قاي شارۋاسىن بولسىن كەشەۋىلدەتىپ قاۋزايتىن اعايىننىڭ قىسقى سوعىمنان ءدام تاتىرۋى ناۋرىزعا دەيىن سوزىلىپ كەتەتىنى بار. تاياۋدا ەل اقساقالى ساناتىنداعى سىيلى اعامىزدىڭ ءبىرى تەلەفون شالعان. شارۋاسى – قازاقتىڭ ءداستۇرلى اندەرىن ناشىنە كەلتىرە ورىندايتىن ءارى سول اندەردىڭ تاريحىنان ارىدەن قاۋزاپ سىر شەرتە الاتىن ونەرپاز بولسا دەيدى. ۇلكەن كىسىنىڭ ءوتىنىشىن اياقسىز تاستاۋ ۇيات. قابىل العانبىز. ىزدەدىك. ىزدەگەنىمىزدى تاپتىق تا. قازىر ونەر ادامدارىنىڭ وسىنداي جيىن-تويدا از-مۇز تيىن-تەبەن تاباتىنىن ەلدىڭ ءبارى بىلەدى عوي. ۇلكەن قالالارداعىداي اتاق-داڭقى جەر جارعان ايتۋلى انشىلەردەي ەمەس, بىزدەگى ونەرپازداردىڭ ءباسى بەلگىلى. ىلە حابارلاسىپ ەدىك, اقان سەرى, ءبىرجان سال, ۇكىلى ىبىراي اندەرىن ناشىنە كەلتىرە ورىندايتىن جىگىت اعاسى كەلىسىمىن بەردى. ءان ايتىپ قانا قويماي, ءۇي يەسىنىڭ ءجون سىلتەۋىنە وراي كەزەك-كەزەك ءسوز بەرىپ, ومىرتقانىڭ ءوڭىن كىرگىزىپ باسقارىپ تا بەرمەك.
سول ەڭبەگىنە سۇرايتىنى 25 مىڭ تەڭگە.
شارۋاسىن تىندىرعانىمدى اعاما جەتكىزگەنمىن. قۋانۋدىڭ ورنىنا كۇمىلجىپ قالدى. قىمبات ەكەن دەدى.
– ارزانى تابىلماي ما؟! – دەپ سۇرادى اعام قۇتتى ءبىر حان بازاردىڭ ورتاسىندا جۇرگەندەي, – تاعى دا ىزدەپ كورسەڭ قايتەدى. الدە ۇيگە بارعان سوڭ قابىرعاممەن كەڭەسەيىن بە؟ جاسىراتىن ەشتەڭە جوق, انە ءبىر دوكەي باستىق بولىپ ىستەيتىن ىنىشەكتى دە شاقىرعانمىن. ول ءوزى قىمبات اراق ىشەدى. بوتەلكەسى 250 مىڭ تەڭگە.
– ونداي دا اراق بولا ما؟ – دەپ سۇراپپىن مەن.
– بولعاندا قانداي, – دەدى اعام, – سەن ءوزى تۇك بىلمەيدى ەكەنسىڭ عوي. الگى ءانشىنىڭ قىزمەتى قىمبات دەپ تۇرعانىم سول عوي.
ءيا, اعام ايتسا ايتقانداي. ءتول ونەرىمىزدى باعالاي الماي جۇرگەنىمىز دە وسىدان-اۋ.
بايقال ءبايادىل,
«Egemen Qazaqstan»
