يگور ۆوروتنيكوۆ: «ءبىزدىڭ ەندى تۋىستارىمىز بار. ولار – جانىبەك پەن ەۆگەني»
سەنبى, 1 قىركۇيەك 2012 8:05
دەنساۋلىق ساقتاۋ ءمينيسترى ساليدات قايىربەكوۆا يگور ۆوروتنيكوۆتى «التىن جۇرەك» سىيلىعىمەن ماراپاتتاۋ تۋرالى ۇسىنىس ايتقانىن Tengrinews.kz سايتى حابارلايدى. الماتىدا وتكەن سەلەكتورلىق جيىندا دەنساۋلىق ساقتاۋ ءمينيسترى وسى سىيلىققا بىردەن-ءبىر لايىق جان وسى يگور ەكەنىن ايتقان.
سەنبى, 1 قىركۇيەك 2012 8:05
دەنساۋلىق ساقتاۋ ءمينيسترى ساليدات قايىربەكوۆا يگور ۆوروتنيكوۆتى «التىن جۇرەك» سىيلىعىمەن ماراپاتتاۋ تۋرالى ۇسىنىس ايتقانىن Tengrinews.kz سايتى حابارلايدى. الماتىدا وتكەن سەلەكتورلىق جيىندا دەنساۋلىق ساقتاۋ ءمينيسترى وسى سىيلىققا بىردەن-ءبىر لايىق جان وسى يگور ەكەنىن ايتقان.
يگور ۆوروتنيكوۆتىڭ ەسىمىن ءتىپتى وسىدان بىرەر اي بۇرىن كوپشىلىك قاۋىم بىلمەيتىن دە ەدى. قايتىس بولعان اناسىنىڭ جۇرەگى مەن باۋىرىن وزگە ادامداردىڭ ءومىرىن ساقتاپ قالۋ ماقساتىندا ترانسپلانتاتسيالاۋعا كەلىسكەن ۇلكەن ازاماتتىعى ءۇشىن, مىنە, بۇگىنگى كۇنى ارامىزدا ونىڭ اتى-ءجونىن بىلمەيتىن ادامدار كەمدە-كەم. وعان قوسا يگوردىڭ اناسىنىڭ جۇرەگىن يەمدەنگەن جانىبەك وسپانوۆ, كەۋدەسىندە ونىڭ اناسىنىڭ باۋىرى قىزمەت اتقارىپ تۇرعان ەۆگەني كۋرتس تە قوعامدىق پىكىردى ءدۇر سىلكىندىردى.
«جانىبەكتىڭ جاڭا جۇرەگى…» دەپ بۇل تۋرالى 30 تامىزدا ءبىزدىڭ گازەت تە ءۇن قاتتى. ويتكەنى, ءبىزدىڭ ەلىمىزدە باۋىرعا بىرەن-ساران وتالار جاسالىپ جۇرگەنى بولماسا, ءجۇرەككە العاش رەت ترانسپلانتاتسيا جاسالعان ەدى. وندا دا ترانسپلانتاتسيا ءۇشىن ناۋقاس ازاماتتارعا تۋىستارىنىڭ نە جاقىندارىنىڭ ەمەس, ءتىپتى ومىرىندە ەشقاشان دا كورمەگەن, بىلمەگەن بەيتانىس ورىس ايەلىنىڭ ىشكى اعزالارى الىندى. ەلورداداعى جەدەل جاردەم مەديتسينالىق عىلىمي ورتالىعىندا ميىنا قان قۇيىلىپ قايتىس بولدى دەلىنگەن ۆوروتنيكوۆانىڭ ۇلى يگور بۇعان جىلاپ تۇرىپ كەلىسىم بەرگەن.
