– وتكەن جىل ءسىز ءۇشىن ءساتتى اياقتالدى. دجاكارتاداعى ازيا ويىندارىندا قولا جۇلدەگەر اتاندىڭىز. ال ونىڭ الدىندا, 2017 جىلى جابىق كەشەندەگى ازيا ويىندارىندا ەكى قولانى قورجىنعا سالدىڭىز. يندونەزيادا العاشقى ۇشتىككە ىلىنەمىن دەگەن سەنىم بولدى ما؟
– اشعابادتا وتكەن جابىق كەشەندەگى ازيا ويىندارىندا ەستافەتالىق سايىستا ەكى قولا مەدال يەلەندىم. سول ءۇشىن دە كوماندالاس ارىپتەستەرىمە العىسىم زور. جەكەلەي سىندا كوڭىل كونشىتەرلىكتەي ونەر كورسەتە العان جوقپىن. سەبەبى قىسقا قاشىقتىق مەن ءۇشىن قولايسىز.
– كوماندالىق ەستافەتادا قازاقستاندىقتار جۇلدەگەرلەر قاتارىنا ىلىكتى. بۇل مەدالدى ازيادادا ازداعان ۇزىلىستەن سوڭ يەلەنىپ وتىرمىز. پسيحولوگيالىق دايىندىق قالاي بولىپ ەدى؟
– ماۋسىمنىڭ باسىندا-اق ەستافەتالىق سىنعا تىڭعىلىقتى دايىندالدىق. سول ۋاقىتتا جىگىتتەرمەن بىرگە سايىس قالاي ءوربۋى مۇمكىن دەگەن نۇسقالاردى قاتار قاراستىرا باستادىق. جارىس كۇنى جاقىنداعان سايىن تولقۋدىڭ دا, جاۋاپكەرشىلىكتىڭ دە ارتا تۇسكەنىن تۇسىندىك. مالايزيادا وتكەن سوڭعى وقۋ-جاتتىعۋ جيىندارىندا تەحنيكالىق كەم-كەتىكتەردىڭ ءبارىن تۇزەپ, الداعى ارەكەتتەرىمىزدى پىسىقتاپ الدىق.
– ءبالانديندى مىقتى سپورتشى رەتىندە بىلەمىز. ال دوس رەتىندە ول قانداي ادام؟
– دميتري بالاندين – دارىنى مەن ەڭبەكقورلىعىن ۇشتاستىرا بىلگەن سپورتشى. ال قۇرامادا جاقىن تانىسۋ ارقىلى ءدميتريدىڭ ناعىز دوس, سەنىمدى جولداس رەتىندە تانىدىم. قاي كەزدە سەنى تىڭداپ, اعالىق اقىل-كەڭەسىن ايتىپ, باعىت-باعدار بەرۋدەن شارشامايدى.
– بيىل دا كوماندامىزدى ماڭىزدى سىن كۇتىپ تۇر. ول – كورەياداعى الەم چەمپيوناتى. بۇل دوداعا باستى دايىندىق قايدا جانە قالاي وتەدى؟
– كورەياداعى الەم چەمپيوناتىنا دايارلىق قۇراما باپكەرى الدىن الا قۇرعان جوسپارعا سايكەس وتەدى. وكىنىشكە قاراي ازىرگە اتالعان كەستەمەن تانىسىپ ۇلگەرگەن جوقپىن.
– الەم بىرىنشىلىگىندە ازيا ويىندارىنىڭ ناتيجەلەرىن قايتالاپ قانا قويماي, ونى جاقسارتۋعا مۇمكىندىگىمىز بار ما؟
– باپكەرمەن بىرگە كورسەتكىشتەردى جاقسارتامىز دەپ الدىمىزعا مىندەت قويدىق. ازىرگە ناقتى ايتۋ قيىن. ونىڭ ءبارى ۋاقىتتىڭ ەنشىسىندەگى دۇنيە. ءبىز ءوز كەزەگىمىزدە كورەياداعى الەم چەمپيوناتىندا بارىنشا ءساتتى ونەر كورسەتۋگە تىرىسامىز.
