جانارتاۋ تاعى «وياندى»
بەيسەنبى, 22 قاراشا 2012 7:16
ءۇش تسەنتنەر ەسىرتكىنى تاركىلەدى
كەشە اۆستراليا پوليتسەيلەرى وسى ەلگە اسا ءىرى كولەمدە ەسىرتكى جەتكىزۋدىڭ جولىن كەسۋ وپەراتسياسىن اياقتادى. «فرانس-پرەسس» اگەنتتىگىنىڭحابارلاۋىنشا, تابىلعان ەسىرتكىنىڭ جالپى كولەمى ءۇش تسەنتنەردەن اسادى.
بەيسەنبى, 22 قاراشا 2012 7:16
ءۇش تسەنتنەر ەسىرتكىنى تاركىلەدى
كەشە اۆستراليا پوليتسەيلەرى وسى ەلگە اسا ءىرى كولەمدە ەسىرتكى جەتكىزۋدىڭ جولىن كەسۋ وپەراتسياسىن اياقتادى. «فرانس-پرەسس» اگەنتتىگىنىڭحابارلاۋىنشا, تابىلعان ەسىرتكىنىڭ جالپى كولەمى ءۇش تسەنتنەردەن اسادى.
سيدنەي پوليتسەيلەرى قالاداعى ءبىر قويمادا قىتايدان جاڭادان يمپورتتالعان اسفالت توسەيتىن ءماشينەنى تەكسەرگەن. تەكسەرۋ بارىسىندا ونىڭ ىشىنەن 235 كيلو مەتامفەتامين جانە 115 كيلودان استام كوكاين شىققان. تاركىلەنگەن ەسىرتكىنىڭ جالپى قۇنى قارا بازاردا 250 ميلليون دوللاردى قۇرايتىن كورىنەدى. وسىعان قاتىسى بار دەگەن كۇدىكپەن 34 جانە 33 جاستارداعى كانادالىق پەن امەريكالىق تۇتقىندالدى. وسىدان ءبىر اپتا بۇرىن اۆستراليالىق پوليتسەيلەر ەكۆادوردان اۆسترالياعا كەلە جاتقان ياحتادان 204 كيلو كوكاين تاپقان بولاتىن.
جانارتاۋ تاعى «وياندى»
كەشە جاڭا زەلاندياداعى تونگاريرو جانارتاۋى اتقىلادى. بۇل جانارتاۋ سولتۇستىك ارالىنىڭ ورتالىق بولىگىندە ورنالاسقان. جانارتاۋ اتقىلاۋىنان اۋاعا شاشىلعان كۇلدىڭ بيىكتىگى ءۇش مىڭ مەترگە جۋىقتايدى.
«اسسوشەيتەد پرەسس» اگەنتتىگىنىڭ اقپاراتتارىنا قاراعاندا, جانارتاۋ جەرگىلىكتى ۋاقىت بويىنشا ساعات 13.25-تە «ويانعان». سونىڭ سالدارىنان بىرقاتار باعىتقا ۇشاتىن ۇشاقتاردىڭ رەيسى كەيىنگە شەگەرىلدى. وسى جىلدىڭ تامىزىندا تونگاريرو جانارتاۋى تاعى دا اتقىلاعان ەدى. وندا دا ەل ىشىنە قاتىنايتىن اۆيارەيستەر كەستەسى بۇزىلعان ەدى. ال بۇل جانارتاۋ 1897 جىلدان بەرى «ۇيىقتاپ» جاتقان كورىنەدى.
حاماس ءوز موينىنا الدى
تەل-اۆيۆتە اۆتوبۋس جارىلدى, سونىڭ سالدارىنان 15 ادام جاراقاتتاندى, ونىڭ ۇشەۋى اۋىر حالدە جاتىر. گازا سەكتورىنداعى شەتەل تىلشىلەرىنىڭ حابارلاۋىنشا, جارىلىس جاۋاپكەرشىلىگىن پالەستينالىق حاماس راديكالدى قوزعالىسى العان.
شەتەلدىك تىلشىلەردىڭ اقپاراتتارى بويىنشا ولار مەشىتتىڭ مۇناراسىنا ورناتىلعان داۋىس ۇلعايتقىشتى پايدالانعان سياقتى. ال پوليتسيانىڭ مالىمەتتەرىنە قاراعاندا, بەلگىسىز بىرەۋ اۆتوبۋس سالونىنا جارىلعىش زات سالىنعان پاكەتتى قالدىرىپ كەتكەن. كەيىن بەلگىلى بولعانىنداي, كۇدىكتىلەردىڭ بىرەۋى تۇتقىنعا الىندى.
تاجىك اعايىندار ءبىرىنشى تۇر
تاجىكستان ءوز ازاماتتارىنىڭ ەڭبەك ميگرانتى رەتىندە شەتەلدەردە جۇمىس ىستەپ, وتانىنا اقشا اۋدارىمى جونىنەن الەمدە الدىڭعى ورىنعا شىقتى. بۇل تۋرالى بۇكىلالەمدىك بانكتىڭ بايانداماسىندا كورسەتىلگەن.
