ايماقتار • 21 اقپان، 2019

«ارسەلور ميتتال» كومپانياسى تەمىرتاۋداعى ەكولوگيالىق ماسەلەلەردى شەشەدى

228 رەتكورسەتىلدى

«ارسەلور ميتتال» كومپانياسىنىڭ باسشىلىعى قالاداعى ەكولوگيالىق جاعدايدى جاقسارتۋ بويىنشا شارالار كەشەنىن ازىرلەگەن. قۇرىلعان جوبانى ورىنداۋ ماقساتىندا ولار ميللياردتاعان دوللار جۇمساۋعا جانە شىعىس ەۋروپالىق ستاندارتتارعا تەڭەسۋگە دايىن. «ارسەلورميتتال تەمىرتاۋ» كومپانياسىنىڭ باس ديرەكتورى پارامجيت كالون قاراعاندى وبلىسىنىڭ اكىمشىلىگىنە بولاشاققا قويعان مىندەتتەر تۋرالى باياندادى.

- ءبىز پرەزيدەنت وڭىرىمىزگە ساپارى بارىسىندا بەرگەن تاپسىرمالاردى تالقىلاۋعا جينالىپ وتىرمىز. تالقىلايتىن نەگىزگى ءۇش ماسەلە بار. سونىڭ ىشىندە ەڭ باستىسى - ەكولوگيا ماسەلەسى. مەن جاقىندا پرەزيدەنتتىڭ قابىلداۋىندا بولدىم، ول بۇكىل قالا ءۇشىن بۇل ماسەلەنى شەشۋدىڭ قانشالىقتى ماڭىزدى ەكەنىن تاعى دا اتاپ ءوتتى. باقىلاۋ قاتاڭ بولادى. جۇمىس كوپ، ونى ساپالى ورىنداۋ كەرەك، - دەدى قاراعاندى وبلىسىنىڭ اكىمى ەرلان قوشانوۆ.

كاسىپورىن باسشىلىعىنىڭ ايتۋىنشا، 2029 جىلعا دەيىن «امت» مەتاللۋرگتەر قالاسىنداعى ەكولوگيالىق جاعدايدى جاقسارتۋ ءۇشىن ەكى ميلليارد اقش دوللارىن ءبولۋدى جوسپارلاپ وتىر. بۇل ينۆەستيتسيالاردىڭ 40 % ەكولوگيالىق جوبالارعا جۇمسالادى. قالعان 60 % ءوندىرىستى جاڭعىرتۋ ءۇشىن قولدانىلماق. تەمىرتاۋدا ەكولوگيالىق جاعدايدى جاقسارتۋ جونىندەگى جوسپار بۇگىنگى تاڭدا ازىرلەنىپ، بەكىتىلىپ قويدى.

مىسالى، كومپانيادا 2023 جىلى زاۋىتتىڭ ونەركاسىپتىك شىعارىندارى ەكى ەسەگە قىسقارادى دەپ ۋادە بەرىپ وتىر. ءۇش جىلدان كەيىن«ارسەلورميتتال تەمىرتاۋ» ءوندىرىسى تولىقتاي ەۋروپالىق تالاپتارعا جاۋاپ بەرەتىن بولادى. كومپانيانىڭ العا قويىپ وتىرعان باسىمدىقتارىنىڭ اراسىندا جۇمىس ورىندارىن ساقتاپ قالۋ جانە تەمىرتاۋلىقتاردىڭ جىلۋعا قاتىستى كوپ جىلعى پروبلەماسىن شەشۋگە سەپتىگىن تيگىزەتىن جەو-2-دە جاڭا، جەتىنشى قازاندىقتىڭ قۇرىلىسى دا بار.

- جاڭا قازاندىق جىلۋمەن جابدىقتاۋدى جاقسارتادى. ول تەمىرتاۋلىقتاردىڭ ۇيلەرىندە جىلۋ بەرۋ ماسەلەسىن شەشەدى. بۇل ماقساتقا كومپانيا 50 ميلليون دوللار ءبولدى. قازاندىق جابدىقتارىن «پودولسك ماشينا جاساۋ زاۋىتى» جەتكىزەتىن بولادى. قۇرىلىسقا وسى جىلدىڭ تامىز ايىندا كىرىسۋدى جوسپارلاپ وتىرمىز. جوسپار بويىنشا 2021 جىلى اياقتالۋى ءتيىس، - دەدى پارامجيت كالون.

سونداي-اق، پارامجيت كالون ەرلان قوشانوۆتى كومپانيانىڭ قولدانىستاعى جابدىقتاردى كۇردەلى جانە اعىمداعى جوندەۋگە كوزدەلگەن قارجىلاندىرۋ كولەمى تومەندەتىلمەيتىنىنە سەندىردى.

سونىمەن قاتار، مەملەكەت باسشىسىنىڭ تاپسىرماسى بويىنشا «ارسەلورميتتال تەمىرتاۋ» مەتاللۋرگەتەر شاھارىندا بىرنەشە الەۋمەتتىك نىسان سالادى. اتاپ ايتقاندا، ەمحانا، دەنە شىنىقتىرۋ-ساۋىقتىرۋ كەشەنى جانە بالاباقشا. جاڭا نىساندار وسى جىلدىڭ سوڭىندا پايدالانۋعا بەرىلەدى دەپ جوسپارلانۋدا.

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار