- قازاق حالقى باۋىرمال, اق داريعا كەڭ كوڭىل حالىق, - دەدى ابايدىڭ مەملەكەتتىك قورىق-مۋزەيىنىڭ اعا عىلىمي قىزمەتكەرى نۇرجان بورانباەۆ, - ەسكە سالساق, 2016 جىلعى 14 قانتاردا پرەزيدەنت نۇرسۇلتان نازارباەۆ قازاقستان حالقى اسسامبلەياسىنىڭ قۇرىلعان كۇنى - 1 ناۋرىزدى ەلىمىزدە العىس ايتۋ كۇنى دەپ جاريالاعان بولاتىن. شارامىزعا قاتىسۋشى تاتار بالالارى شىعارماشىلىعىن دامىتا تۇسپەك. ولاردى وسىنداي جيىندار تانىمدىق قابىلەتتەرى مەن قىزىعۋشىلىعىن ارتتىرعىمىز كەلەدى. مۋزەي مەن مەكتەپ اراسىنداعى بايلانىستى دامىتۋ دا ءبىزدىڭ باستى ماقساتىمىز.
مۋزەيگە قاراستى «اباي» ونەر مەكتەبىنىڭ قولونەر ۇيىرمەسى ونەر مەن ءبىلىم بەرۋ ءىسىن ءبىر-بىرىمەن ۇشتاستىرىپ كەلەدى. مۋزەي ديرەكتورىنىڭ عىلىمي جۇمىستار جونىندەگى ورىنباسارى مەيرامگۇل قايرامباەۆا ءىس-شاراعا قاتىسۋشى سەمەي قالاسىنداعى №8 مەكتەپ-كەشەنى مەن تاتار ونەر مەكتەبىنىڭ وقۋشىلارىنا العىس ءبىلدىرىپ, جەتەكشىلەرى عابدۋلحاق احۋنجانوۆقا ماراپات قاعازىن تابىس ەتتى. عابدۋلحاق احۋنجانوۆ تا ءوز تاراپىنان قازاق حالقىنا العىسىن ءبىلدىردى. ابايدىڭ «جيدەباي-ءبورىلى» مەملەكەتتىك قورىق-مۋزەيىندە, سونداي-اق, 1 ناۋرىز – العىس ايتۋ كۇنىنە ارنالعان كىتاپ كورمەسى دە اشىلدى.
ءىس-شارادا تاتار ونەر مەكتەبىنىڭ وقۋشىلارى قازاق, ورىس جانە تاتار تىلدەرىندە اندەر ورىندادى. تاتار ونەر مەكتەبىنىڭ وقۋشىلارى ابايدىڭ بالا كەزى تۋرالى ەۆگەني تيتاەۆتىڭ سوزىنە جازىلعان گابدۋلحاق احۋنجانوۆتىڭ «مامينى پەسني, بابۋشكينى سكازكي» ءانىن ورىنداپ, تاتار ءبيىن بيلەدى. جيىنعا قالاداعى كوللەدج ستۋدەنتتەرى, ۇستازدار مەن وقۋشىلار قاتىستى.
راۋشان نۇعمانبەكوۆا
«ەگەمەن قازاقستان»
سۋرەت اۆتوردىكى.
سەمەي
