالعان باعدارلامالاردى ورىنداۋعا جاۋاپتى قۇزىرلى ورگان وكىلدەرىن «ۇكىمەت ساعاتىندا», سونداي-اق, ماجىلىسكە كىرگەن ساياسي پارتيالار فراكتسيالارىنىڭ وتىرىستارىندا تىڭداۋ ارقىلى جۇزەگە اسىرۋدى جوسپارلاپ وتىرمىز, - دەدى.
ءماجىلىس توراعاسى ول وتىرىستار ۇكىمەتتىك ەمەس ۇيىم مۇشەلەرىنىڭ, ساراپشىلاردىڭ, باق وكىلدەرىنىڭ قاتىسۋىمەن اشىق جۇرگىزىلەتىنىن ايتتى.
سونىمەن قاتار, بيۋرو وتىرىسىندا پالاتانىڭ الداعى جالپى وتىرىسىنىڭ كۇن تارتىبىنە ەنگىزىلەتىن ماسەلەلەر قاتارى تالقىلاندى.
كۇن ءتارتىبىنىڭ جوباسىنا بىرقاتار راتيفيكاتسيالاناتىن قۇجاتتار جوباسى ۇسىنىلدى. ولار قازاقستان رەسەي فەدەراتسياسى اراسىنداعى بايقوڭىر قالاسىنىڭ مارتەبەسى تۋرالى كەلىسىم مەن قازاقستان مەن قىتاي ۇكىمەتتەرى اراسىنداعى قىتاي حالىق رەسپۋبليكاسىنىڭ جەڭىلدىكتى كرەديت بەرۋى تۋرالى كەلىسىمى.
بۇدان باسقا, ءماجىلىس قازاقستان رەسپۋبليكاسىنىڭ ۇكىمەتى مەن تاجىكستان رەسپۋبليكاسىنىڭ ۇكىمەتى اراسىنداعى وتەۋسىز اسكەري-تەحنيكالىق كومەك كورسەتۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن جۇمىسقا الاتىن بولادى.