بۇكىلالەمدىك بانكتىڭ ەسەبىنشە, 2012 جىلى شەتەلدەردەگى تاجىك ەڭبەك ميگرانتتارى اۋداراتىن قارجى كولەمى ەلدىڭ ىشكى جالپى ءونىمىنىڭ 47 پايىزىن قۇرايدى. ال ەكىنشى ورىندا ليبەريا (31 پايىز), ءۇشىنشى ورىندا قىرعىزستان (29 پايىز) تۇر. ودان كەيىن لەسوتو (27 پايىز), مولدوۆا (23 پايىز), نەپال (22 پايىز) جانە ساموا (21 پايىز) كەلەدى. بيىلعى جىلى ەڭبەك ميگرانتتارى ءوز وتباسىلارىنا جالپى كولەمى 406 ميلليارد دوللار جىبەرەتىن كورىنەدى. بانكتىڭ ەسەبىنشە, بۇل وتكەن جىلعىدان 6,5 پايىزعا كوپ.
تەررورشى دارعا اسىلدى
مۋمبايدا تەررورلىق ارەكەتتى جۇزەگە اسىرعانداردىڭ ءبىرى – موحاممەد كاساب كەشە ەرتەڭگىسىن تۇرمەدە دارعا اسىلدى. اعر اگەنتتىگىنىڭ حابارلاۋىنشا, پاكستاندىق م.كاساب 2008 جىلى مۋمبايدا تەررورلىق ارەكەت جاساۋشى ونشاقتى ادامنىڭ ىشىنەن ءتىرى قالعان.
ولار ءتاجى ماحال, وبەرەي وتەلدەرىنە, ەۆرەي ءدىني ورتالىعىنا, مەيرامحانا مەن تەمىر جول ۆوكزالىنا, سونداي-اق اۋرۋحاناعا شابۋىلدار جاساپ, سونىڭ سالدارىنان 166 ادام اجال قۇشقان ەدى. وسىعان بايلانىستى ول كىنالى دەپ تابىلىپ, سوت ونى 2010 جىلى ءولىم جازاسىنا كەسكەن.
كۇيەۋىن اتىپ ولتىرگەنى ءۇشىن
جەرگىلىكتى سوت ارگەنتينانىڭ ريو-نەگرو پروۆينتسياسى گۋبەرناتورىنىڭ جەسىرى سۋسانا فرەيدوستى كۇيەۋىن ولتىرگەنى ءۇشىن 18 جىلعا باس بوستاندىعىنان ايىرۋ جازاسىنا كەستى. قىلمىس 2012 جىلى جاڭا جىلدى مەرەكەلەۋ كەزىندە جاسالعان.
سۋسانا فرەيدوس ماس بولىپ, كۇيەۋىمەن ءوزارا داۋلاسۋ بارىسىندا ونى اتىپ تاستاعان كورىنەدى. پروكۋرورلار وعان ءومىر بويى تۇرمەدە وتىرعىزۋ جازاسىن سۇراعان. ال سوت قىلمىس جاسار كەزىندە ونىڭ جۇيكەسىندە اۋىتقۋشىلىق بولعانىن جانە ماس ەكەنىن ەسكەرگەن.
قىسقا قايىرىپ ايتقاندا:
رەسەيدىڭ باس پروكۋراتۋراسى وسى اپتانىڭ سوڭىنا قاراي مەملەكەتتىك دۋماعاولەگ ميحەەۆتى دەپۋتاتتىق دەربەس قۇقىعىنان ايىرۋ جونىندە ۇسىنىس جاساماق.ونى ەكى بانك الاياقتىق جاسادى دەپ ايىپتاۋدا.
گرۋزيا ءوزىنىڭ اۋعانستانداعى اسكەري كونتينگەنتىنىڭ قاتارىنكوبەيتتى. قورعانىس مينيسترلىگىنىڭ مالىمەتى بويىنشا, قازان ايىنىڭىشىندە ولار اۋعان جەرىنە بىرنەشە مارتە ءوز اسكەرلەرىن جىبەرگەن.
بوكستان الەم چەمپيونى ەكتور كاماچو اۋىر جاراقاتپەن گوسپيتالعا ءتۇستى. اۆتوكولىك ىشىندە وتىرعان وعان بەلگىسىز بىرەۋلەر وق اتقان.
سوت شەشىمىمەن نەمىس شىركەۋلەرى مەن شىركەۋ ۇيىمدارىنىڭ قىزمەتكەرلەرىنە ەرەۋىل جاساۋعا رۇقسات ەتىلدى. بۇل ەڭبەك جاعدايىن جاقسارتۋعا بايلانىستى بولسا كەرەك.
ينتەرنەت ماتەريالدارى نەگىزىندە ازىرلەندى.