– جاستار اراسىنداعى الەم چەمپيوناتىندا العاشقى تورتتىككە ەنگەندە ءسىزدى بولاشاق چەمپيون دەگەن بولجامدار پايدا بولدى. قازىر سىزگە ەرەكشە نازار اۋدارىلا باستالعانداي ەمەس پە؟
– نەگىزىنەن جاس سپورتشىلار مەن ولاردىڭ اتا-انالارى تاراپىنان ەرەكشە نازار اۋدارىلا باستاعانىن اڭعاردىم. ولار وزدەرىن قىزىقتىرعان ساۋالدار قويىپ, بىرگە سۋرەتكە ءتۇسۋ تۋرالى ۇسىنىس جاساپ جاتادى. مۇنىڭ ءبارى كوڭىلىڭدى كوتەرىپ قاناي قويماي, جاۋاپكەرشىلىك جۇگىن دە ارتتىرا تۇسەدى.
– ءوزىڭىز جۇزۋگە قالاي كەلدىڭىز جانە وسى سپورت ءتۇرىن نە سەبەپتى تاڭدادىڭىز؟
– ءجۇزۋ ۇيىرمەسىنە 8 جاسىمدا اتا-انام الىپ باردى. سەبەبى سۋدى جاقسى كورەتىنمىن, بىراق جۇزۋدەن قاتتى قورقاتىنمىن. باستاپقى دايىندىقتى اياقتاعان سوڭ قازىرگى باپكەرىم الەكساندر كۋدرياۆتسەۆتىڭ قولاستىنا باردىم. سول كىسىنىڭ ەڭبەكقورلىعى ارقاسىندا ەلىمىزدىڭ ۇلتتىق قۇراماسى ساپىنا قوسىلدىم.
ناتيجە پايدا بولا باستاعاندا ادامدا سول ءىستى جالعاستىرۋعا دەگەن قۇشتارلىقتىڭ دا ارتا تۇسەتىنى ءسوزسىز. سول سەكىلدى مەن دە العاشقى ناتيجەلەردەن سوڭ كاسىبي سپورتشى بولسام دەپ ارماندادىم, ونىڭ ۇستىنە ءجۇزۋدى جاقسى كورەمىن. اتا-انام دا سپورتتىق كارەرامدى جالعاستىرۋعا قارسى بولعان جوق.
– سىزدىڭشە, قۇرامامىزدىڭ سوڭعى جىلدارداعى جەتىستىكتەرى نەمەن بايلانىستى؟
– مۇنىڭ ءبارى باپكەرلەرىمىزدىڭ ەڭبەگى جانە عىلىمي-كەشەندى توپ جۇمىسىنىڭ ناتيجەسى. شەتەلدەن كەلگەن كەڭەسشى باپكەرلەر بىزگە دايارلىقتىڭ جاڭا ادىستەمەلەرىن قىر-سىرىن ۇيرەتەدى. قاجەتتى جاعدايدىڭ ءبارىن جاساپ اپارعان ۇلتتىق وليمپيادا كوميتەتىنىڭ دە قولداۋى زور.
– ءوزىڭىزدىڭ ءبىر كۇنىڭىز جايلى ايتىپ بەرىڭىزشى. جالپى, بوس ۋاقىتىڭىز بار ما؟
– جاتتىعۋ ۇيدە وتسە, وندا سۋداعى العاشقى جاتتىعۋ 7:45-تە باستالىپ, ءارى قاراي زالدا جالعاستىرامىز. ەكىنشى جاتتىعۋعا دەيىن بوس ۋاقىتىمىز بولادى, سول ارالىقتا ءۇيدىڭ شارۋالارىن بىتىرۋگە تىرىسامىن, كەيدە ۇيىقتاپ الامىن. ەكىنشى جاتتىعۋ 16:00-دە باستالادى. سودان سوڭ ۇيگە كەتەمىز.
دەمالىس كۇندەرى دوستارىممەن كوزدەسىپ, كينوعا نە بوۋلينگكە بارامىز. كەيدە دوستارىمنىڭ ءبىرىنىڭ ۇيىندە جينالامىز. ال وقۋ-جاتتىعۋ جيىندارى كەزىندە ءبارى بىركەلكى: سۋدا جاتتىعۋ, جالپى دەنە دايارلىعى, قايتا سۋدا جاتتىعۋ.
– جۇزۋدەن بولەك تاعى قانداي قىزىعۋشىلىقتارىڭىز بار؟
– بوس ۋاقىت تابىلا قالسا قالا سىرتىنا شىعىپ, بالىق اۋلاعاندى, تاۋعا شىققاندى ۇناتامىن. ءارتۇرلى جانرداعى اۋەندەردى تىڭدايمىن. كولىك قۇرىلعىلارىن زەرتتەگەندى, ۆەلوسيپەدپەن سەرۋەندەگەندى قۇپ كورەمىن.
اڭگىمەلەسكەن ءمادينا اسىلبەك,
جۋرناليست