جۋىردا عانا جۋرناليستەرمەن بولعان كەزدەسۋدە يگور: – مەنىڭ انام و دۇنيەلىك بولعانىمەن, ونىڭ جۇرەگى باياعىداي سوعىپ تۇر. سونداي-اق, ول جۇرەك باسقا ومىرگە اراشاشى بولدى. ارينە ماعان بۇل تۋرالى ۇسىنىس ايتقان كەزدە قاتتى قامىعىپ, ءوز-وزىمە كەلە المادىم. سوسىن «سەن ول ادامدارمەن ارالاساسىڭ» دەدى. انامىز قايتىس بولعاندا قارىنداسىم ەكەۋمىز جاپاندا جالعىز قالعانداي كۇي كەشتىك. مىنە, ەندى ءبىزدىڭ تۋىستارىمىز بار. ولار – جانىبەك پەن ەۆگەني, – دەدى.
ال بۇل جيىندا جاڭا اعزالاردى يەلەنگەن جانىبەك پەن ەۆگەني دە يگورعا, وتانى جاساعان ازاماتتارعا, ورتالىقتىڭ ماماندارىنا العىس ايتقان بولاتىن.
بۇل وتالاردىڭ باسى-قاسىندا كارديوحيرۋرگيا ۇلتتىق عىلىمي ورتالىعىنىڭ باسقارما باستىعى, ەلدەگى جەتەكشى كارديوحيرۋرگ يۋري پيا بار ەكەنىن دە ەستەرىڭىزگە سالعىمىز كەلەدى. ول ءوزىنىڭ چەح ارىپتەسى جان پيركپەن, سونداي-اق ورتالىقتىڭ باسقا دا بىلىكتى ماماندارىمەن بىرگە اتالمىش وتانى ءساتتى جۇزەگە اسىردى.
وزگە دامىعان ەلدەردىڭ بارلىعىندا ترانسپلانتاتسياعا, دونورلىققا قالىپتاسقان تۇسىنىكپەن قارايدى. سەبەبى, ول ەلدەردە بۇل ماسەلە باياعىدا-اق تالقىلاۋدان ءوتىپ كەتكەن. جاڭالىق بولۋدان قالعان. وزگە ادامداردىڭ ومىرىنە اراشاشى بولعىسى كەلەتىندەر اجالى جەتپەي تۇرىپ, مەديتسينالىق ورتالىقتارعا تىركەلىپ قويادى, ياعني, ءوز ەركىمەن دونور بولادى. ال, تىركەلمەسە دە ونى كۇشتەپ جاتقان ەشكىم جوق. ياعني, دونور بولۋ-بولماۋ ونىڭ ەركىندەگى نارسە. بىراق, ءبىر عانا مىسال كەلتىرەيىك. اقش-تا كولىك جۇرگىزۋشىلەردىڭ كۋالىگىنە ەگەر ول ءوز ەركىمەن دونور بولۋعا كەلىسكەن بولسا, دونور ەكەندىگى جازىلعان بەلگى بولادى ەكەن.
ارينە, بۇل وقيعا وتاندىق مەديتسيناداعى ۇلكەن جاڭالىق. ياعني, تۇڭعىش رەت جۇرەككە ترانسپلانتاتسيا جاسالىپ جاتىر. ال, بۇنىڭ ەكىنشى ماڭىزدى قىرى دا بار. يگور ۇلتى ورىس بولعانىمەن, جانىبەكتى جاتسىنباي, باۋىر تارتىپ, وعان ءومىردەگى ەڭ ءبىر قيماسىنىڭ جۇرەگىن سالۋعا ءوز ەركىمەن كەلىسىمىن بەردى. وسى ءبىر اسا كۇردەلى, قيىن وپەراتسيانى حيرۋرگتەردىڭ ينتەرناتسيونالدىق بريگاداسى مۇلتىكسىز جۇزەگە اسىردى. بۇل ءبىزدىڭ ءبىرتۇتاس, تاتۋ-ءتاتتى ەلىمىزدە ۇلتتار اراسىندا شىنايى تاتۋلىق, دوستىق سەزىمدەرىنىڭ ىرگەتاسى بەرىك, قاراپايىم ومىردە ءبىر اتانىڭ بالالارىنداي ەكەنىن جانە قانداي قيىن جاعدايدا دا بىرگە بولاتىن جاعدايدىڭ قالىپتاسقانىن كورسەتەتىن وقيعا.
ايگۇل سەيىلوۆا,
«ەگەمەن قازاقستان».
