«اقپارات جانە كوممۋنيكاتسيالار مينيسترلىگى 3 جىلداي ۋاقىت جۇمىس اتقاردى. مەن ءۇشىن - باسقارۋشىلىق جۇمىستاعى تەڭدەسسىز تاجىريبە بولدى. وسى ۋاقىتتىڭ ىشىندە كوپتەگەن جۇمىستار اتقارىلدى. «تسيفرلى قازاقستان» باعدارلاماسى باستالدى, «استانا حاب» تەحنوپاركىنىڭ ىرگەسى قالاندى. ايماقتاردىڭ ءبىرازىندا تسيفرلى تەلەۆيزيا كورسەتىلە باستادى. اۋىلدى جەرلەردە 20 مىڭ شاقىرىمدىق وپتيكالىق-تالشىقتى جەلىنىڭ قۇرىلىسى باستالدى. مەملەكەتتىك قىزمەت كورسەتۋ پروتسەستەرى وڭتايلاندىرىلدى. ماعان سەنىم بىلدىرگەن پرەزيدەنتكە العىسىمدى ايتامىن», - دەدى داۋرەن اباەۆ «حابار» ارناسىنداعى «اشىق ديالوگ» باعدارلاماسىندا.
مينيستر وتكەن شاقتى ەسكە الا كەلە ەندىگى كەزەكتە قانداي باعىتتا جۇمىس جۇرگىزەتىنىن ايتىپ ءوتتى.
«قازىرگى ۋاقىتتا ءبىز ۇيىمداستىرۋشىلىق ماسەلەلەرىن شەشۋگە تىرىسىپ جاتىرمىز. ەڭ الدىمەن, جاڭا قۇرىلىمنىڭ اكىمشىلىك, قۇقىقتىق, قارجىلاي جۇمىسىن رەتتەپ, بىرىڭعاي جۇمىس جوسپارىن ازىرلەۋ كەرەك. سونىمەن بىرگە, شايقالىپ جۇرۋگە ۋاقىتتىڭ جوقتىعىن ءبىلىپ وتىرمىز. كۇنى ەرتەڭ ءبىزدىڭ مينيسترلىكتىڭ القا وتىرىسى وتكىزىلىپ, سونىڭ بارىسىندا وسى جىلعى جۇمىستىڭ باستى باسىمدىقتارى ايقىندالاتىن بولادى. دارحان امان ۇلى كالەتاەۆ ۇلكەن جۇمىس اتقاردى. باسشىلىقتىڭ اۋىسۋى دەگەن - ءبىر ساعاتتا ءبارىن وزگەرتىپ, قىسقارتىپ, قايتا جاساۋ كەرەك دەگەندى بىلدىرمەيدى. جوق! ءبىز باستالعان ءىستى جالعاستىرىپ, جۇمىس باعىتىن جاڭا يدەيالارمەن, باستامالارمەن جانە جوبالارمەن تولىقتىرا تۇسەمىز», - دەيدى داۋرەن اباەۆ.
